Final CountDown për ekipet e superligës

Telefoni zinte. Në Federatën Shqiptare të Futbollit kishin vendosur të bënin një ndryshim rrënjësor për sezonin e ri. Zhurma e krijuar të kujton komedinë e famshme të William Shekspirit, që në fund nuk ndodhi asgjë e re, përkundrazi. Që në qershorin e vitit 2023, Njësia e Inteligjencës së UEFA, (UEFA Intelligence Center) pas kërkesës së qeverisjes së futbollit shqiptar, u vu në lëvizje për të parë skemën aktuale të kampionatit shqiptar, dhe si organizata më e madhe organizative, pse jo, të sillte ide dhe propozime më të qarta për riorganizimin e saj, me disa synime, ndër më kryesoret, me idenë e maksimalizimit qoftë edhe financiar të saj. E mandej, dëshira për të pasur më shumë ndeshje që mund të sillnin të ardhura të konsiderueshme, ishte po ashtu në fokus. Këto të ardhura, në fund, do t’u shpërndahen vetë klubeve pjesmarrëse. Padyshim, në organizimin e një dokumenti konfidencial që mbërriti në zyrat e FSHF, morën pjesë edhe shumë ekspertë shqiptarë, apo përfaqësues klubesh, që iu kërkua mendim se ku është futbolli shqiptar sot, dhe cilat do të ishin pritshmëritë për të ardhmen. Skema e sezonit të kaluar Në Europë, mënyra e organizimit është e ndryshme. Kampionati shqiptar ishte i organizuar me 10 ekipe në Kategorinë Superiore, e si ky organizim, UEFA numëron plot 14 shtete të tjera. Ndërsa vende si Anglia, Spanja, Franca apo Italia, që kryesojnë kurbën e futbollit europian, prezantohen me 20 ekipe në superligë. Organizimi me 10 ekipe në superiore dhe 4 raunde, është më i zakonshmi në Europë, përveç dy organizatave, Armenisë dhe Ishujt Faraoe që kanë 10 ekipe por organizohen me tre raunde gjatë sezonit kalendarik. Pas një studimi serioz se çfarë ka ndodhur gjatë viteve të kaluara, si ka qenë pritshmëria dhe çfarë kanë deklaruar aktorët dhe subjektet e përfshira, një ndër variantet e propozuara, në 4 të tilla, ishte edhe skema Final Four. “4 skuadrat në krye, do të kualifikohen për një sistem të ri play off ku do të vendoset edhe për kampionatin. Me këtë skemë, ndeshjet do të jenë më relevante dhe më emocionuese. Edhe për këtë, ka disa variante për t’u diskutuar” shkruante UEFA në dokumentin prezantuar autoriteteve. Padyshim si çdo skemë e re, edhe kjo për UEFA dhe FSHF do të kishte rrisqet e saj, madje, dhe ashtu sikurse po ndodh, fansat dhe tifozët mund ta hidhnin poshtë idenë nisur edhe nga një sistem i vendosor tanimë. Ashtu sikurse ekzistonte rrisku se ekipet që kanë një database me shumë fansa, mund të mos kualifikoheshin për në Final Four. Por në çdo rast, sa më shumë kalojnë javët e kampionatit, aq më i fortë bëhet ai për të kapur një vend në Final Four. Dhe aq më shumë shtohet interesi për të qenë në krye e pjesë e katërshes që do të përfaqësojë futbollin shqiptar në Europë. Revista Newsbomb.al do të bëjë një analizë të gjerë për këtë skemë të re, ku nuk do të mungojë as mendimi i profesorit të njohur Artan Shyti. Cilat kanë qenë përfitimet, sfidat, por edhe pasojat e kësaj skeme të re? “Final Four”, moduli i ri për futbollin shqiptar Implementimi i “Final Four” në futbollin shqiptar, kërkon kohën e mjaftueshme për të parë të metat dhe të mirat që mund të ofrojë. Shumë aludime, qindra tifozë që ende nuk e kanë kuptuar se çfarë ofron ky modul. Federata Shqiptare e Futbollit ka zgjedhur këtë sistem për të afruar sa më shumë tifozët në shkallët e stadiumit. Atëherë në fund të edicionit, do të bëhet një short me dy vazo. Në vazon A do të jenë vendi i parë dhe vendi i dytë. Në vazon B renditen vendi i tretë dhe vendi i katërt. Ekipet pjesëmarrëse në grupin e parë kualifikohen në finale dhe me një barazim. Sektori i Garave pranë FSHF-së ka vendosur të zhvillohen dy finale: Finalja e Madhe dhe Finalja e Vogël. Në Finalen e Madhe, fituesi merr titullin kampion dhe shkon në Champions League. Skuadra tjetër e Finales së Madhe shpallet i dyti dhe merr pjesë në Conference League. Ndërsa fituesi i Finales së Vogël shkon në Conference League. Skuadra e katërt, pra finalistja e Finales së Vogël nuk kualifikohet në Europë, përveç në rastet kur fitues i Kupës së Shqipërisë është një nga katër skuadrat finaliste. Qëndrimi i klubeve për skemën e re “Jam kundër; Më pëlqen; Kam dyshimet e mia”, këto ishin disa nga deklaratat më të zakonshme nga njerëzit që investojnë dhe punojnë çdo ditë në futbollin shqiptar. Presidentët u pozicionuan duke dhënë mendimet e tyre, mirëpo kishin besim te ekspertët që vendosën e votuan ndryshimin rrënjësor. Dalëngadalë jemi drejt fundit të kampionatit, aty ku kryesimi nuk ka vlerë dhe katër skuadrat e para do të luftojnë për titullin kampion. Në një moment kur supozohej që Tirana dhe Partizani të ishin kryefjalë e edicionit, potencialisht bardheblutë rrezikojnë të jenë pjesë e top katërshës. Natyrshëm lind pyetja: Si do të mbushet “Air Albania” në fund të sezonit nëse do të mungojë një nga ekipet me tifozërinë më të madhe në Shqipëri? Megjithatë çdo e keqe e ka një të keqe dhe shkallë-shkallë do të analizojmë atë që po ndodh në këtë sezon futbollistik. Përfitimet e "Final Four" Në hapat e parë, skema e “Final Four”, shfaqi disa përfitime potenciale. U mendua se do të krijonte një atmosferë të ngrohtë gjatë kampionatit, por edhe të tensionuar në fund. Kësisoj do të sigurohej pjesëmarrja në garë për titullin kampion, e cila do të ishte më emocionuese dhe për tifozët. Po ashtu, ky model ofronte dhe një platformë të re për eksponimin e talentit të ri gjatë sezonit duke promovuar një kulturë të re të futbollit. Performanca në momente vendimtare do të shpërblehej në mënyrën e merituar. Edhe profesori Shytaj, si njohës i mirë i sportit në përgjithësi dhe futbollit në veçanti e vlerëson me notë pozitive skemën “Final Four”. “ Formula është pak e vështirë të vlerësohet me një notë. Megjithatë për vijueshmërin e kampionatit deri në fazën finale nuk besoj se merr notë ngelëse. Ndërsa për përcaktimin e ekipit kampion, besoj se komponeti i rastësisë është më i madh seç duhet. Besoj se do të duhej që ose të ruhej një pjesë e pikëve të marra ose të bëheshin më tepër ndeshje për të përcaktuar kampionin. Sidoqoftë kjo është formla e votuar nga klubet që janë aktorët e këtij kampionati dhe vendimi i tyre duhet respektuar, ashtu siç edhe duhet bërë një analizë në fund për të parë nëse u arritën objektivat dhe ia vlen të mbahet kjo formulë në të ardhmen ”, thotë Shyti në analizën e tij. Sfidat dhe kontestet në sezonin futbollistik Implementimi i skemës së "Final Four" nuk ka kaluar pa sfida. Një nga ngërçet kryesore ishte mungesa e një përgatitje të mjaftueshme dhe konsultimet me klubet e aktorët e tjerë të futbollit të zbatimit të saj. Kjo bëri që disa prej tyre të mos jenë përgatitur për t'u përshtatur në kohë dhe për të shkaktuar debat në mesin e komunitetit futbollistik. Gjithashtu, mungesa e një qasjeje konsistente në selektimin e skuadrave që do të jenë pjesëmarrëse në fazën e fundit e ka bërë këtë proces të përballueshëm me kritikë dhe dyshim nga ana e tifozëve dhe mediave. Javë pas jave është vënë re që stadiumet kanë qenë të boshatisura. Mirëpo për këtë Shyti jep arsyet kryesore duke e hequr faturimin nga skema e re: "Final Four" ka ndikim në prezencën e tifozëve, por nuk është kjo skemë shkaku i mungesës së tyre. Besoj se shkaqet kryesore janë dy: Besueshmëria e lojës. Për fat të keq, ajo është ende në nivele të ulëta dhe bëhen përpjekje të pamjaftueshme për të rritur atë. Së dyti, puna aktive për të sjellë spektatorët në stadium. Tifozët vijnë nëse punohet me mjete të larmishme për sjelljen e tyre. Merrni rastin e Bashkisë Shkodër në ndeshjen me Tiranën që u impenjua dhe solli 10 mijë spektatorë. Ka shumë forma që kjo mund të bëhet dhe të funksionojë ". Interesi i ulët për Superligën Nëse qëllimi kryesor për "Final Four" ishte rritja e numrit të tifozëve të pranishëm në shkallët e stadiumit, duhet thënë që kjo nuk ka ndodhur. Javë pas jave jemi ndeshur me një situatë të zymtë, ku sportdashësit numërohen me gishtat e dorës. Veç Shkodrës, që në këtë edicion ka kuruar "sëmundjen" e sezoneve të shkuara, të gjithë klubet e tjera kanë pasur "firo" në numrin e mbështetësve në shkallët e stadiumeve. Mund të përmendim edhe përballjen vitrinë të kampionatit shqiptar, Tirana - Partizani. Nëse sezonin e shkuar pati një "sold out" për këtë supersfidë të kryeqytetit, këtë vit drejtuesit të hapin katet e dyta vetëm në momentet e fundit. E thënë ndryshe, nëse vjet shiteshin rreth 17-18 mijë bileta, këtë edicion maksimumi ka qenë 10 mijë tifozë të pranishëm. Por, çfarë ka ndodhur me dy tifozëritë elitë të futbollit shqiptar? Jo domosdoshmërisht është problem i modulit të ri. Besueshmëria ndaj lojës në fushë, por edhe problemet sociale të përditshme kanë ndikuar jo pak në praninë e tifozëve. Edhe profesor Shyti ndan të njëjtin mendim duke u shprehur: " Interesimi për një ndeshje apo disa ndeshje nuk lidhet me modulin. Duhet të krijojmë një ambient pozitiv rreth sportit në përgjithësi dhe futbollit në këtë rast sepse përvoja ka treguar që njerëzit vijnë. Po iu kujtoj ndeshjen e Elbasanit me Bylisin apo ndeshjet e tjera të Elbasanit brenda. Për se vijnë gjithmonë tifozët në këto ndeshje? Mjafton të bëhet një analizë më serioze. Dhe këtu po çel një parantezë të rëndësishme. Futbolli i ka të gjitha mundësitë që të ndërmarrë studime të mirëfillta të fenomenit spektatorë për të kuptuar sjelljen dhe qëndrimet e tyre gjatë kampionatit kombëtar. Dhe jo vetëm për këtë fenomen, por edhe për të tjerë elementë të funksionimit. Kërkimi dhe studimi janë mjetet e vetme që zhvillimi i mëtejshëm i futbollit të bëhet mbi baza serioze dhe objektive ". Titulli në ADN, Tirana dhe Partizani në rrezik Siç e cekëm dhe më sipër, Tirana dhe Partizani rrezikojnë seriozisht titullin kampion në këtë sezon futbollistik. Nëse të kuqtë kanë oshilacione dhe në përballje të caktuara kanë treguar se janë ekipi për t'u mposhtur, e njëjta gjë nuk mund të thuhet për bardheblutë. Skuadra më e titulluar në vend është jashtë katërshes dhe rrezikon "Final Four", e përkthyer ndryshe në dëm të madh ekonomik për shkak të mungesës në kompeticionet europiane. " Nëse skuadra si Partizani apo Tirana nuk do të jenë në ndeshjet fianle, kjo duhet të vijë si rezultat i performancës së tyre të pamjaftueshme. Ashtu siç edhe prania e tyre duhet të jetë fryt i meritës. Futbolli është sport demokratik dhe emrat kanë rëndësi, por nuk janë vendimtarë. Vendimtare është efikasiteti i investimit dhe performancës ", thotë fillimisht në analizën e tij Shyti. Një problem madhor në vendin tonë nuk qëndron nga mënyra se si Federata Shqiptare e Futbollit menaxhon garën, por se si klubet menaxhojnë veten e tyre. Rrogat e pashlyera prej vitesh dhe mbartja e borxheve është shndërruar në një gangrenë të vërtetë duke ndikuar thuajse çdo sezon futbollistik. Si mund të zgjidhet kjo? Profesor Shytaj propozon një "recetë": " FSHF duhet të garantojë që kontratat mund të mbulohen me financat e klubeve. Kjo është shumë e rëndësishme sepse një klub që nuk ka mbulim financiar të kontratave që harton, nuk kompromenton vetëm funksionimin e tij, por të gjitha aktivitetit. Duket sikur tolerimi është në dobi të klubeve, por në planin afatgjatë nuk besoj se kjo ka ndikim pozitiv në seriozitetin dhe objektivitetin e garës ". Pasojat e "Final Four" " Unë mendoj që kjo formulë, as nuk zgjidh dhe as nuk penalizon në vetvete mbarëvajtjen e kampionatit. Unë nuk besoj se formula është zgjidhja e të gjitha problemeve ashtu siç nuk besoj se është formula që krijon probleme. Kjo skemë ka elementët e saj pozitivë dhe jo aq pozitivë. Pastaj në sport askush nuk mund të përcaktojë paraprakisht se cila skuadër do të jetë në krye të klasifikimit. Dhe pikërisht në këtë mungesë parashikimi qëndron dhe elementi thelbësor i funksionimit të sportit. Kush mendon apo vepron për të përcaktuar rezultate apo ekipe fituese pa top në fushë, praktikisht ka marrë pjersë në ekzekutimin me vdekje të futbollit ", ky është mendimi i Artan Shytit, njohës i mirë i sportit në Shqipëri, Pedagog prej 30 vitesh në vendin tonë, ku ka provuar të jetë dhe në struktura drejtuese të klubesh futbolli në elitë. Janë luajtur vetëm 28 javë kampionat dhe ende jemi më shumë se dy muaj larg përfundimit të sezonit futbollistik. E megjithatë pasojat që ka sjellë kjo skemë, tashmë nuk mund të zhbëhen. Ulja e interesit të tifozëve për të ndjekur skuadrën e zemrës është e dukshme. Siç e kemi përmendur dhe më lart disa herë, mungesa e mundshme e Tiranës në këtë fazë të garës, do të sjellë pasoja në arkën e klubit bardheblu. Veç shkodranëve që shquhen për dashurinë pa kushte për ekipin e Vllaznisë, kush do ta mbushte stadiumin "Air Albania? Me gjithë respektin, Egnatia apo Dinamo me tifozët e saj që kanë hequr dorë prej dekadash? Vetëm Partizani nuk mjafton, megjithëse duhet parë deri në fund. Ligji i Sponsorizimit, barriera për masivizimin e sportit Ligji i Sponsorizimit ka mbetur në sirtarin e tryezës qeveritare. Edhe pse kryeministri Edi Rama pati premtuar se brenda 100 ditëve do të plotësonte kërkesat e presidentëve të futbollit dhe do ta kalonte për miratim në parlament, kjo nuk ka ndodhur. Ndikuar nga kjo situatë dhe problemet e vazhdueshme me numrin e tifozëve në shkallët e stadiumit, Federata Shqiptare e Futbollit mendoi të ndryshonte skemën, pikërisht për arsyen e vetme: Masivimizimin e sportit. Duke rritur interesin në shkallët e stadiumit, shtohen edhe burimet njerëzore tek Akademitë e ekipet zinxhirë. Me këtë ligj, do të afroheshin bizneset e duke u rritur buxheti, shtohen kushtet e të gjitha me radhë. E kujt është detyra? Padyshim e qeverisë, sikurse e thotë dhe Shyti: " Masivizimi është detyra primare e qeverisë. Ligji i Sponsorizimit është një nga elementët që ndikojnë, por jo më kryesori në rritjen e numrit të ushtruesve të sportit. Duhen më shumë ambiente sportive, duhet më shumë promovim, duhet më shumë impenjim I strukturave shtetërore të sportit. Fakt është që ligji aktual i sponsorizimit nuk është më i miri i mundshëm, por edhe kështu siç është mund të përdoret. Por, askush nuk e përdor sepse pjesa dërrmuese e aktorëve të sportit nuk e njohin atë dhe plot akte të tjera që mund të përdoren për të rritur funksionimin e sistemit sportiv. Mesazhi im është për ata që kanë marrë përsipër të drejtojnë sportin në qeveri, që duhet të jenë më shumë aktivë. Në përvojën time 30 vjeçare si drejtues, asnjëherë qeveritë nuk kanë refuzuar kërkesat e sportit kur ato kanë qenë të hartuara mirë ". Futbolli shqiptar, notë kaluese me hatër Me ndryshimet e bëra, ky sezon futbollistik humbi vëmendjen, jo vetëm të tifozëve, por edhe të aktorëve që përbëjnë garën. Ndryshe nga edicionet e shkuara, oshilacionet tregojnë mospërqëndrim të lojtarëve në ndeshjet të caktuara. Madje në rrethin e ngushtë të tyre shoqëror ata shprehën: "Pse të lodhemi kot? Në fund barazohemi të gjithë, katër skuadrat e para". Një lloj mentaliteti që tregon uljen e profesionalizimit në elitën e futbollit tonë. Në fillim patëm një shpërthim të Egnatias, por rendimenti i rrogozhinasve nuk duket më i njëjtë. Teknikisht dhe mbështetur në vlerësim objektiv, Artan Shyti vendos notat për Superligën, duke "kaluar" klasën edhe për tifozët: " Duke hyrë në rolin e profesorit, po mundohem që vlerësimin ta bëj me nota. Cilësia e lojës mendoj se meriton notën 7. Rivaliteti notën 8, Cilësia e ambienteve sportive notën 7. Ndërsa spektatorëve u vendos notën 5, thjeshtë për respekt të atyre pak tifozëve që vijnë në stadium. Menaxhimi i klubeve, notë kaluese. Akoma futbolli është një aktivitet me humbje dhe shumë prej klubeve sot janë duke funksionuar në shkelje të ligjit të sportit ", thotë ai duke u përpjekur që të mos vendosë nota negative, thjeshtë për të respektuar djersën dhe sakrificat e qindra mijëra njerëzve që punojnë e kontribuojnë në zhvillimin e tij. "Receta" për rikthimin e tifozëve në stadiume Futbolli është vlerësuar si loja më e ndjekur që unifikon të gjithë njerëzit pa asnjë dallim. E pikërisht arena që zhvillohet kjo garë duhet të jetë gjithmonë e mbushur me tifozë ose e thënë ndryshe me njerëz të ndarë në dy grupe rivale. Për rikthimin e tyre në Shqipëri nuk ka një recetë të mirëfilltë. Problemet ekonomike dhe sociale, padyshim që kanë dhënë "kontribut" në largimin e tyre nga stadiumet. Por, gjithashtu edhe politikat e ndjekura nga klubet tona deri më tani nuk kanë dhënë asnjë rezultat. Një mendim "fast" i Shytit është: " Për mua duhet investuar në rritjen e besueshmërisë së garës dhe në përdorimin e formave të shumta për të thirrur spektatorët në stadium. Kjo e dyta mund të bëhet në shumë mënyra dhe nuk ka nevojë të shpikim gjëra të reja. E rëndësishme është të vendoset si objektiv i klubeve dhe organizatorëve të aktivitetit. Duhet bërë një analizë dhe studim objektiv dhe një diskutim me të gjithë aktorët përpara se të vendoset nëse duhet mbajtur apo ndryshuar skema e zhvillimit të kampionatit ", thotë ai për t'i vënë më tej "vulën": " Për mua garën do ta fitojë më i miri. Në kushtet e vjetshme do shihja Egnatian. Por, kushte më demokratike se sivjet për të përcaktuar kampionin nuk kemi patur ndonjëherë… " Vështrim për të ardhmen Pas mbarimit të kampionatit, personalisht mendoj se pasojat e skemës së "Final Four" do të reflektohen në mënyrë të qartë. Ashtu si në një dasëm, disa do të jenë të kënaqur me nivelin e emocionit dhe tensionit që solli ky format i ri, të tjerë do të kritikojnë mungesën e konsistencës dhe organizimit. Një ndikim tjetër është në aspektin financiar dhe logjistik te klubet, të cilat u përballën me sfida për të përshtatur me këtë format të ri dhe për të siguruar qëndrueshmëri në performancë. Përfundimisht, në përballje me sfidat dhe pasojat, FSHF dhe aktorët e kësaj gare duhet të marrin mësimet e duhura nga eksperimenti i "Final Four" dhe t'i përdorin ato për të përmirësuar formatin dhe organizimin e kampionateve të ardhshme. Kjo kërkon një qasje më të kujdesshme dhe të konsultuar në zhvillimin e skemave të reja, si dhe një përqendrim të vazhdueshëm në përmirësimin e infrastrukturës dhe menaxhimit të ligës. Vetëm në këtë mënyrë, futbolli shqiptar mund të përparojë drejt një të ardhme më të ndritshme dhe të suksesshme në skenën ndërkombëtare.

Final CountDown për ekipet e superligës

Nga Retin Toka

Artikuj të ngjashëm Artikuj

Lojrat Olimpike gradojnë dy rusë në “Kolonelë” shqiptarë

Plëngprishësit e Kombëtares

Big Albania

Kampionati i finalistëve, Tirana nuk “ndez”

Europian! E ardhmja është vajzë…

Dëshira e Agim Ademit: Politikë, Kosovë-Shqipëri bëje një

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Inva Mula: Unë sopranoja e parë shqiptare në skenat evropiane

Bjeshkët që marrosën turistët: Nga më e bukura Zoj, tek Xhubleta

102 kontejnerët me ngarkesën e errët të maskuar nën hijen e portit

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

PORTO PALERMO, Ferri i të internuarve në Kalanë e bukur të Vasiliqisë

51 ministrat që Edi Rama u bëri NDERIN E JETËS

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Final CountDown për ekipet e superligës

Nga Retin Toka

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?