Shqipëria e varfër, si u projektua Revolucioni i Qershorit

10 vite pas shpalljes së Pavarësisë, shqiptarët ishin shumë më të varfër ekonomikisht, dhe aftësia për shtetformim dukej si një mision i pamundur. Për t’i shpëtuar mjerimit të realitetit, shqiptarët kërkonin mundësi të reja, siç ishte edhe emigracioni drejt Amerikës që mori përmasa të panjohura më parë. Por edhe fuqitë e huaja nuk e lehtësonin punën: pretendimet e Greqisë dhe Jugosllavisë dhe çështje të mbetura pezull sipas tyre, ishin thjesht barriera të reja për qeverinë dhe kuvendin, që kishte jo pak probleme. Problemet fillonin që nga votimi për formën e qeverisjes, nëse Shqipëria do të ishte Republikë apo Monarki, e deri tek menaxhimi i punëve të brendshme për të firmosur kontrata dhe bashkëpunime ekonomike, siç ishte firma mbi marrëveshjen tregtare me kryeministrin italian Musolini.

Grekët nga ana tjetër bënin ç’ishte e mundur për të nënshtruar e poshtëruar popullsinë çame në territorin grek, që donin ta “degdisnin” drejt Turqisë. Fuqitë e mëdha, dergonin komision pas komisioni për të parë se ku do të qëndronin Shën Naumi dhe Vermoshi.