Europian! E ardhmja është vajzë...

Në një botë ku fitorja është e shkruar nën qiellin blu dhe ëndrrat përplasen me realitetin, një skuadër futbolli ka nisur një udhëtim të jashtëzakonshëm drejt shkëlqimit në arenën ndërkombëtare. Nuk është një grupim djemsh, jo! Përkundrazi, disa vajza kanë zgjedhur të dalin jashtë ëndrrave të “doktoreshës” apo “balerinës” dhe janë vendosur aty mes fushës për të prodhuar spektaklin e emocionin që të ofron ky sport. Kjo është historia e një Kombëtareje që ngrihet si zjarri në mbrëmjen e një nate të errët. Fillimi ishte i vështirë, si një valë e madhe që mund të thyente çdo gur në rrugën e tyre. Në këtë botë, ku përbuzja është e pashmangshme sepse futbolli cilësohet si “sport burrash”, janë ato, vajzat që kanë thyer tabu. Kritikat dhe pengesat ishin të dukshme, por kurrë nuk u dorëzuan. U përballën plot guxim me dallgët duke besuar në aftësitë e tyre. Federata Shqiptare e Futbollit pwr cdo moment ishte shtylla e mbwshtetjes dhe promotorja e sw resw. E ndërsa sot humbem në këto rreshta dedikuar futbollit dhe kombëtares së vajzave, padyshim që emocioni të largon nga realiteti. Një analizë e përgjithshme do të na shoqërojë përgjatë gjithë këtij artikulli, ku sigurisht nuk mund të mungojë as rrëfimi ekskluziv për revistën Newsbomb i Amir Grimës. Trajneri shkodran nuk ka pasur një shkop magjik për të ngritur këtë Kombëtare që tashmë sheh larg. Por, siç thotë dhe shprehja, gjërat e mira bëhen dalëngadalë. Me kalimin e kohës, flaka e tyre për sukses po bëhet gjithnjë e më e ndezur. Vajzat tona po ndriçojnë fushën me talentin dhe shpirtin e tyre garues. Në rrugën e tyre të pamposhtur, ato thyejnë paragjykime dhe sfida të tjera për të arritur atje ku shumëkush nuk besonte apo nuk e kishte çuar ndonjëherë në mendje. Në arenën ndërkombëtare, emri “Shqipëri” nuk përfaqësohet më vetëm nga djemtë, por edhe nga vajzat tona të mrekullueshme. Nëpërmjet sakrificave dhe përpjekjeve të pafundme, po fitojnë zemrat e të gjithëve, duke bërë thirrje që sytë të drejtohen drejt tyre. Ky nuk është fundi i udhëtimit, por është vetëm fillimi. Në zemrat e tyre, mbajnë ëndrrat e një bote plot ngjyra, ku barazia dhe vlerat janë mbi çdo gjë tjetër. Ato janë frymëzim për të rinjtë dhe një shembull se me durim dhe besim, çdo ëndërr është e arritshme. Prandaj, le të qëndrojmë bashkë me këtë ekip të zjarrtë, duke mbështetur shpirtin e tyre luftarak dhe dëshirën e tyre për të shkëlqyer në një botë që po vuan për një frymë optimizmi. Sepse, në fund të fundit, ato nuk janë thjesht një kombëtare e vajzave në futboll. Ato janë shpresë për një të ardhme më të mirë. Kombëtarja e vajzave, iniciativa për një skuadër futbolli Në Shqipëri nuk mund të mendohej që vajzat të luanin futboll, për më tepër të kishte edhe një ekip kombëtar. Por, ishin UEFA dhe FIFA që i vendosën kusht Federatës Shqiptare të Futbollit që të krijohej skuadra e vajzave në nivel ndërkombwtar, por edhe kampionati shqiptar. Ishtë viti 2010, kur në FSHF vjen një letër ku bëhet me dije që i duhet dhënë prioritet edhe futbollit të vajzave. Presidenti Armand Duka ia beson këtë detyrë të veçantë eksperiencës së Altin Rrakllit. Me kombëtaren e djemve kishte shkëlqyer dhe shumë kush mund të kujtojë golat e tij me fanelën kuqezi. Kontributi i tij është i padiskutueshëm dhe këtë e vlerëson edhe trajneri aktual, Armir Grima. Prej 8 vitesh në krye të ekipit të vajzave, ka parë, ka pritur e ka përcjellë gjithëkënd. Por, Rraklli ka një vend të veçantë për atë që “solli në jetë”. “ Kam kaluar sfida të mëdha gjatë gjithë periudhës në krye të futbollit të vajzave. Fillimisht ishte domosdoshmëri për të krijuar ekipin e vajzave dhe normalisht që ish-trajneri përpara meje, Altin Rraklli, ka një meritë të madhe sepse bëri një Kombëtare. Me kalimin e asaj faze, ishte periudha që duhet të merrnin rezultatet e jo thjeshtë të luanin futboll ”, shprehet trajneri Armir Grima. E ardhmja është vajzë... Ndërsa zhvillimi i futbollit të djemve në Shqipëri po ecte me hapa galopantë, s’mund të thuhej e njëjta gjë për atë të vajzave. Problemet në infrastrukturë vite më parë ishin të dukshme. Por, gjithashtu edhe natyra e brishtë e vajzës nuk mund të krahasohej asesi me djemtë. Një problem i pashmangshëm ishte dhe mentaliteti që opinioni publik kishte krijuar për këtë sport. Që në gjenezë, djemtë dikur “projektoheshin” për futbollista, ndërsa vajzat për profesione të tjera. Askush nuk mendonte këtë sport për fëmijën e tyre të gjinisë femërore. Qameti, një prind mund të shkonte deri aty që ta fuste në basketboll apo volejboll vajzën e vet, kryesisht në të mirë të shëndetit fizik. Nuk mendohej për prespektivë për të vijuar dhe zhvilluar këtë sport. Kështu thotë edhe trajneri Grima që është i prekshëm me realitetin: “ Dikur ka qenë e vështirë. Futbolli duke qenë një sport që shihej i përshtatshëm vetëm për djemtë, shumë pak vajza ose për të mos thënë aspak, nuk afroheshin për t’u bërë pjesë. Megjithatë me kalimin e kohës, Shqipëria nisi të përshtatej dhe të shihte edhe nga vendet fqinje. Politikat e Federatës Shqiptare të Futbollit iniciuar dhe mbështetur nga FIFA e UEFA kanë ndryshuar me “taman” realitetin për qasjen e vajzave ndaj futbollit ”. Edhe pse duken se do të duhen shumë vite që futbolli i vajzave t’i afrohet atyre të djemve, mes komunitetit sportiv janë optimistë se kjo ditë do të vijë. Masivizimi, FSHF-ja merr në “dorë frerët” Në vitin 2010, Federata Shqiptare e Futbollit kishte si kusht nga UEFA dhe FIFA të krijonte një kampionat kombëtar për vajzat, por edhe Kombëtaren e futbollit të vajzave. Fillimisht u duk shumë e vështirë, për shkak të mentalitetit të pllakosur në vendin tonë, ku ky sport u takon vetëm djemve. Presidenti Armand Duka kishte një sfidë të vështirë përpara. Problemi nuk qëndronte vetëm te krijimi i ligës, por dhe te infrastruktura që në ato vite linte për të dëshiruar. Nuk kishte stadiume dhe fusha stërvitore për skuadrat e djemve që prej vitesh militon mes më të mirëve. E jo më të pretendohej diçka e tillë për vajzat. Mirëpo, si një strateg i zoti dhe njohës i mirë i futbollit, presidenti Duka me bashkëpunëtorët e tij arritën shkallë-shkallë t’i jepnin drejtim punës. “Futbolli i vajzave në Shqipëri ka përparuar shumë dhe kjo është meritë e veçantë e Federatës Shqiptare të Futbollit. Për mua është shumë pozitive duke menduar që përpara ishte një tabu. FSHF-ja po punon shumë dhe po merret shumë seriozisht nga drejtuesit për të investuar akoma më shumë ”, tregon Grima në rrëfimin e tij. Strategjia Federata Shqiptare e Futbollit po punon maksimalisht përmes politikave të saj për të afruar sa më shumë vajzat me këtë sport kaq shumë të ndjekur në gjithë botën. Mandat pas mandati, presidenti Armand Duka ka treguar progres në punën e tij dhe kjo shihet edhe në rregulloret e miratuara për kampionatet kombëtare. Për herë të parë, në zgjedhjet e fundit, Asambleja e FSHF-së zgjodhi si anwtare nw Komitetin Ekzekutiv dhe mw vonw specifikisht në krye të futbollit të vajzave, Anila Basha. Botuese dhe gazetare e njohur, pasionante e thekur e futbollit, i është futur punës me “not” për të përafruar disi futbollin e vajzave me të djemve, në aspektin e vëmendjes. Veçanërisht dy vitet e fundit, dukshëm shifrat kanë ndryshuar. Më shumë vajza që duan të luajnë futboll, që kanë dëshirë të jenë pjesë e fushës së blertë, qoftë edhe si gjyqtare. Megjithatë vlen të përmendet kushti numër një që personalisht mendoj se ishte i rëndësishëm, që çdo ekip futbolli i djemve duhet të ketë paralelisht një skuadër vajzash. Bëhet fjalë për elitën, pra për Kategorinë Superiore. Asnjë ekip nuk do të kishte mundësi të ishte pjesë e kësaj lige, nëse një skuadër vajzash s’do të regjistrohej. Po si e sheh Grima strategjinë? A ka ndonjë mendim ndryshe rreth asaj që ndodh? “ Federata Shqiptare e Futbollit ka një strategji për zhvillimin e futbollit të vajzave, gjë që është treguar qartë te një aktivitet shumë i madh i organizuar nga FSHF-ja, nga përfaqësuesja e Komitetit Ekzekutiv, Anila Basha. Është një program i qartë që normalisht do kohën e vet, do që të kemi durim, të presim e ta mbështesim për të arritur momentin që dhe ne të kualifikohemi në kampionate europiane. Do punë shumë, do sakrifica shumë, do mbështetje të madhe. Po të shohim futbollin e djemve për shembull, prej sa vitesh që luajnë futboll, mund të kemi pasur kualitete të mira, por erdhi çasti që të kualifikohemi në 2016-tën dhe tani. Kështu që edhe ne duhet të gjejmë momentin për të pretenduar, që të rritemi e të formohemi më shumë si skuadër e të kemi më shumë besim që mund t’i arrijmë këto suksese” , thotë trajneri Grima, që prej afro 8 vitesh, e njeh mirë këtë punë. Kampionati vendas vs Kombëtarja Pas krijimit të kampionatit të futbollit të vajzave, klubet nisën nga puna për të përforcuar skuadrat e tyre me mundësitë që ishin. Vlen të evidentohet skuadra e Vllaznisë që ka bërë ligjin në kampionatin shqiptar duke mposhtur gjithë kundërshtaret. Në asnjë moment, shkodranet nuk e kanë diskutuar titullin kampion duke qenë dhe furnizuese kryesore për ekipin kombëtar. Grima si njohës i mirë i futbollit shkodran vlerëson vajzat kuqeblu duke thënë: “ Siç dihet Vllaznia ka qenë prej vitesh skuadra për t’u mundur. Investimi ka qenë serioz dhe kjo na ka shërbyer edhe për mirë në Kombëtare. Vitet e fundit kanë njohur vërtetë progres dhe për këtë jam shumë i kënaqur. Tirana ka nisur t’i japë vëmendje të veçantë skuadrës së vajzave. Gjithashtu edhe Apolonia. Por, duhet theksuar fakti se këto klube janë vënë në lëvizje falë politikave të UEFA-s dhe rregullave e politikave që po ndjek Federata Shqiptare e Futbollit ”. Vllaznia, krenaria shqiptare Nëse ka një skuadër që duhet të krenohemi në arenën ndërkombëtare, ajo është padyshim Vllaznia. Shkodranet “burrnesha” që sfiduan Real Madrid, luajtën si të barabarata me to duke çuar lart fanelën dhe krenarinë shqiptare. Vajzat kuqeblu janë gjithmonë në krye. Kanë tentuar disa herë t’i mposhtin me gjithë mënyrat, por nuk ia kanë dalë. Vjet, Vllaznia ishte skuadra që i bëri krenarë të gjithë. Për herë të parë në historinë e futbollit shqiptar për vajza, ekipi ynë u kualifikua në grupet e Champions League. Dhe pas këtij momenti, në vendin tonë është më se normale që të gjitha të mund të luajnë futboll. Edhe pse të marrësh pikë në një arenë ndërkombëtare si Champions është mjaft e vështirë, askush nuk do ta harrojë golin e realizuar nga Megi Doci e Vllaznisw kundër Real Madrid. Edhe këtë sezon, shkodranet janë në vendin e parë me 54 pikë falë mbështetjes së vazhdueshme të presidencës. Kualifikimi i Vllaznisë në arenën ndërkombëtare, ka vënë në lëvizje edhe klubet e tjera të futbollit shqiptar. Logjika është e thjeshtë. Njëjtë si skuadrat e djemve, edhe ato të vajzave marrin shpërblime të majme në rast kualifikimi. Pra, çdo arritje përkthehet në para dhe çdo e ardhur lexohet si investim dhe një të ardhme të ndritur për çdo skuadër. Kombëtarja Siç e cekëm më lart, futbolli shqiptar është rritur shumë duke prekur në këtë mënyrë edhe ato të vajzave. Furnizues kryesor është kampionati vendas, por vitet e fundit kanë nisur edhe scoutimet duke u përpjekur për të sjellë në Kombëtare elementë cilësorë. “ Unë e mendoj pozitive dhe të frytshme që të kemi një rivalitet në Superiore. Rivaliteti sjell një kampionat të fortë e një Kombëtare më të fortë. E kam dashur gjithmonë që niveli të rritet dhe të vijojë ende më shumë të bëjë të njëjtën gjë ”, tregon dëshirën e tij Grima që nuk heziton të zbulojë dhe ndryshimet e lojtareve që luajnë jashtë vendit me ato që kanë zgjedhur të rriten profesionalisht në Shqipëri. “ Ne jemi rritur gjatë gjithë kësaj kohe, ato vajza që sot luajnë jashtë, ne i kemi pasur në kampionatin shqiptar deri vonë. Është një vlerë e shtuar për ato vajza që vijnë nga jashtë, sjellin një mentalitet tjetër futbolli, një mënyrë tjetër të të luajturit futbolli dhe një pasion tjetër për futbollin. Është mirë që të kemi sa më shumë të tilla dhe besoj se do të kemi në të ardhmen. Do mundohemi që në të ardhmen të kemi sa më shumë nga këto elemente të spikatura që do të luajnë në kampionatet e huaja dhe të bëjnë progres të madh ”, thotë ai. Veç skuadrës së Grimës, tashmë Shqipëria ka edhe një skuadër U-19 dhe U-17 ku përfaqësohet në arenën ndërkombëtare. Ashtu si në fillimet e veta të ekipit të parë, U-19 po rritet dalëngadalë. EURO 2025 Dikur kënaqësia ishte e madhe vetëm me pjesëmarrjen. Por, tashmë gjërat kanë ndryshuar. Ashtu si Kombëtarja e djemve dhe kjo e vajzave sheh larg. Aktualisht ekipi ynë po luan kualifikueset për Europianin që do të zhvillohet vitin e ardhshëm në Zvicër. Deri më tani paraqitja ka qenë relativisht e mirë, por mundësitë sigurisht janë më të mëdha. Në ndeshjen e parë, Shqipëria u mposht me rezultatin 2-1 nga Luksemburgu, ndërsa me Estoninë vajzat kuqezi triumfuan 2-0. Skuadra jonë gjendet në grupin C5 së bashku me Estoninë dhe Luksemburgun. Por, sa janë shanset për kualifikim? Trajneri Grima kërkon të qëndrojë me këmbë në tokë kur thotë: “ Shqipëria ka një karakteristikë kryesore që është një skuadër, një grup i fortë vajzash. Nuk bazohemi vetëm në një individ, por te shpirti i garës. Jemi një ekip me luftë shumë të fortë sportive. Tiparet kryesore këto janë, të luajturit në grup. Kur luajmë kështu, jemi mjaft mirë. Ka momente të çastit që vlerësojmë më shumë seç duhet një kundërshtar dhe aty pastaj na krijohen problemet. Sa i përket kualifikimit, unë jetoj me këtë ëndërr. Do të isha më i lumturi në botë, si për mua, edhe për lojtaret e Kombëtares që kjo ëndërr të bëhet realiteti. Ishalla, do Zoti që të na çojë në Europian, por duhet shumë punë. Kemi akoma për të përmirësuar për të qenë të barabartë me skuadra elitare. Ndoshta duhet parë ndryshe dhe formati i kualifikueseve për një strategji tjetër. Ndoshta, pse jo, bisedime me UEFA-n për një formulë tjetër. Mendoj që do të vijë koha që ne të jemi pretendentë për shkuar aty ”, përfundon ai. STATISTIKAT, KUALIFIKIMI MISION I MUNDUR Kombëtarja e vajzave ka mundësi të mëdha për t’u kualifikuar në Europianin “Zvicër 2025”. Aktualisht ato renditen në vendin e dytë me 3 pikë, aq sa dhe Luksemburgu i vendit të parë. Ndërkohë në të tretin është Estonia me 0 pikë. Por, vajzat tona kuqezi deri më tani janë të parat në grupin e skuadrave të vendeve të dyta duke lënë pas Greqinë, Maqedoninë e Veriut, Armeninë dhe Lituaninë. Ato do të luajnë dhe dy ndeshje të tjera, përkatësisht me 31 maj kundër Estonisë si dhe në 4 qershor ndaj Luksemburgut. Në këto kualifikuese, Shqipëria ka shënuar 3 gola dhe ka pësuar 2 të tillë. Golavarazhi është 1.5 gola për ndeshje. Pesë herë vajzat kuqezi janë ndëshkuar me kartonë të verdhë.

Europian! E ardhmja është vajzë…

Nga Retin TOKA

Artikuj të ngjashëm Artikuj

DY PËR HISTORINË

Vajzat e historisë kuqezi në play-off të Botërorit

Miliona në kosh

Epoka e artë e Silvinjos, por…We want more!

Mes ëndrrës dhe rënies

6 vite pritje për 100 ditët e Ramës

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?