Tatimet mes Kuçedrës së borxhit e pasaktësive skandaloze

Rritja e detyrimeve të papaguara tatimore (borxhit tatimor), sjell më pak të ardhura të mbledhura për buxhetin e shtetit. Dhe më pak të ardhura përkthehen në më pak investime, të mira dhe shërbime publike. Në  vitet e fundit, borxhi tatimor ndodhet në nivele shumë të larta, sa një e pesta e shpenzimeve buxhetore që bëjmë. Imagjinoni sikur ky borxh tatimor të mblidhej në kohë, do të kishim mundësi të bënim 20 përqind më shumë investime publike dhe të rrisnim pensionet dhe pagat në shtet me 20 përqind! Pasaktësitë skandaloze të sistemit-një armatë subjektesh të parregjistruara në tatime!

Në fund të vitit 2021, shteti shqiptar rregjistronte të ardhura tatimore 476 miliardë lekë, nga të cilat borxh tatimor ishin 135 miliardë lekë (1 miliardë e 160 milionë euro), ose 28% e totalit të të ardhurave. Ose, thënë ndryshe, sa një e pesta e shpenzimeve tona publike!

Ky nivel borxhi tatimor, i pashoq në detyrimet fiskale të pambledhura në vendet e rajonit të krahasueshme me ne, si dhe i akumuluar ndër vite, tashmë e ka kthyer në joproduktiv misionin e administratës sonë publike. Borxhi i tejfryrë tatimor po luan rolin e Kuçedrës që gëlltit të ardhmen e vendit, e bajlozit të zi që ka bllokuar detin e fondeve për rritjen e pensioneve, rrogave në shtet dhe të investimeve publike.