Banka Botërore, “dhuratë” qeverisë para zgjedhjeve

Si rrallëndonjëherë, Banka Botërore në raportin e prillit 2023 flet me superlativa për ekonominë shqiptare, shprehje që nuk i ka përdorur për ndonjë vend tjetër të rajonit, edhe pse në disa tregues mund të kenë të dhëna më të mira sesa Shqipëria. Vetëm pak ditë para zgjedhjeve, Banka Botërore i bën “dhuratë” qeverisë një dokument që ka fjalë që s’i përdor në gjuhën e vet teknike. E siç evidenton gazetarja Ola Xama, në disa raste, qeveria madje është treguar më realiste sesa vete raporti i BB. E përfshirë disa herë në skandale korruptive, si ndërprerja e raportit “Doing Business” apo dështimi i financimit 130 milionë euro për TEC-in e pavendosur në punë të Vlorës, ky raport me “ngjyra” është një nga çuditë e radhës për realitetin ekonomik shqiptar. Çfarë ka shkruar në Shqip, nuk përkojnë me ato që shkruhen “anglisht”.

Në 16 shtator të vitit 2021 Banka Botërore njoftoi ndërprerjen e publikimit të raportit “Doing Business” pas një skandali që përfshiu zyrtarët më të lartë saj dhe drejtuesen e Fondit Monetar Ndërkombëtar. Raporti publikohej rregullisht njëherë në vit që prej vitit 2003 dhe shërbente si një indeks global për të renditur dhe matur klimën e biznesit në 213 shtete të botës. Akuzat se ish-Presidenti i Bankës Botërore Jim Yong Kim bashkë me drejtuesen e FMN Kristalina Gjeorgjevna kishin ndryshuar metodologjinë e indeksit për të përmirësuar radhitjen e Kinës në 2018-n nga vendi 85 në atë të 78 detyroi Bordin e Drejtorëve të Bankës Botërore të niste hetimet dhe të merrte vendimin drastik dhe të pezulluar publikimin e raportit.