28 apo 29 Nëntor Dita e Çlirimit? Letra e partizanit “ANONIM” përballë buletineve zyrtare të kohës

28 apo 29 Nëntor është Çlirimi i Shqipërisë nga Gjermanët? Për herë të parë publikohet letra e një partizani në 29 nëntor, kur flet për Shkodrën e çliruar atë mëngjes nga gjermanët. Por në buletinin e Luftës NacionalÇlirimtare, flitet për 28 Nëntorin si ditën e Çlirimit. Të gjitha këto debate, do të rihapen edhe njëherë në “Historinë e Shqiptarëve”, projekti më ambicioz i Akademisë së Shkencave që do të jetë përfundimtar dhe i zbatueshëm për të gjithë, pavarësisht tambureve të politikanëve në ditët e festive

Enver Hoxha deklaroi se “28 nëntori ishte dyfish një ditë e gëzuar, sepse në të njëjtën ditë shënohej si Pavarësia, ashtu edhe Çlirimi i vendit”. Që nga ajo kohë, Çlirimin e Shqipërisë në datën 28 nëntor e mbështetën jo vetëm njerëzit që drejtoheshin nga ai, por edhe historianë dhe dokumente që u lanë për të shënjuar mendimin e ish- diktatorit. Megjithatë pas rënies së komunizmit në vendin tonë, debati për datën e Çlirimit “u çlirua” nga zgjedha. Sot, e kësaj dite, politika mbetet ende e ndarë, ndërsa historianët përpiqen të zhveshin të vërteta të tjera përmes dokumenteve.