“Tsunami” i çmimeve, protestat, çudia që zgjati vetëm 3 ditë

Qytetarët për tre ditë u rebeluan në mbarë vendin kur u përballën me indiferentizmin e qeverisë për rritjen e menjëhershme të çmimeve, ndërkohë që në rajon, të gjithë kishin marrë masa. Dy ditët e fundit, protestat morën trajtën politike, duke zbehur qëllimet. Qeveria propozoi plan masash, por a janë të mjaftueshme? Më e keqja nuk ka ardhur ende…

Më datën 24 shkurt 2022, Rusia e Putin sulmoi ushtarakisht Ukrainën. Të nesërmen datë 25 shkurt,  në tregjet ndërkombëtare, çmimi i grurit u rrit me 5 USD dhe çmimi i naftës Brent Crude kërceu nga 92 dollarë amerikanë për fuçi në 98 dollarë. U duk qartë se këto dy mallra, kaq shumë të lidhura me Rusinë dhe Ukrainën (Rusia është eksportuesi i tretë më i madh në botë i naftës dhe Rusia e Ukraina së bashku japin një të katërtën e 178.5 milionë tonëve të grurit që shiten dhe blihen për një vit në botë), do të njihnin çmime në rritje ditë për ditë.

Sanksionet e menjëhershme ekonomike që u shpallën brenda 48 orëve ndaj Rusisë, sollën presion akoma më të fortë në tregjet ndërkombëtare të mallrave dhe krahas grurit dhe naftës, filluan të rriten me shpejtësi çmimet e gazit natyror (Rusia furnizon 40 përqind të gazit natyror për energji elektrike të vendeve të Bashkimit Evropian), energjisë elektrike, miellit, lëndëve të para bujqësore, nikelit, etj.