KUR ARTISTI RRËFEN DHUNËN/ Serbia e ka humbur Kosovën që në 1989-ën

Një ndër të paktët artistë serbë që ka kërkuar njohjen e Kosovës nga vendi i tij, Dejan Atanackoviç tregon se “duhet përcaktuar pozicioni i Serbisë në raport me realitetin, me Europën, Kosovën dhe duhet të përcaktojë vendin e vetë në raport me kulturën”.

“Shumë çështje janë ngritur deri më sot, mbi të gjitha çështja e Kosovës, për të cilën deputetët e opozitës do të duhet të deklarohen njëherë e përgjithmonë, ose të konfirmojnë pjesëmarrjen e tyre frikacake të kahershme politike, intelektuale dhe morale, ose të mbajnë qëndrim bazuar në realitetin dhe interesin real të shtetit dhe të pakicës serbe në Kosovë”, kështu deklaronte dy vite më parë artisti serb Dejan Atanackovic në një intervistë për mediumin opozitar serb NOVA. Ishte një mendim e thirrje jo shumë e zakontë sidomos nga një serb, por ai është artisti, dhe siç më thotë kur e takoj në Tiranë, artisti është gjithnjë opozitar, është i revoltuar, kërkon të ndërtojë një vepër të bukur, qoftë kjo edhe vetë jeta me kaosin që të ofron.