Dosje dhe intriga/ A po luhet për shefin e Opozitës

Sezoni i ri politik që nis në shtator pritet të jetë më i ashpri i skenës politike në këto dekada. Nisma janë depozituar në parlament që synojnë hapjen e dosjeve të Sigurimit të Shtetit, e më tej ndalimin me ligj të aktivizimit politik të bashkëpunëtorëve apo personave të shpallur non-grata. Ilir Meta dhe Sali Berisha në target. Kush e nxori dosjen e Ilir Metës, dhe a është në lojë lidershipi i Opozitës. Çfarë fshihet në nëntokën e politikës dhe ç’pritet të ndodhë? A do të jetë ky shtator përcaktues për fatin e Ramës, Metës dhe Berishës? Një analizë e plotë nga Newsbomb.al

Në fundin e një korriku ku nuk po ndodhte ndonjë gjë e madhe, kur sesioni parlamenar ishte mbyllur dhe kur supozohej që një paqe politiko-mediatike po nderej mbi shpirtrat e lodhur të këtij trualli, një shkresë e beftë nga Autoriteti i Dosjeve, drejtuar Kuvendit të Shqipërisë, ndryshoi gjithçka. Një ditë pasi la postin më të lartë që njeh Kushtetuta e vendit, atë të Presidentit, Ilir Meta u shpall bashkëpunëtor i Sigurimit të Shtetit.

“Kemi zbuluar se Ilir Meta është bashkëpunëtor i Sigurimit të Shtetit”, thotë pak a shumë letra drejtuar kryetares së Kuvendit, Lindita Nikolla. Këtë e bëjnë të ditur për revistën Newsbomb.al, persona që e kanë parë dokumetin. Autoriteti i Dosjeve, kërkon më tej ndryshim ligjor, për të bërë të mundur zbardhjen dhe transparencën. Pasiqë, një nen i ligjit i ndalon publikimet apo hulumtimet për rastet kur komisionet e mëparshme, si Mezini apo Bezhani, janë shprehur.