Zgjedhjet e 11 majit, Votat që ecën pa këmbë

Mëngjesin e 16 majit në Komisionin Qendror të Zgjedhjeve po merrnin frymë më lehtësisht. Pas maratonës rraskapitëse, numërimi më në fund kishte përfunduar dhe zyrat nisën t’i ktheheshin rutinës. Por qetësia u thye papritur nga stafi i protokollit. Zyra u “bombardua” me një lumë kërkesash për pamje filmike, kryesisht të procesit të numërimit. Plot 78 herë palët trokitën në derën e KQZ-së, me thirrje “urgjente” për çdo sekondë filmimi. Mes të parëve që kërkoi provat digjitale ishte Ilir Alimehmeti — një nga figurat “big” të Sali Berishës. Edhe pse numëronte mbi 18 mijë vota personale, ai nuk ia kishte dalë të siguronte një karrige në parlament. KQZ përgatiti videot dhe i shpërndau. Madje, pamjet u morën edhe nga disa eksponentë socialistë, edhe pse Edi Rama kishte urdhëruar të hiqnin dorë nga ky “turp, sepse rezultati nuk kishte asnjë shans të ndryshonte”. Një kopje të pamjeve siguroi edhe Fatmir Xhafaj, por ndryshe nga të tjerët, ai u kujdes të mos linte asnjë gjurmë në protokollin e Komisionit. Gjithçka duhej të mbetej në heshtje. Beteja për hapjen e kutive I zhgënjyer që Partia Demokratike nuk arriti të kapte pragun magjik të 14 mandateve, dhe me një fije shprese që ndoshta Jorida Tabaku kishte përfituar më shumë vota seç i takonin, mjeku Ilir Alimehmeti vendosi ta sfidonte realitetin duke kërkuar rinumërimin. Para tij shtriheshin dy rrugë drejt parlamentit: ose PD, gjatë hapjes së kutive, do të rikuperonte vota dhe do t’ia rrëmbente mandatin e dytë partisë “Mundësia” të Agron Shehajt, ose, në rrugën tjetër, do t’i duhej të “digjte” Jorida Tabakun. Por lufta brenda partisë ishte një fushë me tela me gjemba. Midis tij dhe Tabakut ishte një hendek prej 2400 votash, ndërsa, nëse “Mundësisë” do t’i shkurtoheshin vetëm 177 vota, Alimehmeti do të hynte në Kuvend si deputeti i 14-të i demokratëve. Asgjë nuk ishte e sigurt. Por për të, beteja kishte kuptim. Nuk mund të hidhte pas krahëve 18 mijë votuesit që kishin besuar tek ai. Çelësi i hapjes së kutive ndodhej në duart e dy anëtarëve të Komisionit të Ankesave dhe Sanksioneve (KAS) në KQZ. Partia Demokratike i kishte njerëzit e saj atje: Elvis Çefa dhe Ledio Braho. Por sharra ngeci në gozhdë që në nisje. Juristët e PD-së i prenë krahët Alimehmetit, duke i thënë troç se ankesat në KAS mund t’i bënte vetëm partia, jo një kandidat i saj. Nëse mjeku donte të hynte në rrugën e gjatë të rinumërimit, duhej më parë të merrte bekimin e Doktorit. Sali Berisha, njeriu që e di mirë se “vota vritet pa hyrë në kuti”, refuzoi. Kështu, juristët e PD-së e njoftuan Alimehmetin se partia nuk do të firmoste asnjë kërkesë ankimore për rinumërimin e Tiranës, pasi partia kërkonte shpalljen e zgjedhjeve të pavlefshme dhe përsëritjen e tyre. Në këto kushte, rinumërimi nuk kishte kuptim. Por mjeku i super-votuar nuk pranoi të mbyllte plagët në heshtje. I vetëm, vendosi të mos dorëzohej. Pajtoi dy avokatë, të cilët, në minutat e fundit të afatit, iu drejtuan KAS-it me kërkesën për rinumërim. Në të njëjtën udhë me Alimehmetin u futën edhe emra të tjerë të Partisë Demokratike: Lisandër Hoxhaj, Mimoza Hajdarmataj, Aulon Kalaja, dhe të tjerë. Por KAS ua rrëzoi të gjithëve kërkesat. Në sytë e ligjit, ata nuk legjitimoheshin për të kërkuar numërimin e votave. Kjo ishte një e drejtë ekskluzive e partisë. Pa partinë në krah, ata ishin asgjë. Madje edhe kur mbanin mbi supe mijëra vota personale. I vetmi që doli në mbrojtje të Alimehmetit ishte Ilir Rusmali, anëtar i KAS-it. Por vota e tij nuk mjaftoi. Ky vendim shpërtheu si një granatë në hapësirën mediatike. U fol për një pakt të heshtur mes Berishës dhe Ramës, për të mos i hapur kutitë. Presioni publik u rrit. Disa e akuzonin Doktorin se po i braktiste të vetët, ndërsa të tjerë thonin se, si Edi Rama, edhe Berisha po i shkelte liritë njerëzve të tij me të njëjtën dorë të hekurt. “Rebelët” demokratë, të vendosur ta sfidonin fatin edhe në Kolegjin Zgjedhor, përgatitën dokumentet. Por nuk qe më e nevojshme. Sali Berisha u tërhoq. Nuk donte të dëgjonte më akuza se PD-ja e tij nuk ishte më demokratike. Përmes një manovre juridike, ekspertët e PD-së bashkuan kërkesën e tyre me atë të Asllan Dogjanit. Kështu, dy anëtarë të KAS-it e hapën derën e blinduar të kutive. U urdhërua hapja e të gjitha kutive të Tiranës, rinumërimi i plotë i Fierit dhe një rinumërim i pjesshëm në Durrës. Në zyrat e KQZ-së ra rrufeja. Stafi shfrynte, ndërsa Komisioneri Ilirjan Celibashi urdhëroi të anuloheshin pushimet. Administrata duhej të hynte në një maratonë të re, të rinumëronte votat pa orar e pa fund. Për afro 30 ditë, çdo dorë ishte e angazhuar — nga recepsionisti deri te drejtori i përgjithshëm. Dy turne pune u vendosën, 200 mijë euro u shpenzuan vetëm për këtë operacion, që doli të ishte më i nxehtë prej kushteve klimatike sesa nga përplasja politike. Partia Socialiste, ndërkohë, heshti. Asnjë koment. Asnjë interes i shprehur publikisht për këtë aksion. Tre anëtarët e propozuar prej saj në KAS — Koli Bele, Ervin Lako dhe Ilir Rusmali — ishin të pafuqishëm me ligj për të bllokuar hapjen e kutive. Por rinumërimi i Tiranës i ringjalli shpresat e Blerina Gjylametit. Ajo që kishte humbur mandatin për vetëm 140 vota, ishte e bindur se i ishte bërë një padrejtësi, që i kishte hapur rrugën Olta Xhaçkës drejt Parlamentit. “Unë kërkoja rinumërimin bazuar mbi videot e regjistruara nga KQZ, sepse ato janë provat e votave gjenuine. Rinumërimi ju pranua subjektit politik nga KAS, por u vendos rinumërimi i fletëve në kuti, tashmë të manipuluara dhe jo i videove fillestare të KQZ dhe kështu fshihet vota gjeniun ”, - i tha Ilir Alimehmeti, Newsbomb, duke shprehur pakënaqësinë për mënyrën se si votat e numëruan. Hajduti bërtet “kapeni hajdutin”! Hapja e kutive tregoi se ata që ulëritëm më fort si viktima të një vjedhjeje elektorale, kishin qenë, në të vërtetë, përfituesit më të mëdhenj të votave të pamerituara. Partia Demokratike, që me flamurin e drejtësisë në dorë kishte kërkuar rinumërimin, doli të ishte humbësja më e madhe nga ky proces. Në Qarkun Tiranë, PD humbi 612 vota, ndërsa Partia Socialiste 380. KAS shpalli të pavlefshme qindra vota, të cilat, gjatë numërimit fillestar, komisarët e partive ia kishin dhuruar herë njërës palë e herë tjetrës, si monedha që kalon nga një xhep në tjetrin. Por plaga e vërtetë e kësaj historie ishin emrat e kandidatëve, që rezultuan të ishin mbushur me vota të tepërta. Në gjirin e demokratëve, figurat që kishin marrë më shumë se sa u takonte ishin Jorida Tabaku me 250 vota tepër dhe Ilir Alimehmeti me 137 vota plus. Madje edhe Elton Roshi, një kandidat në Kavajë, i cili me zë të lartë kishte kërkuar rinumërimin duke deklaruar se ishte i vjedhur, doli se kishte fituar 81 vota më shumë se ç’ishin haku i tij. Në kampin socialist, “kampioni” i votave të tepërta ishte ministri i Brendshëm, Ervin Hoxha, të cilit rinumërimi ia hoqi 303 vota. Edhe Fatmir Xhafaj, që kishte kërkuar me ngut pamjet filmike për të zbuluar ndonjë padrejtësi, u gjend i ekspozuar: hapja e kutive tregoi se ai vetë kishte marrë 234 vota më shumë se sa i takonin. Xhemal Qefalia, nga ana tjetër, trokiti në KQZ për të parë videot e rinumërimit, i bindur se Ornaldo Rakipi ia kishte rrëmbyer mandatin në mënyrë abuzive. Por KAS zbuloi se të dy kishin fryrë xhepat me vota të tepërta: 136 vota iu hoqën Rakipit, dhe 128 Qefalisë. Rezultati përfundimtar, megjithatë, mbeti i pandryshuar. Fituesit ishin po ata që kishte prodhuar numërimi i parë, i ngjyrosur nga numërues partiakë. Në Qarkun Fier, hapja e kutive shpalosi një panoramë edhe më të fortë se në Tiranë. Nëse në kryeqytet të dyja partitë e mëdha kishin përfituar vota jashtë bilancit, në Myzeqe ndodhi e kundërta: e vetmja që kishte shtuar vota ishte PD-ja, ndërsa PS-së i ishin bërë padrejtësi. “Masakra” e vërtetë ndodhi brenda vetë listave të kandidatëve, në atë luftë të heshtur ku shokët e të njëjtit flamur i rrëmbejnë njëri-tjetrit votat si copa buke në tryezë. Në kampin rozë, emri më i fryrë është ai i Ceno Klosit, të cilit i ishin shtuar qindra vota në procesverbale. Në anën tjetër, një emër thuajse i panjohur në arenën kombëtare, Silva Hasaj, doli se kishte bërë “kërdinë” mes demokratëve. Plot 671 vota, që nuk ishin të sajat, kishin rrëshqitur drejt emrit të saj, duke u rrëmbyer kandidatëve të tjerë të PD-së. “Unë mendoj që votat janë vullnet i qytetarëve, jo bukurshkrim. Unë si kandidat për deputet kam përgjegjësi të mobilizoj votuesit t’i çoj drejt kutive të votimit. Partia Socialiste me Edi Ramën mori 83 mandate. Pyetjen për mënyrën e votimit, teknikat, bukurshkrimin, duhet t’ja drejtoni KAS. Pastaj duhet ta keni të qartë: sikurse është theksuar në rekomandimet e OSBE/ODIHR, PS gjithmonë ka kërkuar depolitizimin e grupeve të numërimit. E ka penguar krahu tjetër. Këto zgjedhje, na nxorrën në pah një element që duhet ta marrim në konsideratë në procesin në vazhdim”, - tha Ervin Hoxha, ministër dhe kandidat fitues i Partisë Socialiste për Newsbomb përmes një komunikimi telefonik. Demokrati Ilir Alimehmeti mohoi të ketë përfituar vota në mënyrë të qëllimshme. “Votat që janë korigjuar duke u shtuar janë gabime kryesisht njerëzore në hedhje numrash në verbal dhe në sistem informatik. Votat që KAS hoqi ishin kryesisht vota reale ku votuesi e kishte shprehur vullnetin duke votuar në krah të mbiemrit. Me vendim administrativ KAS i quajti këto vota qëllimisht të pavlefshme edhe pse ato janë shumë të qarta të vlefshme”, - tha ai. Kundër mënyrës sesi KAS vendosi të shpallë të pavlefshme disa vota u shprehën publikisht edhe Erjon Braçe dhe Asllan Dogjani. Kandidatët e tjerë të pyetur për këtë çështje, nuk dhanë komente. “Nuk ka pasur orientim të partive për të zhvendosur votat nga një kandidat tek një tjetër”,- tha Ledio Braho, anëtar i KAS-it, duke u përpjekur të shuajë dyshimet. “Është punë tjetër nëse kandidatët vetë kanë bërë orientime të caktuara, apo vetë numëruesit kanë pasur simpati për emra kandidatësh dhe i kanë favorizuar ata”, - shtoi ai në një bisedë për NewsBomb. Në fund, hapja e kutive nuk ndryshoi rendin e fituesve, por hodhi dritë mbi një të vërtetë të pakëndshme: edhe aty ku bërtitet më fort “kapeni hajdutin”, mund të fshihen vetë duart që kanë abuzuar. Matematikë e dobët, apo djallëzi në kutitë e votimit? Rinumërimi i votave në zgjedhjet e 11 majit ka zbuluar një hartë groteske të lëvizjes së votave, ku dallgët shkojnë nga “gabime njerëzore” deri tek dyshimet për manipulime të mirëfillta. Ajo që doli në dritë është një realitet i trazuar: nuk ka ende një vijë të prerë që ndan votën e vlefshme nga ajo të pavlefshme, as një standard të hekurt që të thotë ku mbaron matematika e dobët dhe ku nis djallëzia politike. Në shumicën e qendrave të votimit, shifrat luhaten brenda kufijve modestë minus apo plus një, dy, tre, apo deri në dhjetë vota. Por ka edhe raste që nuk mund të shpjegohen me lapsuse. Në një qendër votimi, një kandidati i janë shtuar 45 vota, të marra nga kandidat tjetër. Ky “virus” ka infektuar të dy kampet e mëdha politike, duke hedhur hijen e dyshimit mbi integritetin e procesit. Zëri më i fortë që kërkoi hapjen e kutive, Ilir Alimehmeti, ka provuar mbi shpinë lëvizjen e votave si një tren që ecën herë mbrapsht, herë përpara. Në qendrën e votimi 1834, atij i ishin hequr 27 vota, ndërsa në qendrën 1816 i ishin shtuar 15. Jorida Tabaku ka pësuar të njëjtën luhatje numerike. Në katër qendra votimi i janë hequr nga 10 deri në 19 vota, ndërsa në katër të tjera, numëruesit i kishin “dhuruar” deri në 26 vota në një kuti të vetme. Absurdët nuk mbarojnë këtu. Në një qendër tjetër, 15 vota që ishin dhënë vetëm për Partinë Demokratike, pa asnjë emër kandidati, u transformuan nga numëruesit në vota preferenciale për Myslym Murrizin, me një të shkruar në procesverbal. Ky është një “kreativitet” që pak ka të bëjë me gabimet e thjeshta matematikore. Edhe emrat e ministrave nuk i kanë shpëtuar tundimit të lapsit. Ervin Hoxha, ministri i Brendshëm, ka rezultuar me 43 vota më shumë në qendrën 2084, vota të cilat i ishin hequr socialistes Mimi Kodheli. Fatmir Xhafajt i janë vjedhur 20 vota në një kuti dhe i janë shtuar 16 në një tjetër. As ministri më i votuar, Blendi Gonxhja, nuk ka dalë pa “ndihmën” e numëruesve: në qendrën 1803/03 i janë hequr 21 vota, ndërsa në disa të tjera i janë shtuar nga 12 deri në 20 vota. Por nëse Tirana mendon se ka monopolin e këtyre lëvizjeve, duhet të bëjë llogaritë me Fierin, ku përmasat marrin trajtën e një gare të ethshme mes “gabimeve” dhe qëllimeve të dyshimta. Në listën blu të Fierit spikat Silva Hasaj. Në total, 671 vota tepër i janë shtuar, ku disa lëvizje duken qartazi të qëllimshme. Vetëm në qendrat 2949 dhe 2977, Hasaj ka “fituar” nga 34 vota shtesë. Rekordi i saj është në qendrën 2962, ku numëruesit i kanë dhënë 46 vota më shumë, një rritje që nuk mund ta mbulojë dot retorika e “gabimeve njerëzore”. Silva Hasaj i tha Newsbomb se ishte e pakuptimtë që manipulimi të ishte bërë me qëllim, pasi numëruesit e dinin që një ditë më herët se PD nuk kishte nxjerrë asnjë deputet fitues nga lista e hapur. “Ri-numërimi ishte më farsitet sesa numërimi fillestar dhe u krye për qoka politike e për të dëmtuar imazhin e një opozitari të ri, në këtë rast imazhin tim. Unë jam kandidatja e vetme që kam marrë vota të konsiderueshme në të gjithë qarkun (pra jo vetëm në një zonë të caktuar) dhe për këtë jam sulmuar disa herë edhe gjatë fushatës, sepse jam konsideruar si pretendente reale. Dhe sigurisht për të kamufluar lëvizjet e shumta të votave mes kandidateve të Partisë Socialiste (ku 7 nga të cilët ishin në garë reale me njeri-tjetrin për mandat) kanë gjetur një "kokë turku" mes kandidatëve të opozitës për të justifikuar që lëvizje të tilla votash ndodhin në çdo parti” ,- tha Hasaj. Pas rinumërimit, socialistit Ceno Klosi, KAS i ka hequr 831 vota. Në qendrën 3095, Klosit i ishin shtuar 50 vota e në një qendër tjeter 85 vota. Pyetja që endet mes tavolinave të KAS dhe opinionit publik është e njëjta: janë këto devijime thjesht produkt i matematikës së dobët, apo një skenar i qartë për të manipuluar vullnetin e qytetarëve? Deri kur do të quhen “gabime njerëzore” ato që ndryshojnë fatin e mandateve? Sepse mes lapsit dhe djallëzisë, fitorja shpesh varet vetëm nga një numër i vogël votash. Ashtu siç ishte fitorja e Maldrita Bardhos me vetëm 10 vota avantazh nga rinumërimi, fitore që e gëzoi vetëm disa orë, dhe më pas, me “bujari” ja fali karrigen parlamentare koleges dhe rivales, Zegjine Çaushi. Amnisti për vjedhësit e votave Administrata e KQZ-së, me urdhër të KAS rinumëroi gati 45 % të gjithë votave të 11 majit, por askush nga stafi nuk ka mbajtur shënime për të veçuar “gabimet njerëzore” nga “manipulimet”. Zyra e Ilirjan Celibashit informoi se nuk mund ta bënte ai hapjen e dokumentacioneve zgjedhore dhe gjetjen e emrave të numëruesve të këtyre tavolinave ku lëvizja e votave është përtej gabimit matematikor. “Kjo është kompetencë e Komisionit të Ankimimeve dhe Sanksioneve. Ndaj për këtë do pyetur KAS. Komisioneri Shtetëror i Zgjedhjeve nuk ka asnjë tagër në këtë moment për të disponuar mbi gjetjet nga ky proces”,-tha z. Celibashi në përgjigje të një kërkese për koment. Por kjo u rrëzua nga anëtarët e KAS. “Nuk është kompetencë e jona të dërgojmë njerëz në prokurori”,-tha Koli Bele. “Ne nuk e dimë kush janë numëruesit dhe nuk e kuptojmë dot nëse janë të njëjtit njerëz që kanë numëruar të gjitha këto kuti me këtë tipologji. Aktet që shikojmë ne, nuk janë të mjaftueshme për një hap të tillë për përgjegjësi penale”,-tha Ledio Braho. Anëtarët e KAS theksuan se në çdo rast, prokuroria e Tiranës mund të veprojë kryesisht, dhe si ata, si Komisioneri Celibashi nuk po përgatiten të dërgojnë për verifikime në organin e akuzës përmes kallëzimeve, numëruesit e qarkut Tiranë. Por nëse në kryeqytet të gjithë janë bashkë për një amnisti, në Fier, dielli nuk mbulohet me shoshë. Zhvendosja e votave me 50 apo 85 plus për një kandidat, nuk mund të kalojë me një mbyllje syri. Ndaj, anëtari i KAS, Ledio Braho, njoftoi se personalisht do të dorëzojë këto raste në prokurorinë e Fierit. “U takon atyre të shkojnë më tej, përmes sekuestrimit të kutive të materialeve zgjedhore apo marrjen e provave të tjera për llogari të hetimit. Unë do ta bëj këtë, edhe sikur asnjë nga kolegët e tjerë të KAS, të mos më bashkohet,”-tha Braho. Humbën vota nga rinumërimi PS Ceno Klosi 831 Ervin Hoxha 303 Fatmir Xhafaj 234 Blendi Gonxhja 179 Ornaldo Rakipi 136 Xhemal Qefalia 128 PD Silva Hasaj 671 Jorida Tabaku 250 Ilir Alimehmeti 137 Lorenca Hoxha 95 Elton Roshi 81 Myslym Murrizi 57

Zgjedhjet e 11 majit, Votat që ecën pa këmbë

Nga Esiona Konomi

Artikuj të ngjashëm Artikuj

Lufta me Bulevardin

Demokratët vendosin, Berisha Forever!

3 italianët e protestës së PD: Qëlluam policinë me patate, për solidaritet!

PS, 11 rastet e “Ndarjeve të bujshme”

Tirana, Besnikëri, apo Rebelim?

Dimri i Madh i Edi Ramës

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Vajzat e humbura

Lufta me Bulevardin

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Sabri Godo, veç “SKËNDERBEU”-t ju rrëfej betejat e mia me kalë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Zgjedhjet e 11 majit, Votat që ecën pa këmbë

Nga Esiona Konomi

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?