VLORA, “zonja e shtëpisë” për NËNTORIN e FLAMURIT

Respekti, mikpritja dhe tradita për shqiptarin janë të shenjta! Mikun e vendosin mbi krye dhe amanetet e të parëve zor se i lënë anash. Prandaj dhe shumë patriotë, kudo ku ndodhen, përtej kufijve shqiptarë për festat e nëntorit rikthehen në atdhe e rruga i çon ku tjetër, përveç në Vlorën e bukur, në Vlorën e Ismail Qemalit! Vlora është tërheqëse në çdo stinë, si në pranverën lozonjare kur në çdo cep të qytetit ndjen aromën e detit të ndërthurur me atë të luleve të freskëta, e njëjtë në verën e nxehtë kur bëhet “zonja e shtëpisë” për qindra e mijëra turistë. Por, periudha në të cilën të gëlon zemra është vjeshta, pasi flamujt kuqezi valviten kudo, nëpër institucione e nëpër ballkonet e vlonjatëve besnikë e patriotë.

Jo më kot, Newsbomb vendosi që këtë nëntor të udhëtonte drejt Vlorës për të përjetuar nga afër emocionet e festave dhe për të zhvilluar një bisedë me djalin nga Vlora, Ermal Dredhën, mbi shpatullat e të cilit prej një viti është vendosur pesha e një qyteti, ditët e të cilit nuk janë njësoj, pasi përveç syve të qeverisë dhe kryeministrit Edi Rama, për të cilin e dimë që Vlora është dhe “pika e tij e dobët” , investitorë të shumtë janë magjepsur nga kjo perlë e vendit tonë. Duke ecur në gjurmët e të atit, Neki Dredhës, Ermali është pranë qytetarëve të tij, kurdoherë, në çdo festë e në çdo fatkeqësi dhe është zotuar që ta bëjë qytetin e tij më të mirin, siç ka ëndërruar dhe siç i ka hije të jetë. E ashtu si është thënë dhe në tekste këngësh Vlora është qyteti me kurorë, qyteti unik që laget nga dy dete, qyteti i rërës, gurëve, maleve, kulturës e traditës, por mbi të gjitha qyteti i patriotizmit dhe ai i cili ka “lindur” për të qenë i bekuar. Emri i mirë i Vlorës dhe vlonjatëve i ka kapërcyer prej kohësh kufijtë. Kudo që mund të shkoni, sapo të huajt mësojnë se je shqiptar, ndalin për një moment dhe të drejtohen: “Aaaa Vlora!”.