Kadare e ka ngritur monumentin e tij në Gjirokastër

Pas ikjes së Ismail Kadaresë nga kjo jetë, në këto ditë të trishta për Shqipërinë e për kulturën e saj, boshllëku është më i madh dhe më i trishtë për Gjirokastrën dhe gjirokastritët. Më në fund të gjithë u bindëm se gjeni të tillë lindin rrallë në jetën e një kombi. Ikja e tij, jo vetëm që na ka lënë pas një humnerë shpirtërore, por ne duhet të mësohemi me këtë mungesë se, këtej e tutje, hija e tij do të na ndjekë kudo përmes leximit të letërsisë së krijuar prej penës dhe mendjes.

Natyrish që është e vështirë të ndahemi prej tij. Unë dua të rikujtoj lidhjen e tij të fuqishmë shpirtërore që kishte më vendlindjen. Kadareja dhe vendlindja e tij Gjirokastra kanë ruajtur reciprokisht një marrdhënie të pazakontë. Në historinë e letërsisë botërore nuk njihet një autor apo rast tjetër në botë që ta ketë qytetin ku ka lindur objektin dhe subjektin kryesor të krijimtarisë së tij më të përkryer letrare.