Synimet e OSHEE: I pari KLIENTI, çfarë mendojnë ata për ne?

Energjia është për të një sektor që e njeh në majë të gishtave dhe si jurist e ka studiuar në detaje sistemin. Përvoja e gjatë dhe profesionalizmi i treguar për më shumë se një dekadë në poste të ndryshme publike, bëri që Enea Karakaçi të zgjidhej si drejtues ekzekutiv i OSHEE Group. Me emërimin e tij, Operatori i Shpërndarjes së Energjisë Elektrike ka hyrë prej muajsh në një proces transformimi dhe digjitalizimi të shërbimeve, përgjigjes ndaj qytetarit, trajtimit të punonjësve dhe objektivave strategjike e të qartë për të ardhmen. Janë 1.3 milionë abonentë që marrin shërbim të pandërprerë, nga Vermoshi deri në Konispol, duke përdorur 55 mijë kilometra linja elektrike të shtrira në çdo skaj të Shqipërisë. OSHEE trashëgon një rrjet të amortizuar mbi 30 vjeçar dhe duke qenë në një moshë të tillë ka nevojë për ndërhyrje inovative që të shmangë humbjet. Niveli i tyre ka ardhur duke u reduktuar ndjeshëm, por shifrat nuk e kënaqin lehtë administratorin, ndaj një nga reformat që Enea Karakaçi ka ndërmarrë dhe i mëshon fortë është ajo për digjitalizimin e shërbimit. “Prej kohësh kemi nisur të instalojmë matës ‘smart’ dhe do të vijojmë ta zgjerojmë fushën e implementimit te sa më shumë abonentë, pasi avantazhet janë të shumta. Investimet në rrjetin elektrik do të ndihmonin jo vetëm në performancën e treguesve të humbjeve, por edhe në rritjen e cilësisë së furnizimit me energji elektrike”, shprehet ai. Si një i ri që e njeh mirë sistemin shqiptar, por edhe atë evropian, Enea thekson se nëse nuk ndërton një ekip të mirë atëherë edhe investimi nuk do të duket. Me zgjedhjen e tij në krye të OSHEE, propozoi menjëherë rritjen e pagave për të gjithë punonjësit dhe aplikoi për herë të parë vjetërsinë në punë. Për t’i dhënë një lloj promovimi punonjësve dhe për të krijuar një sistem karriere, institucioni vendosi të aplikonte një metedologji të panjohur më parë në OSHEE. “Sa më shumë vite pune ke në kompani aq më shumë të rritet paga, vendim që mori zbatim në javën e parë të muajit nëntor 2023”, tregon ai. Fokusi i tij është klienti dhe nuk mund të kërkonte nga punonjësit të ishin pranë qytetarëve në çdo kohë, nëse ata nuk do të kishin kushtet dhe një pagë të kënaqshme që u përgjigjet nevojave. Janë 3560 punonjës të terrenit që sot marrin një pagë 30% më të lartë se më parë dhe janë në gatishmëri gjatë gjithë kohës. Ata nuk i njohin ditët e pushimit në fundjavë sepse janë në çdo orë dhe 7 ditë të javës në shërbim të qytetarëve. Një lajm të mirë, administratori Enea Karakaçi e ka dhe për qytetarët, për të cilët thotë se pavarësisht aludimeve apo spekulimeve, herë të qëllimshme, për vitin 2024 tarifat e konsumit të energjisë elektrike do të jenë të pandryshuara për familjarin 9.5 lekë/këh, dhe 14 lekë për subjektet e lidhura në tension të ulët (0.4 KV). Gjithashtu, nuk u prekën as kategoritë e subjekteve të lidhura në tension 6 dhe 10kV, mbi 5 mijë aktivitete private. Këto biznese do duhet të dilnin në treg të lirë prej vitit 2022, sipas afateve të reformës për liberalizimin e sektorit, por për shkak të situatës së jashtëzakonshme ato vazhdojnë të marrin energji me çmim të subvencionuar. “Qeveria akordoi rreth 250 milionë euro mbështetje financiare për kompanitë publike të energjisë për të shmangur rritjen e çmimit, që do të vinte nga liberalizimi i tregut për subjektet private”, shprehet Karakaçi, duke theksuar se Ministria e Energjisë dhe vetë qeveria shqiptare i kanë dhënë një mbështetje të fortë në këtë trasformim të OSHEE që ka nisur prej muajsh. Institucioni ka arritur të stabilizojë financat e veta falë edhe mirëmenaxhimit, ndaj edhe investimet do të jenë më të mëdha gjatë vitit 2024. Administratori tregon se gjatë këtij viti që ka nisur janë disa projekte të rëndësishme që do të marrin jetë dhe më shumë se 40 milionë euro pritet të investohen për përmirësimin e shërbimit. Fokus janë dhe zonat rurale që deri më parë kanë qenë në harresë dhe mbeteshin pa energji me stuhinë e parë të erës apo reshjeve. Siç thekson Enea Karakaçi, OSHEE do të jetë atje ku janë qytetarët për t’iu përgjigjur në kohë abonentëve në çdo cep të Shqipërisë. Fillimisht përshëndetje dhe faleminderit që pranuat të ishit pjesë e revistës sonë. Zoti Karakaçi, prej më shumë se 6 muajsh në krye të OSHEE. Si mund ta përshkruani këtë rrugëtim tuajin në krye të një institucioni kaq të rëndësishëm për vendin? Tejet dinamik. OSHEE Group u shërben 1.3 milionë abonentëve, nga Vermoshi deri në Konispol, familjarë apo privatë, siç janë biznese korporatash, industri, shërbime, si dhe institucionet apo ndërmarrjet shtetërore/publike. Të gjithë këto kategori marrin shërbime të furnizimit me energji elektrike përmes grupit OSHEE, duke përdorur rreth 55 mijë km linja elektrike të shtrira në çdo skaj të Shqipërisë. Kryejmë në vit rreth 14 milionë faturime si dhe 5 milionë veprime përmes sporteleve të Kujdesit ndaj Klientit. Pra, shkurtimisht këto janë disa të dhëna për të kuptuar rëndësinë dhe përgjegjësinë që ka Operatori i Shpërndarjes së Energjisë Elektrike për jetën e përditshme të qytetarit si dhe të ekonomisë në tërësi. Ky në thelb është aktiviteti ynë, furnizimi me energji elektrike në mënyrë të pandërprerë dhe ofrimin e shërbimeve me kosto sa më të pranueshme, për të dyja palët. Prej më shumë se 10 vitesh keni dhënë kontributin tuaj për kurimin dhe rregullimin e entit energjitik shqiptar. Sa e vështirë ka qenë për ju? Para se të merrja drejtimin e OSHEE, kam punuar për disa vite në Ministrinë e Infrastrukturës dhe të Energjisë, duke ndjekur dhe zbatuar projekte me mjaft rëndësi në sektorin energjetik, dhe këtu nuk kam parasysh vetëm fushën e veprimit të shoqërisë që drejtoj aktualisht, por të gjithë spektrin çfarë përmban reforma e nisur në 2014-n. E konsideroj avantazh përvojën në ministri dhe njohjen e situatës të grupit, stafit dhe bashkëpunëtorët, të cilët gjej rast t’i falënderoj sërish për punën e bërë, pasi viti 2023 u mbyll me rezultat financiar pozitiv. OSHEE nuk është vetëm një ent regulator për energjinë shqiptare, por padyshim mund të cilësohet si një “minierë ari” gjatë periudhës kur moti favorizon prodhimin e energjisë. Në drejtimin tuaj, si kanë qenë arkëtimet për vitin që lamë pas? Bazuar mbi ecurinë e arkëtimeve dhe reduktimit të nivelit të humbjeve, pritshmëria është për një rezultat financiar pozitiv rreth 26 milionë euro. Përmirësimi i treguesve të performancës tek arkëtimet dhe humbjet, reduktimi i shpenzimeve operative dhe i blerjes së energjisë, përfshi këtu edhe disiplinimin e nxitur nga VKM-ja e emergjencës në sektor, ndikuan në arritjen e rezultatit pozitiv. Për vitin 2023, edhe Furnizuesi i Shërbimit Universal, pjesë e grupit OSHEE, nisur nga të dhënat deklaron se ka një rritje me rreth 14.5% të nivelit të arkëtimeve të ujësjellës-kanalizimeve. Pas reformës së qeverisë shqiptare për ngushtimin e shoqërive të Ujësjellës –kanalizimeve dhe për ti krijuar ato më të qendërzuar në qytetet kryesore dhe po përpiqemi që në vitin 2024 të kemi një rritje domethënëse ku të përfshijë përveç pagesës së faturës përkatëse nga ujësjellësi të kemi dhe pagesë të faturave të prapambetura, sepse ka dhe efekte sociale nëse ne ndërpresim energjinë elektrike. Po humbjet në rrjet të cilat kanë qenë një problem madhor për vite me radhë, si është ecuria në këtë fazë? Niveli i humbjeve në rrjetin elektrik, ose sasia e kilovatëve të pafaturuar ka ardhur duke u reduktuar dhe tashmë paraqitet e stabilizuar, pavarësisht vështirësive. Sot kemi nivel humbjesh nën 19%, ndërsa për vitin 2024 parashikojmë që treguesi të zbresë në 18.5%. Ndoshta do t’ju duken nivele të larta, por mos harrojmë se 10 vjet më parë afro gjysma e energjisë elektrike nuk faturohej dhe/ose vidhej. Panorama sot është krejt ndryshe. Kemi disa rajone që konsiderohen histori suksesi, si Shkodra për shembull, nga 60% nivel humbjesh në nën 30%, apo dy rajonet të mara së bashku ku dhe konsumi është i lartë, Tirana dhe Durrësi, me nivel nën 14%. Në ato zona ku kemi investuar, duke vendosur linjë 20kV, shoqëruar me ndërhyrjet në n/stacione me pajisje të reja, humbjet janë 10%. Legjislacioni shqiptar, të cilin ju e njihni mirë, ju ka mbështetur duke kategorizuar si vepër penale të dënueshme vjedhjen e energjisë elektrike. Si ka ndikuar ky fakt te qytetarët dhe a janë ndërgjegjësuar ata? OSHEE trashëgon një rrjet të amortizuar mbi 30 vjeçar dhe duke qenë në një moshë të tillë sigurisht ka humbje teknike dhe problematika të cilësisë së furnizimit. Kemi zona të tilla në veri, si Thethi, Burreli, Lezha apo në jug, si Përmeti, ku gjatësia e linjave arrin deri në 100 km dhe janë “ajrore”, pra të prekshme nga fenomenet natyrore, por edhe nga dora e njeriut (vjedhjet). Ne vijojmë, edhe sot që flasim, duke proceduar penalisht subjekte të biznesit apo qytetarë që ndërhyjnë në mënyrë të paligjshme në rrjetin elektrik. Kjo është falë punës së mirë të punonjësve të terrenit, që krah nevojës për t’iu përgjigjur qytetarëve me shërbime, kryejnë dhe masa parandaluese për ndërhyrjet e paligjshme. Po në rastet e ankesave të klientëve, si veprohet me to? A është shtuar numri I tyre, apo strategjitë dhe politikat tuaja kanë dhënë efektin e duhur duke i minimizuar? Ankesat e qytetarëve për keqfaturim kanë pësuar ulje me mbi 50%, duke dëshmuar cilësinë e shërbimit gjithnjë e në rritje. Sot kemi 25 mijë ankesa, që në raport me numrin e faturave zë një peshë prej 0.1% ndaj totalit. Mendoj se marrëdhënia me klientin është faktor bazë dhe na ndihmon të përmirësojmë më tej treguesit dhe shërbimin ndaj tyre. OSHEE ofron shërbim për të gjithë abonentët në Shqipëri. Ushtrojmë aktivitetin për çdo qytetar dhe çdo biznes, ndaj pritshmëritë janë shumë të larta ndaj OSHEE Group, sepse jemi kompania që kemi çdo ditë ndërfaqe me qytetarin. Vendi gjendet sot në një situatë të vështirë nga emigrimi i të rinjve dhe profesionistëve, po OSHEE a është prekur nga ky fenomen. Si është situata me personelin në rang vendi, a keni kapacitetet njerëzore për të mbuluar çdo sektor? -OSHEE Group ka nisur një fushatë rekrutimesh, duke shpallur thirrjen për punësim të 300 të rinjve të moshës deri në 25 vjeç. Ky vendim erdhi për të kompensuar stafin e vjetër, mosha mesatare e të cilit është 50 vjeç. Ndërkohë, OSHEE po vijon edhe me njoftime rekrutimi në sektorë të ndryshëm të shoqërisë, si IT, inxhinierë, menaxherë, specialistë të fushave në inovacion, etj. Ndiqni ju ndonjë politikë të veçantë për të promovuar më të mirët. Nëse ka qenë më parë apo është risi e juaja për të ngritur profesionistët në pozicionet që ju dhe stafi juaj mendoni se ata meritojnë? -Për t’i dhënë një lloj promovimi punonjësve dhe për të krijuar një sistem karriere, OSHEE aplikoi për herë të parë dhe vjetërsinë në punë, pra sa më shumë vite pune ke në kompani aq më shumë të rritet paga, vendim që mori zbatim në javën e parë të muajit nëntor 2023. Pagat e kompanisë OSHEE Group për shumë arsye të ndryshme ishin të pandryshuara që nga viti 2015. Dhe sigurisht që OSHEE nuk mund të kërkonte të tërhiqte potencial të mirë e cilësor me nivel pagash jo të kënaqshëm. Ishte propozimi im si administrator dhe natyrisht dëshira e madhe edhe e ministres Belinda Balluku, që e mbështeti nismën për rritjen e pagave për të gjithë punonjësit e grupit. Rritja është më evidente për 3560 punonjësit e terrenit, që janë në gatishmëri gjithë kohës, që nuk kanë fundjava, pra ata punojnë në çdo orë në shërbim ndaj qytetarëve. Paga e tyre u rrit me 30%, duke llogaritur edhe vjetërsinë në punë. Po përsa i përket përfshirjes së teknologjisë, shumë institucione publike po shkojnë drejt digjitalizimit të shërbimit, përfshirjes së inteligjencës artificiale, e konsideroni këtë si një mundësi për të lehtësuar më tej shërbimet për qytetarët? Ne jemi duke punuar çdo ditë për t’i përmirësuar treguesit, ndaj kemi vendosur t’i kushtojmë më tepër rëndësi inovacionit dhe digjitalizimit, dy elementë nxitës që ndihmojnë në modernizimin e sektorit. Prej kohësh kemi nisur të instalojmë matës “smart” dhe do të vijojmë ta zgjerojmë fushën e implementimit tek sa më shumë abonentë pasi avantazhet janë të shumta. Investimet në rrjetin elektrik do të ndihmonin jo vetëm në performancën e treguesve të humbjeve, por edhe në rritjen e cilësisë së furnizimit me energji elektrike. Digjitalizimi dhe inovacioni janë disa nga elementet e tjera të rëndësishme që e bëjnë OSHEE-në të veprojë “smart”, pasi mendoj se është një kompani që fatmirësisht ka resurse shumë të mira, pavarësisht paragjykimeve që mund të gjenden shpeshherë në përgjithësi për kompanitë publike. Në OSHEE punon prej vitesh një staf që ka akoma aftësi përthithëse për t’iu përshtatur sfidave të kohës, të cilat janë: digjitalizimi e inovacioni, që të jemi sa më pranë klientëve. Po për burimet e reja të energjisë që kanë nisur tashmë në territorin shqiptar, fotovoltaikët, i ashtuquajturi biznesi i diellit, si dhe turbinat e erës. Qeveria shqiptare dhe Ministria e Energjitikës kanë nisur prej kohësh të japin licensat e para, a po e mbështet OSHEE këtë diversifikim të burimeve të energjisë? Ne jemi duke investuar paralelisht edhe në zona ky qeveria së bashku me privatin janë duke zhvilluar “energjinë e gjelbër”, si në Hoxharë të Fierit ku janë vendosur disa projekte të prodhimit të energjisë elektrike nga dielli (fotovoltaikë). Pra, kompania jonë është duke u munduar që, kudo ku ka qendra nevralgjike, ne duhet t’u përgjigjemi qytetarëve. Ne duhet t’u përgjigjemi të gjithë qytetarëve kudo në Shqipëri, por janë disa zona, të cilat kanë një fokus të shtuar nga ana jonë dhe që do të ketë dhe në vitin pasardhës. Bota është përballur me një krizë energjitike të jashtëzakonshme. Si ka mundur ta përballojë Shqipëria dhe si është raporti krahasimisht me rajonin? Ishte fundi i vitit 2019, kur vendi u përball me tërmetin e fuqishëm duke prekur tre rajone me peshë për ekonominë, si Durrësi, Lezha dhe Tirana. Natyrisht që për OSHEE-në kjo ishte goditja e radhës pas dy vitesh thatësisë, mungese prodhimi të energjisë nga HEC-et, shoqëruar me kosto të larta të blerjes. Në 2020-n erdhi pandemia me efekte jo pak ndikuese në bilancin e shoqërisë, dhe sikur të mos mjaftonte kjo, në dy vitet vijuese kemi krizën e çmimeve të importit të energjisë. E megjithatë, pavarësisht vështirësive ndikuar nga kostot e larta, shoqëria nuk e pa të arsyeshme të rriste çmimin e energjisë elektrike, sikurse ishte vepruar në vendet e BE-së, madje edhe në rajon. Qeveria vendosi të subvenciononte familjet, vendim i marrë nga performanca pozitive e kompanive publike të sektorit energjetik. Ka pasur shumë spekulime në lidhje me rritjen e çmimit të energjisë. Madje aludohej se Shqipëria e shiste lirë dhe e blinte shtrenjtë. Si qëndron e vërteta? Paralelisht me këto periudha të vështira duhet të realizohej procesi i liberalizimit të energjisë elektrike, direktivë e kahershme e BE-së, Sekretariatit të Vjenës, por edhe e vetë subjekteve të mëdha në vend. Parimi i liberalizimit është që çdokush, sipas fashës së tensionit, mund të furnizohej në treg të lirë, pra me çmime të tregut, dhe jo më vetëm tek OSHEE. Ne nuk rritëm çmimin e energjisë elektrike në vitin 2021-2022, kur çmimi shkoi në nivele të çuditshme, kur në vitin 2022 çmimi mesatar në disa ditë shkoi 400 euro, dhe ditë të caktuara edhe 1000 euro. Në ato ditë të vështira qeveria shqiptare injektoi kapital në shoqërinë KESH dhe normalizoi sektorin, duke e mbajtur çmimin në nivele të njëjta. Sot që prokurohet, në treg ka çmime dyfish më të larta se para krizës. Pra sektori publik energjetik po përballon kosto dyfish më të lartë, me të njëjtat çmime dhe me të njëjtat tarifa të energjisë elektrike. Po për vitin që sapo ka nisur, në 2024-ën qytetarët shqiptarë dhe bizneset do të paguajnë më shtrenjtë për energjinë elektrike, apo çmimet nuk do të ndryshojnë? Për vitin 2024 tarifat e konsumit të energjisë elektrike do të jenë të pandryshuara për familjarin 9.5 lekë/këh dhe 14 lekë për subjektet e lidhura në tension të ulët (0.4 KV). Gjithashtu, nuk u prekën as kategoritë e subjekteve të lidhura në tension 6 dhe 10kV, që nuk janë pak, por mbi 5 mijë aktivitete private, të cilat sipas afateve të reformës për liberalizimin e sektorit duhet të dilnin në treg të lirë prej vitit 2022. Për shkak të situatës së jashtëzakonshme të këtyre dy viteve që shkuan, ky ishte një favor që iu bë këtyre kompanive, pasi ato vazhdojnë të marrin energji me çmim të subvencionuar. Qeveria akordoi rreth 250 milionë euro mbështetje financiare për kompanitë publike të energjisë për të shmangur rritjen e çmimit, që do të vinte nga liberalizimi i tregut për subjektet private. Duhet të kuptoni që ky grup klientësh janë në pozitë të vështirë, sepse konkurrojnë në tregje të tjera dhe qëllimi në fund është mbrojtja e klientëve, jo vetëm me anë të çmimit fundor të energjisë elektrike por dhe produkteve të shportës. Po cili është fati i 2200 subjekteve të lidhura në tension 20kV? Nga data 1 janar 2024, këto subjekte nuk mund të furnizohen vetëm nga OSHEE Group, por mund të zgjedhin furnizues tjetër që u duket i përshtatshëm me çmimin që ofron. Për këtë kategori OSHEE Group shprehet se mund të furnizohen nga FTL, pjesë e grupit, madje me kontrata njëvjeçare dhe me çmim fiks. Kjo vlen edhe për subjektet e lidhura në tension 35kV, të cilat kanë dalë në treg të lirë prej më shumë se tre vitesh. Keni qenë Drejtori i Përgjithshëm i Politikave dhe Zhvillimit të Energjisë dhe Industrisë në Ministrinë e Infrastrukturës dhe Energjisë, pra ia dinit fare mirë të mirat dhe të metat OSHEE-së. Cili është hapi juaj i radhës në këtë institucion? Kemi nisur në 6-mujorin e dytë zbatimin e disa kontratave me rëndësi strategjike, pasi lidhen me zhvillimin e sektorit të turizmit dhe të ekonomisë në tërësi. Janë rreth 15 milionë euro investime të nisura për fuqizimin e n/stacioneve në pika kyçe të vendit, si në Velipojë, Lezhë, Pogradec dhe Golem të Durrësit. Siç e shihni, këto objekte ndodhen në zona me mjaft popullim gjatë sezonit turistik, që për hir të së vërtetës po zgjatet edhe në muajt e vjeshtës. Janë zona ku sektori i agroturizmit po merr hov dhe mbështetja e OSHEE Group me investime të mëtejshme është e nevojshme. Jam i kënaqur sepse kemi një rijetëzim të marrëveshjes me qeverinë italiane, që kap segmentin Palasë-Himarë për investimin në rrjetin elektrik tension i mesëm dhe i ulët, përfshi këtu edhe në ndërtim kabinash. Në Ksamil të Sarandës po zbatohet projekti i shtrimit të fiderave të rinj 20kV, pa harrur investimet në interes të punëve publike strategjike, si rrjeti elektrik për tunelin e Llogorasë apo të rrugës së re në Kardhiq (Gjirokastër), edhe kjo me tunel. E fundit! Si e vlerësoni performancën tuaj përgjatë gjithë këtyre viteve në sektorin shtetëror në Shqipëri dhe çfarë premtoni për të ardhmen? Unë dua të kem në fokus Klientin, “nivelin e pëlqyeshmërisë”. Ne diskutojmë për nivele bazike të kompanisë, ndërkohë që ka disa elemente që janë të rëndësishme, si: Çfarë mendojnë klientët për ne? A kemi ne mundësi për tu vetëpërmirësuar, në bazë të analizës së klientëve dhe dëshirës së tyre? Këto janë disa nga elementët që kam dëshirë të fokusohem në vitin 2024. Gjithashtu, këtë vit kemi planifikuar të investojmë rreth 40 milionë dhe ky është një lajm i mirë për abonentët pasi përmes këtij buxheti do të ndërhyjmë në zona ku është shfaqur nevoja më e madhe, përfshi këtu edhe në zona rurale të thella. Te ky fond i parashikuar dua të veçoj projektin e rimëkëmbjes të zonës së Alliasit në Kamzë (Tiranë), ku do të ndërtohet një Nënstacion i ri së bashku me rrjetin elektrik 20kV dhe kabina.

Synimet e OSHEE: I pari KLIENTI, çfarë mendojnë ata për ne?

Nga Ilir Xhafaj

Artikuj të ngjashëm Artikuj

“ALBANIAN FILES”: 4 çështjet e debatueshme

Gazi që nuk e morëm kurrë!

Mirë nafta, por pse u “cmend” domatja?!

Rivlerësimi i pasurive të patundshme:

Fermeri nga Divjaka, kryeministri dhe importi

7 arsyet ku çalon “Paqja Fiskale”

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjiri i Kakomesë, “Bukuroshja” e braktisur bëhet gati për TURIZËM

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Synimet e OSHEE: I pari KLIENTI, çfarë mendojnë ata për ne?

Nga Ilir Xhafaj

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?