Turizmi shqiptar mes bukurisë dhe kaosit

TURIZMI SHQIPTAR MES BUKURISË DHE KAOSIT Lajmet e Shqipërisë në mediat ndërkombëtare si një vend me bukuri të rralla natyrore nuk munguan as këtë sezon turistik, por paralelisht me këta artikuj realiteti i turizimit shqiptar duket se po përballet me shumë kontradikta. Turizimi u sfumua këtë vit nga probleme të vjetra si menaxhimi i mbetjeve, furnizimi me ujë të pijshëm dhe infrastruktura rrugore e cunguar, por dhe nga kaosi i dirigjuar nga vetë qeveria- siç është aksioni për prishjen e ndërtimeve pa leje dhe zënien e hapsirave publike. Që të bësh një bilanc të plotë të sezonit turistik do të duhet të presësh publikimin e statistikave që tregojnë hyrjet dhe daljet nga Shqipëria të paktën deri në fund të shtatorit, shfrytëzimin e strukturave akomoduese dhe llogaritë e bilancit të pagesave mbi shpenzimet e turistëve të huaj në vendin tonë. Pavarësisht kësaj, një pjesë e të dhënave të publikuara deri në muajin qershor e japin një pasqyrim ose trend mbi tendencat që paraqet turizimi këtë vit. Numri i të huajve që kanë hyrë në Shqipëri për periudhën janar – qershor rezulton 4.7 milion- shifër më e lartë nëse krahasohet me të njëjtët muaj të një viti më parë ku ishin afërsisht 4.5 milion qytetarë të huaj që hynë në vend, por ritmi i rritjes së turistëve është ngadalësuar. Janë rreth 200 mijë turistë më shumë që kanë ardhur këtë vit krahasuar me 2024-n, por një vit më parë shtesa e të huajve që hynë për të vizituar vendin tonë ishte 1.1 milion më shumë. Rritja e numrit të turistëve krahasuar me 6-mujorin e parë të 2024-s këtë vit është 4.6%, në vitin 2024 rezultonte 25%, në vitin 2023 rritja ishte me normën 24%. Shifrat tregojnë se ky vit paraqitet i vakët krahasuar me boom-in që ka përjetuar sektori vitet e shkuara dhe përveç analizës se çfarë po e fut në stanjacion turizimin, pasiguritë për një performancë më të ulët të këtij sektori gjatë vitit të ardhshëm po rriten. Tabelë 1. NUMRI I VIZITORËVE TË HUAJ NË PERIUDHËN JANAR-QERSHOR 2022 2.553.747 2023 3.396.932 2024 4.543.668 2025 4.761.651 Tabelë 2. NORMA VJETORE E RRITJES SË TURISTËVE PËR JANAR-QERSHOR 2023 24% 2024 25% 2025 4.6% Dhe pse interesi i të huajve që kanë ardhur për të vizituar Shqipërinë është ngadalësuar, numri i netëqëndrimeve për ata që kanë hyrë në vendin tonë është rritur. Të dhënat për shfrytëzimin e strukturave akomoduese të cilat merren përmes një anketimi që kryen Instituti i Statistikave tregojnë se deri në fund të muajit maj janë 1.9 milion netëqëndrimi në hotele, krahasuar me 1.46 milion netëqëndrime në vitin 2024 dhe rreth 1 milion netëqëndrime gjatë vitit 2023. Po ashtu numri i vizitorëe që janë strehuar pranë shërbimeve hoteliere rezulton me të njëjtin trend rritje. Deri në muajin maj janë 916 mijë turistë që kanë shfrytëzuar kapacitetet e hoteliere të vendit, prej të cilëve 622 mijë shtetas të huaj, me një trend mesatar rritje me 30% krahasuar me një vit më parë. Tabelë 3. NUMRI I NETËQËNDRIMEVE NË STRUKTURAT AKOMODUESE PËR JANAR -MAJ 2023 1.018.355 2024 1.465.459 2025 1.897.397 Tabelë 4. NUMRI I VIZITORËVE NË STRUKTURAT AKOMODUESE PËR JANAR -MAJ GJITHSEJ TË HUAJ 2023 511,106 287,007 2024 733,187 480,998 2025 916,348 622,810 Trendi i viteve të shkuara po tregon se një pjesë e tipologjisë së turistëve që po vijnë në Shqipëri nuk bëjnë pjesë në atë që quhet turizëm patriotik (emigrantët që kthehen për të takuar të afërmit), por megjithatë turizmi rajonal dominon pjesën më të madhe të vizitorëve në vendin tonë. Në vendin e parë sa i takon hyrjeve të shtetasve të huaj renditet Kosova, e ndjekur nga Maqedona e Veriut dhe vendet ku kemi emigracionin më të madh, Italia dhe Greqia, pasojnë renditjen në listën e vizitorëve që kanë pushuar në Shqipëri. Aksionet në mes të sezonit turisitik Ndryshe nga sezonet e tjera, këtë vit qeveria kishte në krye të agjendës së saj vendosjen e ligjshmërisë si në ndërtimet pa leje në zonat turistike dhe në prishjen dhe riorganizimin e hapësirave publike në qytete. Simbol i prishjeve të ndërtimeve të paligjshme këtë vit ishte Thethi, ku shumë turistë që kishin shkuar për ta vizituar destinacion u dëbuan nga forcat e policisë. Kontrollet e policisë dhe Inspektoriatit të Mbrojtjes së Territorit nuk u përqëndruan vetëm në Theth, por u përhapën në të gjithë vendin, duke prishur struktura akomoduese, biznese sezonale dhe në disa raste duke nxjerrë vetë turistët jashtë hoteleve. Që futja në shina ligjore e bizneseve të shërbimit dhe disiplinimi i punimeve në ndërtim duhet të jetë fokusi i administratës qëndrore dhe vendore nuk ka nevojë për debat, por momenti i zgjedhur për të dhënë shfaqje të prishjeve të ndërtimeve dhe kontrollove me turma policie në mes të sezonit turistik, nuk diskutohet që ka dëmtuar imazhin e Shqipërisë. Turisti i huaj nuk e di që nëse kthehet pas një viti këto skena nuk do të përsëriten dhe as se kush ka të drejtë: shteti apo operatori privat mikpritës. Për të, si policia si biznesi janë Shqipëria, një vend turisitik për të cilin do të vendosë nëse do të kthehet më dhe do të tregojë nëse ia vlen ose jo ta vizitosh. Qeverisja me aksione, të cilat sidomos kur zgjidhen gjatë sezonit turistik, e dëmton turizmin. Në shumë prej mediave të cilat kanë sugjeruar vizitimin e plazheve të Shqipërisë si desitnacion të verës, theksi ka qënë bukuria e natyrës së virgjër dhe plazheve të bukura. Ndëtimet në kaos pa leje, dhe me një intesitet të lartë gati të çmendur të atyre me leje po shkatërrojnë pa vizion thesarin që vendi ynë ka për të tërhequr turistët dhe për të konkurruar rajonin. Shqipëria duhet të vendosë se cilat pika do t’i mbajë si atraksion turistik elitar, si do të mund të përmirësojë infrastrukturën e shërbimit në bregdetin Adriatik (sepse ndërtimet e shumta të përshtatura për turizëm masiv janë vonë për t’u zhbërë) dhe çfarë raporti do të mbajë në ofrimin e cilësisë dhe çmimit- nëse kjo e fundit dështon, dështon dhe zhvillimi i turizmit të qëndrueshëm. Pë pas, çdo vit operatorët dhe investitorët do të duhet të presin në mëshirën dhe mendjen turistëve rastësorë që do të vendosin nëse do të vizitojnë ose jo Shqipërinë. A ka Shqipëria turizëm të sukseshëm? Që t’ia dalësh të kesh turizëm të suksëshëm dhe raport të drejtë mes çmimit dhe cilësisë, duhet që pamjet e tymit që përfshijnë çdo vit qytetin e Vlorës të mos shihen më. Djegia e landfillit të menaxhimit të mbetjeve në këtë qytet ndodh disa herë në mes të çdo sezoni. Askush që ka paguar për të thithur ajrin me jod dhe klimën e mirë të këtij qyteti nuk do të kishte një vlerësim të mirë për turizmin shqiptar. Problem me menaxhimin e mbetjeve nuk kufizohet vetëm te djegia e landfilleve, siç ndodhi për ditë me radhë dhe në qytetin e Elbasanit. Menaxhimi i mbetjeve renditet në fund të listës së prioriteteve të autoriteteve qendrore, vendore dhe bizeseve. Mjafton të kalosh një ditë përgjatë plazhit të Dhërmiut, një prej zonave që ka çmimet më të shtrenjta dhe mbahet për turizëm elitar, për të parë se jemi larg konceptit të turizmit. Në plazh nuk ka koshë mbeturinash për kalimtarët, ka koshë të tejmbushur për mbetjet e bizneseve dhe bizneset që ndërtojnë hedhin mbetjet në rrugë. Kjo pamje dhe erë e pakëndshme i shitet turistëve me të paktën 300 euro nata! Po nëse kompania private ia ka dalë në një plazh mandej që të mbajë pastër dhe pa mbeturina pjesën e plazhit dhe vilave në Green Coast të Palasës, mungesa e ujit të pijshëm si në këtë kompleks dhe në qytetin e Vlorës ishte një shqetësim i përhershëm i këtij sezoni, që nuk do të kthejë më turistët që provuan këto peripeci. I gjithë jugu është futur në kaosin e ndërtimit, ku nuk dëgjohet më zhurma e valëeve por gurit fleksibël dhe pse ka një vendim të Bashkisë Himarë për të pezulluar punimet. Gjatë qershorit dhe korrikut probleme kishte dhe me ndërprerjen e furnizimit me energji elektrike për shkak të disa stuhive, problem ky i trashëguar ndër vite. Shqipëria ka sfidën e parë në turizëm menaxhimin e sezonit, por kryesoren dhe më jetiken zhvillimin e tij mbi një model të qëndrueshëm ku kërkohet që si shteti dhe biznesi të bëjnë detyrat e tyre. Investimi në infrastrukturë rrugore, ujore, marinash, energjie elektrike etj., që të ofrojë shërbime cilësore, nuk shlyhet asnjëherë me turizëm të lirë masiv si në Durrës, Shën Gjin e Velipojë. Ndaj sot është koha që të zgjidhen zonat për turizmin elitar, dhe ajo që ka mbetur nga bregdeti i jugut jo vetëm të mbështetet me infrastrukturë shërbimesh publike, por të hartohen plane që lejojnë ndërtimet në harmoni me natyrën duke respektuar distancën nga vija bregdetare. Biznesi nga ana tjetër duhet të trajnojë stafin dhe të punojë për të zgjatur sa më shumë sezonin, sepse me turizëm dy, maksimumi tre muaj, çmimet patjetër që do të jenë të larta. Dhe përsa kohë cilësia do të jetë e dobët dhe çmimi i lartë, turistët nuk do t’i kënaqin vetëm bukuritë e natyrës sonë!

Turizmi shqiptar mes bukurisë dhe kaosit

Nga Ola Xama

Artikuj të ngjashëm Artikuj

“ALBANIAN FILES”: 4 çështjet e debatueshme

Gazi që nuk e morëm kurrë!

Mirë nafta, por pse u “cmend” domatja?!

Rivlerësimi i pasurive të patundshme:

Fermeri nga Divjaka, kryeministri dhe importi

7 arsyet ku çalon “Paqja Fiskale”

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Turizmi shqiptar mes bukurisë dhe kaosit

Nga Ola Xama

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?