Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Një ish-repart ushtarak, i mbetur gërmadhë, sot është shndërruar në një qytet mbresëlënës. “Fish City” në Labinot të Elbasanit është ndalesa që dëshmon të vërtetën e punës. Gjergj Luca në një rrëfim ndryshe për fëmijërinë, nga koha kur luante me zara, tek shkolla e natës dhe lotët e së ëmës… Arti – trashëgimnia që i lanë dy prindërit, Ndrekë e Mimika Luca. Baba i pesë fëmijëve, nga dy martesa, e dyta me një ruse. Gjoba 1 milionë dollar që i vendosi Fatos Nano dhe adhurimi për Edi Ramën… Si ia doli të jetë Oligark, dhe resptekti që gëzon për kolegët biznesmenë si ai vetë

E vërteta dhe puna, është edhe filozofia e jetës së Gjergj Lucës, njeriut që me gjithë rebelizmin, këmbënguljen e peripecitë e vazhdueshme, ia doli të ndërtojë një qytet të tërë.

Gjergji është djali i Ndrek dhe Mimika Lucës, dy prindër artistë, që kanë lënë në arkivën e dramës shqiptare dhjetëra role e pjesë të jashtëzakonshme. Ndreka ka lënë “Shtatë Shajlanët” apo “Votrën e Huaj” që i shkroi vetë, ndërsa Mimika, interpretimin më të mirë e ka në dramën “Drita” që e ka shkruar po vetë.