NA ISHTE NJË HERË GAZETA/ Kosova, media në Shqipëri e kish gjithmonë KRYETEMË

Takimi i Fatos Nanos me Sllobodan Milosheviçin në Kretë në nëntor 1997. Si u mbulua nga media shqiptare dhe si arriti Ben Blushi të quhej i dërguari i “Koha Jonë” dhe të bëhej gazetari i vetëm shqiptar që i drejtoi një pyetje direkte kasapit të Ballkanit. Gazeta “Rilindja” e Prishtinës dhe “Bashkimi” e Tiranës në raportimet e lajmit për shpalljen e pavarur të Kosovës në 1990. Për të mbërritur te bombardimet e NATO-s në mars 1999 e deri te mbulimi i shpalljes së shtetit të Kosovës më 17 shkurt 2008. Një guidë historike që vlen sa një histori e tërë e medias.

Shteti kishte rënë. E gjithë Shqipëria ishte zhytur në kaos. Kokat ishin aq të nxehta saqë vetëm brenda pak muajve ishin vrarë mbi 1500 persona dhe 5 mijë ishin plagosur, ndërkohë që varfëria ishte ulur edhe një herë këmbëkryq. Qeveria disa mujore e Bashkim Finos ia kishte lënë vendin qeverisë socialiste të Fatos Nanos të dalë nga zgjedhjet e parakohshme parlamentare. 1997-ta ishte i tëri një vit i zi. E megjithatë, në një cep të mendjes të çdo shqiptari, rrinte Kosova. Diçka e madhe po lëviste. Si fillim për keq. Makina ushtarake e Sllobodan Milosheviçit po mësynte në trojet shqiptare dhe askush nuk ia dinte fundin. Diplomacia ndërkombëtare po lëvizte gjithashtu, por ende dukej e përhumbur dhe e paqartë. Mes kësaj situate absurde në ishullin grek të Kretës u krye një takim i rëndësishëm shqiptaro-serb, teksa aty po zhvillohej Samiti me liderët e Ballkanit. I pari i Shqipërisë dhe i pari i Serbisë, jo vetëm shtrënguan duart por dhe biseduan kokë më kokë për rreth 1 orë e gjysmë për shqiptarët e Kosovës. Kryeministri Fatos Nano dhe presidenti Sllobodan Milosheviç konsumuan atje një nga aktet më të diskutueshme dhe më të komentuara në histori. Dhe siç ishte Shqipëria, ashtu ishte edhe media. Për reporterët e gazetave të Tiranës, të shoqëronin Fatos Nanon dhe të merrnin pjesë atje në takim ishte sikur sot të mbulonin dhe shoqëronin udhëtimin në Mars të Elon Musk. Megjithatë disa e gjetën zgjidhjen. Gazeta më e madhe e asaj kohe “Koha Jonë” kishte nëndetëse e saj në këtë ngjarje. Ish-kryeredaktori Ben Blushi ishte bërë pjesë e stafit të kryeministrit, por ende nuk dihej në publik. Në këtë mënyrë, me aftësinë e tij në të tilla situata, botuesi Nikoll Lesi e kishte shumë të lehtë ta quante Ben Blushin të dërguarin special të gazetës në këtë takim. Dhe jo vetëm kjo ndodhi, por Ben Blushi u bë i pari dhe i vetmi gazetar shqiptar që drejtoi një pyetje direkt kasapit Sllobodan Milosheviç. Ndërsa të gjitha gazetat e tjera raportonin ato që merrnin nga mediat e huaj, “Koha Jonë” ishte përjashtimi. Me titullin kryesor në faqen e parë “Nano-Sllobo, 90 minuta mister”, “Koha Jonë” ishte kampion i medias së Tiranës atë 4 nëntor të vitit 1997. Shkrimi niste që në faqen e parë në vend të editorialit me okelion “Nga i dërguari i ‘KJ’ në Kretë, Ben Blushi”. Vendin kryesor në këtë shkrim e zinte pyetja që Ben Blushi i bëri Milosheviçit. Raportonte Blushi për “Koha Jonë”: