Mirësevini në DURRES, kryeqytetin e Turizmit shqiptar

Në një pjesë të bukur të bregdetit shqiptar, ku valët e detit Adriatik përplasen me përkëdheli mbi rërën e artë, shtrihet një qytet 3000 vjeçar, që ngërthen në vete jo vetëm pasuritë natyrore, por edhe ato historike. E kam fjalën për qytetin e bukur të Durrësit, ose thënë ndryshe për kryeqytetin e turizmit në Shqipëri.

Qysh në vogëli një ndër frazat të cilat kam dëgjuar më së shumti nga prindërit e mi, kur binte fjala për durrsakët, ka qenë: “Lum ata, afër detit, afër mbretit”.  Duke qenë se jam një vajzë e lindur dhe e rritur në një nga qytetet më juglindore të vendit tonë, në Bilisht, i rrethuar nga male dhe fusha me të mbjella, ku acari dhe bora të mbulonin në dimër dhe flladi i freskët ishte shoqëruesja jote pothuajse gjatë gjithë verës, kjo frazë merrte kuptim gjatë pushimeve të mia verore.