Epoka e artë e Silvinjos, por…We want more!

Humbja me Poloninë dhe shansi i humbur për një vend në Botëror kanë rikthyer hijet e dyshimit mbi Kombëtaren shqiptare. A ka ardhur momenti për një “dorë të re” në stol? E ardhmja e Sylvinhos mbetet në udhëkryq, ndërsa Altin Lala analizon një realitet mes arritjeve dhe luhatjeve, duke ngritur mjaft pikëpyetje, por duke i dhënë meritat që i takojnë Sylvinhos që na rriti jashtëzakonisht pritshmëritë. Ka momente kur futbolli i ngjan më shumë një tregimi sesa një loje. Zhurma rritet, pritshmëritë fryhen, emocionet marrin përpara gjithçka dhe në fund, mbetet një ndjesi e paqartë nëse ajo që pamë ishte vërtet aq e madhe sa u duk. Si te romani i Shekspir “Shumë zhurmë për asgjë”, ku gjithçka ndërtohet mbi keqkuptime dhe reagime të ekzagjeruara, edhe rrugëtimi i Kombëtares në këto kualifikuese është shoqëruar nga një valë e fortë reagimesh që herë-herë duket se e tejkalojnë vetë realitetin në fushë. Nga festa e Europianit te zhgënjimi i një nate që u vendos në detaje, narrativa e kuqezinjve është luhatur mes dy poleve: optimizmit dhe dyshimit. Një humbje ndaj Polonisë duke humbur shansin e artë për Botëror mjaftoi për të ngritur pikëpyetje të mëdha: për trajnerin, për grupin, madje edhe për drejtimin që po merr skuadra. Por sa nga këto janë reflektim i një problemi real dhe sa janë thjesht produkt i emocioneve të momentit? Në këtë sfond, Altin Lala ofron një këndvështrim më të qetë enkas për revistën Neësbomb, më të filtruar nga përvoja. Ish-kapiteni i kuqezinjve nuk e sheh këtë rrugëtim të shkëputur nga ajo që është arritur më parë, por si pjesë e një procesi që ka uljet dhe ngritjet e veta, duke treguar edhe kohën e De Biasit. Mes analizës dhe sinqeritetit, Lala prek disa nga temat më të debatueshme të momentit: identitetin e skuadrës, ndikimin e trajnerit dhe atë që mund të vijë më pas për Kombëtaren shqiptare. Polonia, pengu i madh Humbja ndaj Polonisë riktheu zhgënjimin, por për Altin Lalën analiza nuk nis nga ajo ndeshje. Përkundrazi, ai e vendos gjithçka në një kornizë më të gjerë: “ Ecuria e Kombëtares, grupi që ishte dhe arritjet deri në fazën ‘Play Off’, ishte diçka e jashtëzakonshme për mendimin tim ”. Në këtë rrugëtim, ai sheh edhe peshën e kundërshtarëve dhe kontekstin, duke kujtuar se “ pritshmëria është rritur ”, por gjithsesi “ unë e shoh pozitiv këtë rrugëtim ”. Madje, ndalet edhe te disa momente kyçe të këtij cikli: “ duke lënë pas edhe Serbinë, që ishte një kundërshtar i fortë dhe një histori më vete në të… ishte arritje e madhe fitorja me të ”. Por në fund, gjithçka përmblidhet te ajo përballje vendimtare: “ Ajo ndeshje me Poloninë u vendos nga episode dhe ndoshta nga gabime individuale ”. Kombëtare me identitet, por e presionuar Në një moment kur Kombëtarja shihet si e paqëndrueshme, Lala nuk bie dakord me këtë perceptim. “ Mendoj se kjo skuadër e ka identitetin e vet ”, thotë ai, duke rikujtuar se “ arriti të shkonte në Europian, bëri të jashtëzakonshmen duke shkuar në fazën ‘Play-Off’ të Botërorit ”. Megjithatë, ai e lidh performancën edhe me kontekstin emocional dhe presionin që shoqëron ndeshje të tilla. “ Ndeshja u fry shumë. Gjithë ai publik që kishte ardhur për atë ndeshje… ishte temë diskutimi kudo ”, shpjegon ai, duke shtuar se “ domosdo mbart me vete edhe emocionet për lojtarët. Natyrisht kanë presion ”. Futbolli i ‘nëse’-ve dhe vendimeve Analiza kalon natyrshëm te zgjedhjet nga pankina. Lala e pranon se futbolli ushqehet nga debatet: “ Prandaj futbolli është i bukur se secili ka mendimin e vet. Me një vendim që merr ose nuk merr trajneri, nxitet debat ”. Ai sjell edhe disa shembuj konkretë: “ Mendoj se zëvendësimet duhet të ishin bërë më përpara… Ismajli është një lojtar që po luan në Seria A. Mendoj se duhet të ishte futur nga minuta e parë ”. Por menjëherë e relativizon gjithçka: “ Nëse do të kishte shënuar gol Pilo, do të thonin të gjithë: ‘Ëoë çfarë lëvizje ka bërë’. Kështu është futbolli. Fituesi shkruan historinë ”. Në fund, gjithçka reduktohet te detajet: “ Bajrami dhe Strakosha ndoshta mund të kishin bërë pak më mirë. Këto episode vendosën ”. Progres me pak pengje Në bilancin e përgjithshëm, ish-mesfushori nuk ka dyshime: “ Në total, arritja e Kombëtares… është pozitive ”. Ai kujton edhe dimensionin emocional të suksesit: “ Gjithë ajo festë, ai Europian që u zhvillua në Gjermani, unë e shoh pozitive ”. Megjithatë, ndjesia e humbjes së një mundësie mbetet e fortë: “ Mendoj që ndeshjen me Poloninë mund ta kishim fituar… edhe Polonia nuk ishte në ditët e veta më të mira. Kjo mbetet pak peng ”. Forma mbi emrin Një nga temat e rëndësishme mbetet aktivizimi i lojtarëve në klube. Për Lalën, kjo është një çështje komplekse: “Kjo varet nga shumë faktorë. A aktivizohen apo jo në klubet e tyre. Emrat nuk vlejnë vetëm në letër ”. Megjithatë, ai sjell edhe kundër-shembuj pozitivë: “ Hysaj në 6-7 ndeshjet e fundit ka qenë një nga më të mirët… tregon që kur je i gatshëm për Kombëtaren, pavarësisht minutave, ti mund ta bësh diferencën ”. Jo inferiorë, por me luhatje Në krahasim me të kaluarën, Lala sheh një ndryshim të madh. “ Kemi qenë edhe më inferiorë… tani qasja ka ndryshuar ”, thotë ai, duke shtuar qartë: “ inferiorë nuk jemi ”. Por problemi është diku tjetër: “ Ndoshta të pasigurtë ose diferenca, pak luhatje për rendiment konstant ”. Lala e zgjeron këtë si një tipar rajonal: “ Ky është problem i ballkanasve në përgjithësi… ne jemi pak më emotivë ”. Dhe e përmbyll me një shprehje tipike: “ ne shqiptarët ‘djegim jorganin për një plesht ’”. Sylvinho, mes suksesit dhe konsumimit Diskutimi për pankinën është i pashmangshëm dhe përfshin drejtpërdrejt Sylvinhon. Lala është i qartë për meritat: “U në e quaj të suksesshëm sepse kemi shkuar në Europian dhe në gjysmëfinale të Play-Off. Të jemi të sinqertë, ë ”. Por në të njëjtën kohë, ai shpreh një rezervë të fortë: “ Megjithatë mendoj se cikli i Sylvinhos ka përfunduar… edhe trajnerët konsumohen. Ndoshta Sylvinho nuk e ka më energjinë që e ka pasur nga fillimi ”. Zgjedhjet dhe emrat që presin më shumë Në analizën e tij, Lala ndalet edhe te lojtarë konkretë dhe mënyra si janë menaxhuar në momente kyçe. “ Mendoj se Muçi do të kishte merituar të luante dhe më shumë… madje edhe titullar ”, thotë ai, duke nënvizuar se bëhet fjalë për një futbollist me potencial të dukshëm. Megjithatë, nuk kursen as pritshmëritë: “ prisja nga ai edhe më shumë ”. Për Lalën, në nivele të tilla nuk mjafton vetëm talenti, por edhe aftësia për të bërë diferencën në kohë të kufizuar. “ Kur ke cilësi të veçanta, mund të bësh diferencën… minimalisht duhej përfshirë në fillimin e pjesës së dytë ”, shton ai, duke e lidhur këtë me nevojën për më shumë guxim dhe besim te elementët kreativë. Një trajner me ‘dorë të fortë’ Kur vjen fjala te e ardhmja, ideja e Lalës është e prerë dhe e artikuluar qartë. “ Besoj se Shqipërisë i duhet një trajner… ta ketë ‘dorën e fortë ’”, shprehet ai, duke nënkuptuar një figurë autoritare që vendos rregull dhe disiplinë në grup. Ai e lidh këtë drejtpërdrejt me eksperiencat e mëparshme të Kombëtares: “ Ne shqiptarëve… na duhet një dorë e hekurt ”. Sipas tij, vetëm një profil i tillë mund të krijojë qartësi në role, stabilitet në performancë dhe një grup më të konsoliduar në momentet vendimtare. Sylvinho, besnik i emrave Një tjetër element që Lala prek është marrëdhënia e trajnerit me grupin dhe besimi ndaj disa emrave të caktuar. “ Sylvinho, shumë ‘besnik’ me emrat e tij… është e vërtetë kjo ”, pranon ai, duke nënvizuar një tipar të dukshëm në menaxhimin e skuadrës. Por kjo qasje nuk vjen pa pasoja: “ Në fund të ditës, koston e mbajnë vetë ata ”. Në këtë këndvështrim, besnikëria mund të kthehet në kufizim nëse nuk shoqërohet me fleksibilitet dhe meritokraci të vazhdueshme. E ardhmja pa revolucion Pavarësisht kritikave dhe debatit të ndezur, Lala nuk sheh nevojë për ndryshime rrënjësore. “ Jo, nuk besoj dhe nuk duhet të ndodhë diçka e tillë ”, thotë ai, duke refuzuar idenë e një “ revolucioni ”. Sipas tij, Kombëtarja nuk funksionon si një klub me strukturë të qëndrueshme, por varet nga forma e momentit e lojtarëve. Prandaj, rruga e duhur mbetet ajo e përmirësimeve graduale, duke u mbështetur te meritokracia dhe integrimi i elementëve në formë. Talenti dhe puna e përditshme Kur flet për të rinjtë, mesazhi i Lalës është i drejtpërdrejtë dhe pa kompromis. “ Duhet të punojnë sistematikisht, çdo ditë… mundi gjithmonë shpërblehet ”, thekson ai, duke e parë punën si elementin kyç për zhvillim. Por ai ndalet edhe te një problem më i thellë: “ Lojtarët në Ballkan kanë luhatje të mëdha” . Pikërisht këtu, sipas tij, qëndron diferenca mes potencialit dhe realizimit të tij në nivele të larta. Presioni dhe realiteti i futbollit modern Në një ambient ku çdo ndeshje shoqërohet me reagim të madh publik, presioni është i pashmangshëm. “ Kjo është pjesë e sportit… mediet gjithmonë bëjnë punën e vet ”, thotë Lala, duke pranuar rolin e tyre në rritjen e interesit dhe tensionit rreth ekipit. Ai nuk e mohon ndikimin emocional te lojtarët, por rikthen fokusin te ajo që vendos gjithçka: “ Energjia që ka grupi paraqitet më shumë në fushë ”. Në fund, performanca mbetet matësi i vetëm real. Lala i De Biasit dhe Shqipëria "braziliane" " Shiko, t'i japim meritat që i takojnë Sylvinhos. Na bëri të besojmë përtej mundësive që shquanim më parë. Për mua është ecuri e jashtëzakonshme. Të shkosh në Play-Off të Botërorit, është e jashtëzakonshme ", thotë fillimisht ai duke u ndalur më pas dhe te koha kur ishte pjesë e Shqipërisë. "U në jam pjesë e lojtarëve të tranzicionit, me grupin e De Biasit. Ai ishte i fortë, tipikisht ajo dora e hekurt që ne shqiptarët kemi nevojë, të na shkundë disi ", tregon ish kapiteni duke bërë edhe krahasimin me Sylvinhon: " Na befasoi. Mori për herë të parë një lojtar si Asani. Shkëlqeu dhe bëri gjysmën e punës për europianin. Futi një energji të jashtëzakonshme në grup, asnjëherë polemizues ". Brenda grupit dhe përtej tij Sa i përket atmosferës së brendshme, Lala tregohet i kujdesshëm, por nuk i shmanget temës. “ Kam dëgjuar zëra që atmosfera në grup nuk është shumë e mirë ”, pranon ai, duke nënvizuar se këto janë situata që i përkasin më shumë menaxhimit të brendshëm. Sipas tij, roli i drejtuesve dhe stafit është vendimtar për të ruajtur ekuilibrin dhe fokusin e grupit në objektivat sportive. Trajner i ri?! Në fund, kur vjen fjala te pankina, Lala nuk mbetet vetëm te analiza, por jep edhe një ide konkrete. “ Ndoshta Cannavaro mund të ishte trajneri i duhur” , shprehet ai, duke e lidhur këtë me eksperiencën dhe profilin e tij. Megjithatë, rikthehet te thelbi i rolit: “ Trajneri i Kombëtares më së shumti duhet të jetë një selektor që zgjedh futbollistët e duhur ”. Dhe për ta zbutur seriozitetin e analizës, e mbyll me një buzëqeshje: “ E përsëris Cannavaro sepse ne i kemi dhe pak xhan italianët ”. "Silvio" i Shqipërisë Rrugëtimi i Sylvinhos në krye të Kombëtares nuk mund të reduktohet te një mbrëmje e vetme. I shqiptarizuar si "Silvio", ai ka ndërtuar një cikël që, mes uljeve dhe ngritjeve, ka prodhuar rezultate dhe mbi të gjitha ka rritur standardin e pritshmërive. Fitorja ndaj Polonisë për kualifikueset e Europianit, përballjet me Çekinë në një rrugëtim europian që riktheu besimin, apo edhe suksesi ndaj Serbisë në eliminatoret e Botërorit, janë fragmente të një historie që dëshmon se kjo skuadër ka mësuar të konkurrojë ndryshe. Kualifikimi në Europian dhe më pas ngjitja deri në “Play-Off” të Botërorit nuk janë vetëm objektiva të arritur, por sinjale të një skuadre që ka dalë nga kompleksi i inferioritetit dhe ka hyrë në një fazë ku kërkon më shumë. Dukshëm, Sylvinho ka ndërtuar një skuadër ku të gjithë besojnë, një ekip që të gjithë synojnë ta shohin në stadiume. Si në çdo ngjarje, padyshim që opinioni do të ndahej në dy kahe. Por, faktet janë të shkruara dhe janë ato që nuk lejojnë të shohësh ndryshe. Në 34 ndeshje, ai regjistron një përqindje fitoresh prej 44%, me një mesatare 1.18 gola të shënuar dhe vetëm 0.88 të pësuar për ndeshje. Shifra që flasin për një skuadër më të balancuar, më pragmatike dhe më të vështirë për t’u mposhtur, një profil që reflektohet edhe në arritjet konkrete, si kualifikimi në Europian dhe ngjitja deri në “Play-Off” të Botërorit. Sylvinho vs De Biasi Në planin krahasues, emri i Sylvinhos vendoset natyrshëm përballë atij të Gianni De Biasi, trajnerit që firmosi kualifikimin e parë historik në Europian. Statistikat flasin për dy profile të ndryshme, por me peshë të ngjashme në historinë e Kombëtares. Sylvinho numëron 34 ndeshje në stol, me 15 fitore, 7 barazime dhe 12 humbje, ndërsa bilanci i golave është 40 të shënuar dhe 30 të pësuar. Nga ana tjetër, De Biasi drejtoi Shqipërinë në 51 ndeshje, duke regjistruar 19 fitore, 10 barazime dhe 22 humbje, me 54 gola të shënuar dhe 52 të pësuar. Nëse italiani mbetet arkitekti i një suksesi historik me kualifikimin në Europian, braziliani ka arritur ta çojë Kombëtaren një hap më tej në aspektin e vazhdimësisë, duke e vendosur edhe në “Play-Off” të Botërorit dhe duke i dhënë një tjetër dimension konkurrues skuadrës. De Biasi ndërtoi themelet dhe i dha skuadrës identitet, Sylvinho duket se e ka rafinuar këtë projekt, duke rritur efikasitetin dhe stabilitetin në fushë. Dy trajnerë, dy kontekste të ndryshme, por një vijë e përbashkët progresi që e ka afruar Kombëtaren gjithnjë e më shumë me nivelet ku sot kërkon të qëndrojë.

Epoka e artë e Silvinjos, por…We want more!

Retin TOKA

Artikuj të ngjashëm Artikuj

DY PËR HISTORINË

Vajzat e historisë kuqezi në play-off të Botërorit

Miliona në kosh

Mes ëndrrës dhe rënies

6 vite pritje për 100 ditët e Ramës

Qeveria e futbollit 7.0

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Epoka e artë e Silvinjos, por…We want more!

Retin TOKA

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?