25 vjet nga Tragjedia Otranto, “Titaniku i të varfërve”

Është e dhimbshme të shohësh pamjet që dolën nga zyrat sekrete italiane që tregojnë anijen luftarake “Sibilla” që i bie mes për mes anijes së vogël “Kateri i Radës” me 142 persona në bord. Edhe pse italianët e panë se kishte gra dhe fëmijë në bord, e mbytën anijen shqiptare në 28 mars 1997. 25 vjet nga tragjedia e kanalit të Otrantos, drejtësi nuk ka. Të mbijetuarit nuk kanë marrë dëmshpërblimet, por as dënimet e fajtorëve. Viron Xhavara humbi në këtë tragjedi bashkëshorten Mimoza dhe tre fëmijët, dy binjakë 4 vjeçar dhe vajzën 9 vjeç. Rrëfimi tragjik përmes lotësh dhe kërkesa për autoritetet shqiptare: Në Hagë për krime kundër njerëzimit, e në Strasburg për të drejtën tonë legjitime.

Duart i dridhen, sytë i lotojnë edhe pas 25 vitesh për atë udhëtim të mallkuar që do ta çonte drejt tokës së premtuar, por që rezultoi një udhëtim tragjik. Viron Xhavara, humbi bashkëshorten Mimoza, dy binjakët katër vjeçarë Kamela e Gerard dhe vajzën 9 vjeçare Majlinda. Otranto, për të u kthye në udhëtim drejt vdekjes. Mirë do ishte që ajo fregatë italiane, me emrin e tmerrshëm të një përbindëshi të antikitetit, “Sibila”, ta kishte marrë dhe atë me vete. Të mos e linte të gjallë për të parë pas 25 vitesh sesi enden në kujtimet e tmerrshme shpirtrat e tre të vegjëlve të tij dhe bashkëshortes. Një dhimbje që e lë pa fjalë e veç në lot. Thonë, se edhe loti thahet. Por lotët e Vironit janë si ujët e detit. Vazhdojnë e përpijnë pak nga pak kujtimet e tij, por e lënë të gjallë atë, në përshpirtjen e brendshme me veten dhe miqtë e të afërmit që e rrethojnë, dhe me mendimin që e sëmbon tash 25 vjet sesi dreqin mori “Katerin e Radës” për të ikur drejt Italisë.

Siç tregon ai nëpër intervista, donte të ikte nga lufta civile që kishte pllakosur në vend, për të siguruar jetë më të mirë për familjen e vet, por, padashjen e tij dhe me fajin e rëndë të autoriteteve italiane, i çoi ata në botën e përtejme, atje ku as nuk i takon dot apo të ketë një gur varri, po që gjithmonë takohet me detin e fjalos me vete, sikur të fjalosë me ta.