Festivali i udhëheqësve dhe i popullit

Festivali Folklorik Kombëtar i Gjirokastrës lindi si një festë për ditëlindjen e shokut Enver Hoxha. Gjithnjë ka qenë i lidhur me kreun e shtetit. Aty populli ulet gju në gju me traditën, këngën, vallen. Kështu ka qenë edhe në edicionin e këtij viti.

Pas tetë viteve mungesë rikthehet Festivali Folklorik Kombëtar i Gjirokastrës. Ky ishte lajmi që u përhap me shpejtësi në fillim të këtij qershori. Përgatitjet kishin filluar shumë më herët, por publikisht lajmi u përhap kur të gjitha detajet artistike ishin vendosur. Fundi i qershorit dhe fillimi i korrikut do të kthente sytë e të gjithëve nga qyteti i gurtë. Festivali jehoi nga data 24 qershor deri më 1 korrik 2023 dhe si gazetare e kulturës, si një përvojë e re dhe e parë përballjeje me këtë festë të folklorit, unë vërtet jam mahnitur për nga larmia dhe magjia e kulturës shqiptare. Për herë të parë, pashë Shqipërinë dhe gjithë ngjyrat e shqiptarëve që i mbartin me vete kudo janë. Zgjodha të mos humbja tre ditët e fundit të festivalit, për të ndjekur sidomos shqiptarët që jetonin jashtë kufijve zyrtarë të Shqipërisë së sotme, që nga arbëreshët me shqipen që tingëllon aq bukur e deri te theksi amerikan i të rinjve që vinin nga New York-u për të performuar në Gjirokastër. Ndaj edhe në këtë shkrim do të ndaj detaje të festivalit, që mbetej sa i popullit po aq edhe i pushtetit, por gjithnjë besnik i atyre elementëve që i kanë mbijetuar kohës, nga lahuta e deri te kopsat e një kostumi, nga palat e fustanellave e deri te xhubleta.