3 italianët e protestës së PD: Qëlluam policinë me patate, për solidaritet!

8 maji kishte ngjyra të ndryshme: në selitë diplomatike të Europës në Tiranë bëheshin përgatitjet e fundit për të celebruar 9 majin, ditën e Europës. Po kështu edhe në kryeministri. Qeveria planifikonte hapin e radhës për të marrë vëmendjen dhe publicitetin e kësaj dite, me simpoziume, fjalime, konferenca se ku jemi në raport me vendet e bashkimit europian në procesin e anëtarësimit.

Kështu ndodhte edhe në PD. Edhe ata po mendonin për europianët që po i vinin nga Rinasi, por me një qëllim tjetër. Protesta e tetë kombëtare do të zhvillohej po në 8 maj pasdite dhe përgatitjet duhet të ishin në maksimum. Pas “asgjesimit” të grupit të zjarrit në protestën paraardhëse, ku policia kapi disa prej kapuçzezëve që hidhnin shishe me benzinë të ndezura drejt kryeministrisë, me ndërhyrjen e forcave speciale dhe ndalimin, a arrestimin e disa prej tyre, po merreshin masa që disa prej “protestuesve” të ishin vërtet europianë.