Superiore, kampionati që s’pyet për fanelë

Kur filloi ky sezon i “Abissnet Superiore”, askush nuk e kishte menduar se fundi i tij do të kishte kaq shumë nerv, kaq shumë dramë dhe mbi të gjitha, kaq shumë pabarazi mes emrit dhe rezultatit. Tani, kur kanë mbetur vetëm dy javë për të mbyllur fazën e rregullt, gjithçka është në lojë. Në fushën e stadiumeve shqiptare, asgjë nuk është e sigurt dhe kjo është ndoshta hera e parë që kampionati po ndjek një logjikë të çuditshme, duke vënë paralelisht meritën me traditën.

Tre skuadra e kanë prerë biletën për “Final 4”. Egnatia, kampionia në fuqi që nuk e ka bujën mediatike, por që çdo javë është rritur në heshtje, kryeson me 58 pikë. Aty pranë, Vllaznia dhe Dinamo me 55 duke siguruar vendin mes më të mirëve. Por, historia e tyre është e ndryshme. Vllaznia luan me pasionin e qytetit dhe me kujtimin e lavdisë së dikurshme, ndërsa Dinamo një emër i madh, por me një projekt të ri që ka nisur të japë frytet e veta. E megjithatë, këta nuk janë protagonistët e vërtetë të këtyre javëve të fundit. Jo, sepse drama më e madhe ndodh më poshtë, atje ku Partizani dhe Elbasani po luftojnë për vendin e katërt, të fundit që çon në fundin e artë të sezonit. Të kuqtë kanë pasur shumë oshilacione. Historia dhe fanela me sa duket nuk do të mjaftojë këtë edicion, nëse nuk do derdhet mund dhe djersë. Elbasani ka urinë dhe momentin. Çdo ndeshje që vjen, është një përballje psikologjike, ku presioni vret më shumë se kundërshtari. Një gabim i vogël, një penallti e humbur apo një karton i kuq në kohën e gabuar mund të jetë dallimi mes “Final Four” dhe harresës.