Suksesi i një viti! Aulon Naçi, një partiturë në ndërtim!

Në korridoret e Teatrit Kombëtar të Operas dhe Baletit, 2025 ka qenë një vit tranzicioni, sfidash dhe provash force për një institucion që mban mbi supe historinë e artit skenik. Aulon Naçi mori drejtimin e Teatrit Kombëtar të Operas dhe Baletit në një moment delikat, në prag të një viti zgjedhor, kur shumë procese ngadalësohen dhe vendimmarrjet shtyhen. Por, mes kufizimeve burokratike dhe pritshmërive të larta, ai zgjodhi të nisë nga ajo që e njeh më mirë, vizioni afatgjatë, edukimi dhe ndërtimi i urave.

Brenda dymbëdhjetë muajve, TKOB ka qenë një skenë shfaqjesh, dhe një hapësirë formimi. Master-class-e me emra të njohur ndërkombëtarë, të ofruara falas për artistët e rinj; produksione të realizuara tërësisht nga struktura e brendshme e teatrit; një Ansambël me salla të mbushura plot dhe një kalendar që shtrihet përtej kufijve. Bashkëpunimet me institucionet arsimore dhe qasja për të hapur dyert e operës për fëmijët dhe studentët kanë krijuar një energji të re. Ndoshta lajmi më inkurajues dhe interesant është fakti se publiku i operës në Tiranë është në një moshë të re, gjë që tregon afrimin e tyre në njërin prej institucioneve më të rëndësishëm të artit në vend.