Buxheti 5 miliardë euro, si do të shpenzohet dhe nga do t'i gjejë të ardhurat buxheti më i madh në HISTORINË E SHQIPTARËVE?

Shpenzimet e planifikuara të buxhetit tonë të shtetit për vitin e ardhshëm, sipas projekt-buxhetit për vitin 2022, të paraqitur nga qeveria, janë fiks 5.2 miliardë euro! Është buxheti më i madh i periudhës së tranzicionit 1991-2021 dhe, sigurisht, më i larti dhe në historinë e buxheteve të qeverive snë këto 109 vjet shtet shqiptar. Përfaqëson më shumë se një të tretën e prodhimit tonë kombëtar. Prandaj pothuajse të gjithë i kane sytë nga Shteti. Janë mbi 200 mijë familje që mbahen me rrogën e shteti. Janë 686 mijë pensionistë që mbahen me pensionin që marrin në shtet. Janë me dhjetëra mijëra sipërmarrës që shikojnë nga tenderat e shtetit. TË GJITHË SYTË TEK PARATË E SHTETIT Një në tre qytetarë që jetojnë tek ne ka një interes të drejtpërdrejtë me Shtetin. Ja përse buxheti i shtetit është kaq i rëndësishëm. Në morinë e shifrave dhe treguesve të tij, kuptohet që qytetari e ka të vështirë të orientohet dhe të masë nëse qeveria e ka bërë mirë apo jo dhe aq mirë detyrën e saj për të përgatitur një buxhet me këmbë në tokë. Pra, realist, por edhe të kuptueshëm. Projekt-buxheti 2022 synon konsolidimin e rimëkëmbjes ekonomike të vendit pas dy fatkeqësive natyrore si tërmeti i 26 Nëntorit 2019 dhe pandemia e shkaktuar nga COVID-19. Ai parashikon rritjen ekonomike për vitin 2022 në 4.1 përqind. Rritja ekonomike dhe punësimi, do të mbështeten nga një nivel i lartë i investimeve publike. Shpenzimet e buxhetit do të përqëndrohen në procesin e rindërtimit, si dhe financimin e projekteve strategjike. Ato synojnë finalizimin e projekteve të rrugëve nacionale, mbështetjen e sektorit të ujit, shëndetësisë, arsimit dhe sektorit të bujqësisë dhe zhvillimit rural. Fonde do të shkojnë për kujdesin ndaj brezave, duke filluar me programet specifike për mirërritjen dhe shkollimin e fëmijëve, aftësimin dhe punësimin e të rinjëve, si dhe mbështetje më të madhe financiare për shtresat në nevojë dhe moshën e tretë. KOPSITJA E NJË BUXHETI Buxheti për vitin 2022 ngjan i kopsitur mirë. Synon të rrisë të ardhurat buxhetore dhe duket se inflacioni(rritja mesatare e çmimeve) po e ndihmon në këtë detyrë. Inflacioni për vitin e ardhshëm parashikohet të jetë 3 përqind. Buxheti këtë nuk e thotë asgjëkundi. Thotë vetëm se do të rrisë të ardhurat me 377 milionë euro. Provon të shtojë investimet publike me 58 milionë euro më shumë, ose 6.6 përqind mbi nivelin e pritshëm të këtij viti. Edhe pse jemi ende në mes të pandemisë, rrit rrogat për disa kategori të administratës publike. Shpresojmë fort, me gjithë zemër, që rritja ekonomike të vërtetohet, pse jo edhe 4.5 përqind për vitin e ardhshëm, dhe të ardhurat të na vijnë sipas parashikimit. Por kjo shpresë duket më shumë si ëndërr e një nate vere. PSE BUJQËSIA MERR MË PAK? Buxheti i parashikuar për Ministrinë e Bujqësisë dhe Zhvillimit Rural është 2% më i ulët se sa ai i vitit 2021. Investimet e brendshme në total, krahasuar me 2021, ulen mbi 20%, kurse investimet e huaja ulen mbi 23%. Projekt-buxheti goditjen më të madhe ia jep infrastrukturës së ujitjes dhe kullimit, financimi për të cilën ulet me mbi 55%! Investime te huaja për infrastrukturen e ujitjes nuk ka fare: nga 100% shkojnë në 0%, krahasuar me 2021! A i ka llogaritur qeveria dëmet që i shkakton fermerëve dhe subjekteve të tjera private, nga mungesa e ujit për vaditje, nga thatësirat e tejzgjatura dhe temperaturat e larta? Apo qeveria mendon se pa investime të huaja në infrastrukturën e ujitjes dhe kullimit buxheti mund të përballojë emergjencën në këtë sektor?! PIKËPYETJET E NJË BUXHETI Që ndihma ndaj bujqësisë të jetë e plotë dhe ajo ta tregojë veten jo vetëm si komardare shpëtimi në vite të vështira, por edhe si motorr i mirëfilltë zhvillimi, fondet për të duhet të shtohen. Që paratë e hedhura për rritjen e përdorimit të teknologjisë së informacionit në sektorë si arsimi dhe shëndetësia të na mundësojnë një rritje të shpejtë dhe përmirësim të shërbimeve kryesore publike. Por..., sa do na duhen këta dy satelitët tregtarë që do të blejmë? Sa do të na kushtojnë dhe a ia vlen shpenzimi për to? Këtë deri tani asnjë nga qeveria nuk di ta thotë. Ne dimë vetëm se buxheti 2022 merr përsipër shumë rreziqe. Po cilat janë këto? Rreziqet fillojnë me Eurobondin e Pestë prej 700 milionë eurosh. Mund edhe të mos marrim kaq para me këtë dalje të pestë në tregjet ndërkombëtare. Qeveria është e gatshme të dalë edhe për herë të tretë në tre vjet, vitin e ardhshëm dhe të emetojë(marrë) edhe një eurobond të gjashtë, nëse nuk i merr të 700 milionë eurot që i duhen me këtë dalje të tanishme. Po për çfarë i duhen? Nuk e thotë. Thotë vetëm frazën e përgjithshme “Këto para duhen për mbështetje buxhetore”. Që nënkupton shumë gjëra. Mund të merret ky borxh për të përballuar faturën e lartë të rritjes së pagave me 6 përqind këtë vit. Mund të merret për bonusin e 680 mijë pensionistëve, i cili duhet të jetë të paktën 100 euro për pensionist(60 përqind e pensionit mesatar tek ne), që të përmbushet premtimi i programit 2021- 2025 të qeverisë, se pensionet do të rriten me 5 përqind çdo vit. Mund të merret për të përballuar defiçitin e jashtëzakonshëm të skemës së pensioneve dhe sigurimeve shoqërore prej 100 miliardë lekësh të reja(825 milionë euro), aq sa i gjithë defiçiti i Buxhetit të Shtetit tonë për vitin e ardhshëm. PPP MOS VDEKSHI KURRE! Eurobondi mund të merret edhe për investimet publike, ku nuk heqim dorë nga 5 PPP të reja, që i kushtojnë Buxhetit me dhjetëra miliona euro. Dhe për 227 koncesionet-PPP që janë aktualisht, të mos harrojmë se për vitin e ardhshëm do të jemi të detyruar të paguajmë për të gjitha ato jo pak, por plot 112 milionë euro detyrime të tyre vjetore. O Zot, sa shumë vrima në buxhet kemi nevoje të na mbulojë ky eurobond! Ç’duhet të bëjmë? SHPRESA E NJË BUXHETI Të shpresojmë tek fiskalizimi dhe ulja e informalitetit, tek përgjegjshmëria dhe mirëadministrimi fiskal? Ndoshta po. Në mënyrë që paratë në buxhetin e shtetit të shtohen dhe të mjaftojnë për të mos e rritur borxhin publik aty ku ai edhe mund të pëlcasë, si një tullumbac i fryrë përtej çdo mase.

Buxheti 5 miliardë euro, si do të shpenzohet dhe nga do t’i gjejë të ardhurat buxheti më i madh në HISTORINË E SHQIPTARËVE?

Nga Fatos Çoçoli

Artikuj të ngjashëm Artikuj

Banka Botërore, “dhuratë” qeverisë para zgjedhjeve

Porti i Durrësit, “han pa porta” për koncesionarët

Tatimet mes Kuçedrës së borxhit e pasaktësive skandaloze

Ulliri i lë “dopio gjashtën” Bujqësisë

KRIZA e BABAGJYSHIT

BUXHETI PA EMËR!

Artikujt më të lexuar

SONDAZHI/ Si ndahen votat për Tiranën e Shqipërinë

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Shpellat e jugut, monumente të braktisura dhe të harruara nga shteti

50 vjet nga Revolta/ SPAÇI – Burgu i komunizmit dhe demokracisë

Të pathënat e ekzekutimit të biznesmenit nga turisti-vrasës

Banka Botërore, “dhuratë” qeverisë para zgjedhjeve

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?