Sfera rrokulliset në Katar, Botëror i zakonshëm në kohë dhe vend të jashtëzakonshëm

Bota e futbollit po mban frymën. Sportdashësit në gjithë rruzullin i kanë drejtuar sytë nga Azia. Në Katar do të zhvillohet Botërori “Qatar 2022”. Një event i zakonshëm që organizohet në një kohë të jashtëzakonshme. Për herë të parë në histori, një kompeticion i tillë do të luhet në dimër, në një vend të vogël siç është Katari. Starton në 20 nëntor dhe përfundon në 18 dhjetor me finalen e madhe. Edhe pse futbolli dhe Kupa e Botës janë të mëdha për këtë shtet, ish-presidenti Joseph Blater i dha të drejtën e organizimit.

Edhe në vendin tonë, emocionet janë të mëdha. Shqiptarët njihen si tifozë të “thekur” me Italinë. Për fatin e keq, Axurrët nuk do të jenë pjesë e këtij Botërori pasi nuk arritën të kualifikoheshin. Afërsia gjeografike ka bërë që italianët të jenë si “Kombëtare” e dytë për ne. Në çdo kompeticion kanë qenë favoritë për të triumfuar. Por, këtë herë skenën e kanë rrëmbyer përfaqësueset më në formë.