Sabri Godo, veç “SKËNDERBEU”-t ju rrëfej betejat e mia me kalë

INTERVISTA E FUNDIT PËR JETËN

RETROSPEKTIVË

Të merr malli të shohësh në ekran njerëz të mençëm si ai. Plaku i urtë Sabri Godo vjen në këtë numër të Revistës Newsbomb përmes një interviste realizuar nga gazetarja Rezarta Reçi në vitin 2009, dy vite para se të ndahej nga jeta, kur ishte plot 80 vjeç. Sabri Godo lindi në vitin e largët 1929 dhe u nda nga jeta në dhjetorin e vitit 2011, në moshën 82 vjeçare, pas luftës me tumorin në mushkri. Për brezat e rinj, që enden nëpër informacione “fast” të internetit, pakush mund të ketë njohuri të thelluara për njeriun që me të drejtë është konsideruar “Babai i Kushtetutës” së Republikës së Shqipërisë (1998), njeriu që nuk rreshti në 20 vitet që jetoi në demokraci për të çuar të drejtën e pronës tek pronarët legjitimë, e duke shfaqur konservatorizmin në mënyrën më paqësore të mundshme. Brenda syve të tij të mëdhenj, shpeshherë të lotuar, në qindra intervista prej babaxhani, plaku i urtë Sabri Godo fshihte një botë të tërë vuajtjesh, si në komunizëm, dhe në demokraci.