Rrogëtarë të shtetit e pleqtë milionerë, si po degjeneron skandali i plehrave

24 kompani fiktive që kanë lëvruar afro 19 miliardë lekë kanë pasur pronarë një punonjës komunaleje të Tiranës, një vajzë police, e shumë pleq, njëra prej të cilave ka ndërruar jetë; një tjetër çoban lopësh në Greqi; një çift pensionistësh të pastrehë; një të moshuar azilante që e ka braktisur i biri, apo edhe një invalide që mbledh kanaçe në Tiranë. Skandali i Inceneratorëve po njeh përmasa të papara ndonjëherë në Shqipëri. SPAK hesht, kryeministria hesht, bashkia hesht, policia hesht, media hesht… qytetarët protestojnë në rrjetet sociale

Santiliano Çifliku ishte vetëm 27 vjeç kur u paraqit në një zyrë noterie në Berat në 2015-ën, për të rregjistruar një kompani ku ai vetë do të ishte pronar dhe administrator. Kompania AL-BER CO&CO do të zhvillonte aktivitetin e vet në qytetin e Beratit, në një gamë të gjerë fushash, nga ndërtimi tek transporti.

Në ekstraktin e QKB duket qartë firma e tij naïve vendosur mbi dokument. E shkruar me dorën e vet Santilianos, fiksohet emri dhe mbiemri i tij, e siç mund të konstatohet me sy të lirë, firma ka deridiku pamjen e një zhgarravine.