Vajzat e humbura

Nga bullizmi, rrjetet sociale dhe institucionet që nuk i dëgjuan. Historia e plotë e videos që tronditi Shqipërinë ku rrahja e 17 vjeçares nga tre vajza të tjera nxorri në pah problemet e thella të shoqërisë. Një rrjet “ekskortash” për shantazh, vajza me tatuazhe që lënë shkollën dhe përdorin njëra – tjetrën, e familje të varfra në ekstrem. Njerëz që nuk dëgjojnë e nuk raportojnë, sidomos në shtet! Një rrugëtim mbi historinë që nisi shumë kohë para videos virale Nga Laureta Rroshi Për Patricia Dokon nuk kishte ditëlindje në këtë 10 korrik. Ditën që mbushi plot 17 vjeç e kaloi mes lotësh e të qarash me ngashërim. E kishte menduar ndryshe ditëlindjen që donte të bënte me shoqërinë kur të mbushte 17 vjeç. Ndoshta jo ndonjë festë të madhe, por, si një kursante e re për parukeri, kishte menduar të krihej bukur, të vishte një fustan, të merrte shoqet e veta dhe të dilnin në një nga lokalet në qytetin e Fierit për të festuar. Patricia kishte ëndrra, por asnjëherë s’e kish menduar se në 10 korrik, ditëlindja do t’i shkonte mes lotësh, e fshehur, sa nga turpi e sa nga fjalët e njerëzve; sa nga frika, e sa nga qëmtimet e syve të shoqeve të saj duke e parë e mërmeritur se ajo ishte vajza e videos. Po, po, vajza që e ulur në një divan, po rrihej në mënyrë shtazarake nga dy vajza të tjera të moshës së saj, e ndërsa një e tretë e filmonte. Tre dhunueset qeshnin e lodronin me njëra tjetrën, e kapnin nga flokët, e ulnin e ngrinin, e gjuanin me shpulla e me shkelma, e vajza e gjorë, e gjendur në atë batare sulmi, thoshte veç “o ma”, një ofshamë që i dilte nga shpirti, nga dhimbja, nga poshtërimi, nga dhuna, nga rrethanat, nga vajzat që i mendonte shoqe. E pra, video e rrahjes së Patricias kishte marrë dhenë në rrjetet sociale. Po bëhej nami në tik-tok, tëitter, Instagram, snapchat…Lumi i komenteve vërtitej te dënimi i aktit të shëmtuar, por kishte prej atyre tek e tek që e fajësonin të voglën, që asfare nuk e dinte se çfarë krimi kish bërë mes shoqesh, apo pretendentesh për shoqe, për të merituar dhunën që e panë të gjithë. Ngjarja Elda Doko nuk e mendoi dy herë të nisej drejt dyerve të komisariatit të policisë kur pa vajzën e vet 17 vjeçare Patricia në atë gjendje të rënduar. Mëngjesin e 8 qershorit vajza ishte nisur si zakonisht në kursin e Parukerisë që kishte filluar pasi kishte lënë shkollën, dhe deri këtu, nëna ishte e qetë për të. Por më vonë një telefonatë e vajzës që i kërkonte të takohej me të rreth Globit, në Fier, në orën 14.30, e ka tronditur zemrën e nënës, që e ndjen gjithmonë sa herë i ndodh diçka fëmijës. Elda u takua me Patrician aty ku ajo i tha. E pa të bijën me shenja në fytyrë, që nuk i kishte në mëngjes. E ka pyetur vajzën se çfarë kishte dhe Patricia, e frikësuar, nuk i ka treguar asgjë. Nënë e bijë morën autobuzin për t’u nisur drejt banesës, por vajza, me të mbërritur në shtëpi, hyn në dhomë e nuk del prej andej. Dënesat e saj të vogla e të shkëputura, me ngulcime të herëpashershme, ndiheshin në korridore, por nëna nuk e ka menduar seriozisht se çfarë ka vajza. “Janë adoleshente, kush mund ti ketë thyer zemrën”, ka menduar nëna për ndonjë dashuri të çastit të vajzës. E vetmja që e ka sjellë në vete për të kthyer sytë te vajza e saj ka qenë e motra, Xhemilia, që i ka treguar se kishte dëgjuar që Patrician e kanë dhunuar disa vajza të mitura. Kaq ka mjaftuar që nëna të hapë derën dhe të komunikojë sërish me të bijen. Patricia duke qarë i tregon se tre vajza që u di vetëm emrat Nela, Mari dhe Klea e kishin ftuar në banesën e tyre për ti dhënë diçka. “U bëra kurioze dhe shkova”, pranon 17 vjeçarja përpara nënës së saj duke i thënë se ato e kishin rrahur më pas dhe e kishin nxjerrë nga banesa. Kaq ka mjaftuar. Pasditja nuk shkoi më qetë mes debateve se çfarë duhej bërë. Por nëna ishte e vendosur. Mori vajzën për krahu dhe në orën 20 të mbrëmjes, mbërriti në komisariatin e policisë së Fierit për të bërë kallzmin ndaj tre vajzave që kishin dhunuar vajzën e saj. Aty i pret një polic, por në atë orë të vonë të mbrëmjes dhe ata duan të jenë më rehat, më qetë, pavarësisht se thuhet shpesh se djalli zgjohet veç natën. Por, uniformat blu në atë orë presin që të ngjajnë ngjarje të rënda, këto, siç janë rastet e dhunës, nuk merren shumë seriozisht. Fundja, një sherr mes gocash, mes shoqesh. Pa pasur frikë, e në prani të nënës së saj, Patricia tregon para një oficeri të policisë gjyqsore ngjarjen e asaj dite, siç e përjetoi. Shpullat në fytyrë i digjinin akoma, e po ashtu edhe koka i dhimbte, sa nga grushtat e shkelmat që hante kudo nëpër trup, aq edhe nga tërheqja e flokëve. Më shumë se të gjitha, i dhimbte ajo video që ishte filmuar, e që ia tregoi edhe oficerit të policisë gjyqsore: po, ato e kanë filmuar të gjithë skenën. “Ato më dolën përpara në rrugë. Më thanë se kishin diçka të rëndësishme për të më thënë. Gjatë rrugës ishin miqësore me mua, të dashura, biseduam për gjëra të rastësishme. Kur u futëm brenda në shtëpi, Nela e mbylli derën me çelës. Filluan të më godisnin të treja. Në fillim nuk po kuptoja fare se ç’po ndodhte dhe pse po ndodhte”, rrëfen Patricia në dëshminë e saj. Kaluan minuta të tëra që dy vajza e qëllonin pa mëshirë dhe Patricia e gjorë kërkonte ndihmën e të emës me ofshama. Por ato tre vajza nuk ndjenin keqardhje. Rrih e filmo, rrih e filmo. E sillnin rreth e rrotull dhomës e pamjet e transmetuara në mediat online dhe tv janë tragjike. Pasi nxorrën gjithë dufin e tyre e lanë të lirë, e hapën derën. Vajza e traumatizuar e mbajti frymën drejt e në spital. Eshtë e çuditshme çfarë mjekësh ka gjetur vajza në spital që e kanë parë në atë gjendje të rënduar, jo vetëm psikologjike, por edhe fizike, dhe nuk e kanë pyetur apo nuk e kanë raportuar si rast. Asnjë telefonatë drejt policisë edhe pse e kanë detyrim ligjor, dhe kjo vërtetohet tanimë, edhe nga dokumentat hetimore të prokurorisë. Vajza qartazi kishte shenja të nxira ngado në fytyrë. Janë mjaftuar veç me fjalën e saj se nuk ndihej mirë dhe donte të merrte një serum që siç duket ia kanë bërë. E pasi mbaroi me serumin, mori në telefon prindërit dhe u tregoi se nuk ndihej mirë. Pas kësaj filloi puna e policisë ku direkt u bë kqyrja e jashtme në prezencë të psikologes meqënëse vajza konsiderohet e mitur, oficeres së policisë gjyqsore dhe u mor një vendim për caktimin e një eksperi për ekspertimin mjeko-ligjor. Vajza tregoi përpara uniformave blu ekzaktësisht shtëpinë ku e kishin marrë shoqet e saj. Nuk dihet se për çfarë arsyeje policia priti një ditë të trokiste në derën e asaj shtëpie të treguar nga Patricia. Sipas dokumentave të policisë, në banesën e treguar uniformat blu shkuan në datën 9 qershor, pra një ditë pas denoncimit. Aty gjetën shtetasen Leonela Lamaj (Nela), 19 vjeçe, dhe e morën e shoqëruan në komisariat. Leonela, Mariza dhe Klea, kur kanë kuptuar se gjithçka do të kalonte përmes policisë, kanë rënë dakord për të rrëfyer një version para uniformave blu, pavarësisht se tek tuk, secila prej tyre shket në detaje. Leonela Lamaj, 19 vjeçare ka lindur në Vlorë dhe tani gjendet me arrest me burg për shkak të kësaj ngjarjeje. Në dëshminë e parë që dha përpara uniformave blu tregoi se ka qenë në shtëpi në orën 12.30 së bashku me Marizën dhe Klean kur mori në telefon Patrician për t’u sqaruar “për një muhabet”. Meqë është më e madhja në moshë ndër to, urdhëroi Klean, më të voglën, që të dilte ta merrte në rrugë Patrician se nuk e dinte shtëpinë. “Sapo hynë në banesë, Patricia (vajza e dhunuar) e shau Marizën. Mariza nuk duroi dot dhe e goditi me pëllëmbë. Pastaj e godita dhe unë se më shau. E kam goditur me pëllëmbë në faqe dhe askund tjetër. Mariza e goditi në çdo vend të trupit. Madje unë vetë ndalova se u preka. U thashë dhe gocave të ndalojnë”, rrëfen 19 vjeçarja para uniformave blu në dëshminë e saj të parë. Sigurisht, një dëshmi për të kaluar rradhën sepse video e shfaqur më vonë tregoi qartë se 19 vjeçarja as nuk është prekur nga skena e rrahjes. Madje dhe videon, kur u pyet nga policia Leonela e mohon se ekziston. Oficerja e policisë gjyqsore i kërkon që të hapë telefonin dhe vajza e hapi vetë. Dhe kaloi direct te galeria për të treguar se nuk kanë asgjë aty. Por më pas, oficerja i kërkon të shkoj te ikona e materialeve të fshira dhe aty, sikur vajzës nuk i kishte shkuar mendja, gjendet edhe videoja. Policia konstaton disa video, jo një të vetme. Dy vajza që rrihnin një të tretë në ambientet e brendshme të një banese dhe një vajzë e katërt që filmonte. Në këto kushte, policia bën edhe sekuestrimin e aparatit të celularit. Po në të njëjtën ditë, në 9 qershor u mor në pyetje edhe vajza tjetër, Mariza Roçi, vetëm 15 vjeç që e pranon faktin se një ditë më parë ka qenë tek shtëpia e Nelës. “Kur shkova aty gjenda Nelën dhe Klean brenda në kuzhinë duke biseduar. Nelës i ra telefoni e mori Patricia. Ajo i tha se do vinte në banesë për të folur me to. Klea doli ta marrë. Sa erdhi më shau me fjalë të pista. E godita menjëherë e pas meje edhe Nela. Patricia nuk ktheu dorë. Pastaj ajo iku, dhe ne të treja dolëm shëtitje. Pimë nganjë gjë në local dhe Klea iku në Shtëpi, ndërsa unë me Nelën bëmë një shëtitje në pedonale dhe shkuam te shtëpia e Nelës”, tregon përpara uniformave blu 15 vjeçarja. Klea, vajza e fundit e përfshirë në këtë histori dhune, edhe ajo 15 vjeçare u thotë policëve kur e kërkuan në komisariat se e dinte se për çfarë e kishin thirrur. “Unë nuk dija gjë, shkova te shtëpia e Nelës që të bëja detyrat ”, tregon 15 vjeçarja para uniformave blu. U tregon atyre se kishte dalë të priste Patrician se nuk e dinte shtëpinë e Nelës. Vajza tregon të njëjtën histori, që Patricia sa hyri shau Marizën dhe kjo e fundit e goditi me pëllëmbë. “Unë nuk e dija që do të goditeshin. E dija që ishin sharë me njëra tjetrën por jo që të arrinim deri këtu. Unë vetë nuk doja të qëlloja, por Nela më tha ta godisja, dhe ma kapi dorën e ma drejtoi te faqa e Patricias. Unë u tremba, u thashë vajzave ta linin, por ato nuk më dëgjuan dhe vazhduan ta godisnin. Patricia nuk fliste fare. E dëgjova që tha: “më lini se nuk ju shaj më, nuk e bëj më !” Pastaj Patricia kërkoi ujë. Mariza i dha ujë, “ pastaj i hapëm derën dhe e lamë të ikte. Iku me vrap po unë nuk e di se ku shkoi. Më vonë Mariza më tha se e kishte parë prapë Patrician te stacioni i autobuzit në afërsi të shkollës “Janar Kilica” dhe e kishte qëlluar prapë në rrugë” , tregon Klea përpara uniformave blu në dëshminë e vet. Hetimet e thelluara Nuk kishte sitëndodhte ndryshe dhe pas pyetjes së vajzave, policia bën atë që di të bëjë më mirë, të përcjellë çështjen në Prokurori, pa e menduar, dhe pa u thelluar shumë. Çdo oficer policie apo prokuror duhet ti jepte kësaj çështje rëndësinë e vet. Fundja, të mendonin si për vajzat e tyre. Bindja se kjo gjë nuk vjen te pragu I shtëpisë sonë, ndonjëherë është më vrastar sesa vetë fakti. Në 10 qershor, prokuroria regjistroi procedimin penal për heqjen e lirisë dhe dhunën në bashkëpunim. Eshtë Akoma në hetim fakti sesi videoja që gjendej në telefonin e Nelës u bë virale në fillim të muajit korrik. Ndoshta sepse në këtë pikë, hetimet e prokurorisë prekën një fakt tronditës, ku Brenda rrjetit abuzues u shfaq një punonjës policie, i cili kishte krijuar “marrëdhënie të panevojshme” me vajzat, dhe sot flitet se hetohet edhe nga AMP. Drejtori i Përgjithshëm i policisë e shkarkoi dhe përjashtoi nga policia menjëherë. Për herë të parë u fillua të flitet për “ekskorta”. Vajza të cilat krijojnë një rrjet shantazhi mes vajzash-ekskorta të mitura, duke shfrytëzuar gjendjen e tyre emocionale, por edhe nën efektin e narkotikëve dhe lëndëve psikotrope. Vajza, që sipas dyshimeve të prokurorisë, kanë çrregullime të sjelljes dhe agresivitet të pakontrolluar. Janë vajza që vijnë nga familje me probleme ekonomike dhe jo vetëm. Vijnë nga zonat rurale nën kujdesin e të afërmve në qytet, ndërsa kanë baballarët në emigracion, apo nëna kryefamiljare. Janë vajza që kanë probleme me shkollën, rriten e kultivohen në një shoqëri me të njëjtat tatuazhe dhe mënyrë jetese të muajve të fundit. Një nënë që thërriste “Ndihmë” e s’e dëgjoi kush Për njërën nga vajzat 15 vjeçare, Marizën, ka pasur raporte të mëparshme edhe nga psikologu i shkollës. Ajo e la shkollën pasi ndihej e bullizuar, prindërit e saj kërkuan ndihmë, por vajza, e la klasën e 8-të. Një vit më parë, diku nga tetori “Drejtoresha na tha ‘zhdukuni’, psikologia qeshte”, janë dëshmitë që dalin më së fundi, ndërsa prindërit e 15-vjeçares kërkuan ndihmë dhe trajtim për të bijën. Nëna e njërës prej tyre që morën pjesë në dhunimin e vajzës, ka kërkuar trajtim të specializuar për të bijën. “Problemet e saj kanë nisur një vit më parë”, rrëfen mes lotësh nëna e Marizës që tashmë po ndiqet në spitalin psikiatrik. Ajo pretendon se gjendja e vajzës kishte ndikuar edhe në arsimimin e saj, ndërsa pretendoi se familja nuk kishte marrë mbështetjen e nevojshme nga shkolla dhe psikologia. Tani që ngjarja është bërë publike, nëna shprehet e shqetësuar edhe për mungesën e informacionit lidhur me gjendjen shëndetësore, aktuale dhe trajtimin që po merr e bija tashmë në shtrim të detyruar nga Prokuroria. Në raportin e mjekes psikiatre pediatre, shënohet në muajin prill “çrregullime të sjelljes jo organike”. “Nuk dimë asgjë për gjendjen e vajzës. Jam shumë e shqetësuar, pasi nuk kam asnjë informacion për analizat apo trajtimin. E kam takuar dy herë në spital” , deklaroi ajo. “Vajza nuk kishte rroba të reja apo telefon, përveç atyre që i blinim ne. Kur kthehej në shtëpi në orët e para të mëngjesit, nuk më tregonte ku kishte qenë. Më thoshte vetëm se kishte qenë me shoqet. Nuk i njihja shoqet e saj dhe as prindërit e tyre. I njoha vetëm në polici ”, tha nëna. Ajo deklaroi se nuk kishte pasur asnjë kontakt me familjen e 17-vjeçares së dhunuar, ndërsa shtoi se prej një viti familja e saj u ishte drejtuar disa herë strukturave të Policisë dhe bashkisë për ndihmë. Nëna pretendoi se shqetësimet e vajzës kishin nisur në shkollë dhe se, kur prindërit kishin kërkuar ndihmë, ishin përballur me një reagim të papërshtatshëm nga drejtuesit e institucionit arsimor. “Në shkollë vajza nisi të kishte probleme. Drejtoresha na nxori jashtë, si ne prindërit, ashtu edhe vajzën. Na thanë ‘zhdukuni’. Psikologia qeshte me ne. Më pas e çuam në një shkollë tjetër private, por ajo nuk pranonte të shkonte” , deklaroi ajo. Nëna tha gjithashtu se e bija kishte denoncuar më herët të atin për dhunë, kur ai i kërkonte llogari se ku rrinte e çfarë bënte jashtë deri në orët e para të mëngjesit. “Nuk e dimë kush e sillte apo e merrte nga shtëpia, ishte gjithë ditën në telefon”, rrëfen nëna mes lotësh. Të dielën e 12 korrikut, në mesditë, të tre vajzat mbërritën me makina policie dhe pranga në gjykatë. Videoja virale u përcoll me komente agressive në mediat sidomos ato online, ndërsa në Gjykatë ishin vetëm të afërmit e 15 vjeçareve. Mbi dy 15 vjeçaret dhe 18 vjeçaren Leonela Lamaj rëndon akuza “Dhunë dhe heqje e lirisë së personit në bashkëpunim”.

Nga Laureta Rroshi

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

PROTESTA E MEMEVE TË TALLESH NË ZGRIPIN E PAMUNDËSISË

Zvërneci, investimi që do ndryshojë historinë e turizmit shqiptar

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

PROTESTA E MEMEVE TË TALLESH NË ZGRIPIN E PAMUNDËSISË

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjiri i Kakomesë, “Bukuroshja” e braktisur bëhet gati për TURIZËM

Sabri Godo, veç “SKËNDERBEU”-t ju rrëfej betejat e mia me kalë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?