Asllani i Interit, ëndrra e një nate vere e Kristjanit elbasanas

Ishte data 9 mars i vitit të largët 2022. Në një familje të thjeshtë elbasanase kishte gëzim të madh. Në jetë kishte ardhur djali i parë i shtëpisë, Kristjani. Babai Gentiani kishte emigruar afro 1 vit më parë drejt Italisë. Peripecitë dhe jeta e vështirë në Shqipëri e kishin detyruar t’i ngjitej gomones për të kërkuar më të mirën për familjen e tij. U vendos në Piza me shpresën se do të punonte dhe do të merrte përtej Adriatikut edhe bashkëshorten me djalin e sapoardhur në jetë. Ditët e para ishin të vështira për të. Si çdo emigrant tjetër i duhej të punonte fort për të përballuar jetesën. Vështirësinë ia shtonte më shumë edhe dëshira për të parë djalin e porsalindur.

Kristjani i vogël erdhi në jetë pikërisht në datën 9 mars, ditën kur ka lindur edhe klubi i Interit. Koiçidencë e bukur… Askush s’e kishte menduar se një ditë, një djalë i urtë nga një familje e thjeshtë elbasanase do të vishte fanelën zikaltër. Por, fati e paska pasur të shkruar që ai t’i bashkohet ekipit që ka lindur në të njëjtën datë me të. Historia e jetës së Kristjanit është sa e bukur, aq dhe emocionuese. Edhe pse është shumë i zënë për shkak të përgatitjeve intensive me Interin, 20-vjeçari mban fjalën dhe gjen kohën për të treguar jetën e tij në një rrëfim enkas për revistën Newsbomb.al. Ashtu si në fushë, është i qetë dhe kujton me detaje hapat e të parë e deri sot që është në “gojë” të Europës për atë që ka treguar në fushën e blertë.