Si nisi turizmi?! Të huajt: Natyrë e mrekullueshme, njerëz të kqinj e për të të rrjepur!

Shqiptarët “zyrtarë” e zbuluan Shqipërinë e bukur Turistike në fillim të viteve 1920, anipse, përpara tyre kishte shumë udhëtarë të rëndësishëm për kohën që kishin shkruar për vendin e shqiponjave. Diplomati Fransua Pukëvil në 1806, poeti i famshëm anglez Lord Bajroni, arkeologu Uilliam Marin Lik, apo edhe mjeku Henri Holland; duhet përmendur edhe Carl Patsch, Antonio Baldacci, Edith Durham, deputeti anglez Aubrey Hebert apo deputeti Francez Justin Godart… të gjithë të mahnitur me Shqipërinë.

Tentativa e parë e promovimit të turizmit në vend, ishte ajo e qeverisë së dalë nga zgjedhjet parlamentare të 1921, ku Ministria e Punëve të Brendshme ndërmorri një iniciativë për të fotografuar vendet më të bukura të vendit e për t’i botuar ato në një album, por iniciativa nuk u çua deri në fund. Megjithatë, iniciativa shërbeu si një pikënisje për të folur gjithnjë e më shumë në zyrat qeveritare e faqet e gazetave të kohës, për rëndësinë që duhet t’i jepej këtij sektori të ri në jetën ekonomike të Shqipërisë.
“Secili shqiptar pra sa do larg qendrave të banojë, lypet ta dijë se ai, i hueji, qi viziton katundin, lagjen e malin e tij, vjen për t’i sjellun nji fitim e dobi e se prandej duhet t’i shërbejë me andje dhe pa pretendue shpërblime të tepërta për shërbime qi mund t’i kërkojë apo sende qi dishiron të blejë”.
Kjo ishte një nga thirrjet e para që u drejtohej shqiptarëve në gazetat e viteve 20-të, duke shënuar hapat e para të fillimit të propagandës për sensibilizimin e ardhjes së turistëve në Shqipëri.