Milioneri amerikan që zhvati 250 mijë franga ari nga Banka e Shqipërisë

Shteti Shqiptar apo zyrtarë të lartë shqiptarë janë zhvatur apo mashtruar në shumë raste gjatë ekzistencës 110 vjeçare. Disa prej historive janë aq të pabesueshme sa mund të meritojnë skenar kinematografik ndërsa shumë të tjera hetim të hollësishëm për të nxjerrë në pah detajet e mashtrimeve. Ngjarja e fundit me ish shefin e kundërzbulimit të FBI-së, Charles McGonigal, i cili besohet se ishte përfshirë në skema mashtrimi dhe lobimi në Shqipëri nxorri në pah një fenomen që ka ndodhur shumë shpesh me zyrtarët shqiptarë. Gjatë gjithë historisë së Shtetit Shqiptar, raste të ngjashme ka me dhjetëra

Raste mashtrimi të të huajve në Shqipëri, historia njeh disa syresh. Ndër rastet më të pabesueshme mund të përmendet ajo e aventurierit gjerman Otto Witte, një punonjës cirku, i cili në vitin 1913 vizitoi Shqipërinë duke u hequr si Mbret i Shqiptarëve. Më pas, në fundin e viteve 20-të, një gjoja zv.rektor universiteti i një vendi të huaj vizitoi Tiranën dhe shprehej i mahnitur me inteligjencën shqiptare. Ai nisi të shpërndajë diploma të rreme universitare kundrejt pagesës, por që u pikas nga xhandamëria e Mbretit Zog dhe u arrestua në hotelin ku qëndronte, mes shumë diplomave gati për t’i shpërndarë ku nuk mungonin emrat e mjaft deputetëve, apo zyrtarëve të lartë të kohës që kishin menduar se mund të bëheshin me universitet.