Të varfër në letra, të pasur në jetë, zbulohen rrogat e futbollit elitar

Kategori e Parë apo Abissnet Superiore? Duket si një pyetje që i bëhet një fëmije për të zgjedhur mes një lodre të thjeshtë dhe një të shtrenjtë, ku përgjigja është e pandryshueshme: Më të mirën! Futbolli në Shqipëri ka evoluar, ka njohur progres duke u bërë i njohur edhe për Europën. Po, edhe në vendin tonë luhet, ka pasion, dëshirë dhe ëndrra për të bërë përpara. Megjithatë hendeqet mes elitës dhe kategorive inferiore janë vërtetë të mëdha.

Gashi (Gugash Magani) kishte marrë një telefonatë si në çdo kohë merkatoje. E njihnin si ekspert në fushën e trajningut, por dyshimet për një projekt të qëndrueshëm i ngacmonin gjithmonë trurin. Drejtuesit e Egnatias ishin të bindur se ai do të arrinte të krijonte një grup kompakt për të sjellë mes më të mirëve, rrogozhinasit. Magani kishte eksperiencën e nevojshme për të drejtuar një skuadër në kampionatin shqiptar, mirëpo stofi i elitës dukshëm i rri më bukur veshur. Si një peqinas i palëkundur, ai i tha “Po” sprovës që e priste. Kishte provuar edhe vetë për shumë vite të luante në moçalet e shumë stadiumeve në Shqipëri, por kishte pasur edhe mundësinë të provonte emocionet në legjendarin “Qemal Stafa”, asokohe më i miri në vendin tonë. Fillimisht duhej formuar grupi që do të kontribuonte për të sjellë në Superiore Egnatian. Njohjet i kishte të shumta. Telefonatën e parë e pati me presidentin Agim Demrozi: “Do të më thuash sa buxhet kam, më duhet të marr lojtarët”. Në dispozicion të tij u vu një shumë e konsiderueshme, por asesi nuk ishin si ato shifrat me shumë zero si në Superiore. “Një skuadër e mirë fillon gjithmonë me një kapiten të fortë”, mendonte ai me vete. “Do të marr dikë që të më ndriçojë udhën drejt Superiores. Madje nuk duhet ta zgjas. Po e kontaktoj menjëherë”, vijonte më tutje duke pasur në mendje Ndriçim Shtubinën, mesfushorin e Vllaznisë që në elitë kishte qenë gjithmonë në të njëjtin nivel. 34-vjeçari u njoh me ofertën e drejtuesve rrogozhinas. Ishte e papërfillshme krahasimisht me atë që ishte mësuar në elitë.