Lojrat Olimpike gradojnë dy rusë në “Kolonelë” shqiptarë

Zhurma ishte e madhe. Optimizmi i skuadrës olimpike shqiptare kishte arritur kufijtë e propagandës politike. Për një moment dhe unë nisa të besoj se do të kishim paraqitje dinjitoze si kombëtarja shqiptare në Europian. Por, aty u ndala. M’u kujtua se si Komiteti Olimpik Kombëtar Shqiptar nuk i njihte kuqezinjtë, kishte përjashtuar nga federatat anëtare atë që na bëri krenarë, lartësoi emrin “Shqipëri” në sytë e gjithë botës, pikërisht në lojën më të ndjekur në botë, në futboll. Problemet e brendshme do të duheshin të adresoheshin në zyrat e botës. E detyruar prej ngërçit të krijuar, FSHF-ja kërkoi zgjidhje në Lozanë ku doli e fituar. Juridikisht, Asambleja e Parë për zgjedhjen e presidentit të ri është shpallur e pavlefshme. Ligjërisht, Komiteti nuk duhet të ketë një kryetar. Megjithatë, si në çdo punë, edhe në zyrat e shumë sporteve puna “vlon”, pak i nxehti e shumë nga kryesia që shpejton të reklamojë fasadën e KOKSH-it.

E ndërsa afroheshin ditët e Lojërave Olimpike që do të zhvilloheshin në Paris, në mendje më ishte ngulitur një dalje në televizion e Fidelit Yllit. Ish politikani, tashmë në krye të sportit, tregonte se si revista e tyre ishte e një standarti jashtëzakonisht të lartë. Pasi “ledhatoi” e lartësoi ekipin përfaqësues olimpik, tha: ” Revista ka çip NFC, ja afroni telefonin, të shfletohet edhe elektronikisht direkt në brouser”. Natyrshëm, pyetja e parë që të vjen në mendje është: Po sikur ato para të investoheshin në infrastrukturë e të kishim diçka më modeste për reklamim? Sepse sporti nuk është biznes që do PR, por do punë dhe fakte që tregohen në arenën e lojtarëve. Vetëm në këtë mënyrë, krenaria jonë e vetme, Luiza Gega nuk do të degdisej cep më cep të Shqipërisë për të zhvilluar pasionin e saj. Ndoshta nuk do të kërkonim sportistë nga shtete të tjera, që na u vetëofruan atëherë kur bota u bëri dalje për shkak të strategjive politike të udhëheqësve të tyre. Do t’i kishim “bio” tanët dhe shumë të rinj nuk do të drejtonin sytë nga Europa për të arritur objektivat e veta.