Ringjallja e Doktorit, një protestë korriku që lajmëron vjeshtën e nxehtë politike

Protestat e opozitës në Bulevard janë shoqëruar gjithnjë me debatin mbi numrin e pjesmarrësve. E enjtja e 7 korrikut nuk i shpëtoi këtij debati. Megjithatë, pati një konsensus nga të gjithë anët, se shumë njerëz zunë vend në tubimin e thirrur nga Sali Berisha, atë mbrëmje ku temperaturat ishin rreth 35 gradë. Një manifestim inagurues, që siç e cilësoi kreu i demokratëve, ka si synim final rrëzimin e Edi Ramës. Të tjera do të ketë në vijim, por ndoshta jo përpara shtatorit, duke marrë parasysh se fundi i korrikut dhe gushti e zbehin nervin politik duke e çuar në pikën zero. 7 korriku solli rikthimin e Sali Berishës në Bulevard, në rrugë, aty ku ai ka një përvojë të çmuar. Nga ana tjetër, ishte noterizim zyrtar tanimë se Opozita drejtohet prej tij, dhe se ai është aktori i dytë politik në vend, pas Kryeministrit. Edhe më skeptikët e pranuan se populli opozitar ju përgjigj Berishës dhe njerëzit u rreshtuan në shumicë prej Kryeministrisë përgjatë pjesës veriore të Bulevardit, deri pranë sheshit Skenderbej. Organizatorët u kujdesën që në krye, që ky akt revolte ndaj qeverisë të kishte fytyrë sociale dhe ekonomike, por sigurisht se kur në drejtim është opozita, marshimi merr në fund tiparin mirëfilli politik, dhe për këtë nuk la asnjë moment dileme vetë lideri i demokratëve, me mesazhin që përcolli. Pluralizëm mesazhesh Gjatë drejtimit të PD nga Lulzim Basha askush nuk mund të thotë se protestat kanë munguar, apo se kanë qenë të vogla. Problemi është se me to, nuk është arritur ndonjë objektiv politik domethënës, përveç rastit të çadrës. Protestat e Bashës kanë patur po ashtu një veçori. Kishte një përkujdesje gati tiranike për mesazhin. Duhej të ishte i artikuluar qartë, e çdo zë të rrotullohej rreth tij. Ish-kreu i demokratëve ka qenë i fiksuar deri në mani në këtë drejtim. Në protestën e 7 korrikut, dhe në ditët që i paraprinë asaj, u vu re një larmi, një pluralizëm mesazhesh. Edhe pse lajtmotivi ishte përmbledhur në dy fjali; “Shqipëria në rrezik”, dhe; “Mos thuaj ç’më duhet mua”, gati çdo kontribues, folës, thirrës, u la i lirë të thoshte arsyet pse ishte aty, pse kërkonte largimin e qeverisë. E pati një laryshi me përmbajtje në ato dy orë të darkës, një grumbull përmbajtjesh, që buluroi nga mikrofonat e protestës. Nga çmimet, tek reforma në drejtësi, tek Sorosi, e vlerat konservatore. Aktivistë të shoqërisë civile pasuan njëri-jetrin në podium e lëshuan revoltën. Adresimi politik nisi të konturohej prej dy folësve nga PD, që qenë përzjedhur të ishin Belind Këlliçi e Agron Shehaj, të dy që nuk ja dolën të fitonin garën për nën-kryetar, përballë Luçiano Boçit e Oerd Bylykbashit. Lakonik, Shehaj tha se qytetarëve u duhet ofruar alternativa e ndershmërisë. Ndërsa Këlliçi ishte më denoncues, duke akuzuar qeveritarët, Ramën e Veliajn, se po e vrasin Shqipërinë. Kjo përgatiti terrenin për ngjitjen në skenë të Sali Berishës, i cili bëri publik qendrimin aspak të moderuar në lidhje me qeverinë. Ai shpalli se Edi Ramën, e ka armik. “Ne jemi armiq” Sali Berisha tha se arsyeja kryesore e kësaj proteste ishte shkundja, ndërgjegjësimi i pjesës së heshtur të shoqërisë, dhe ftesa që ata të bashkohen për të shpëtuar Shqipërinë. Mirëpo, në një moment, ai e emëtoi pikën më të fortë të qëndrimit, ç’ka do të jetë me gjasë një gur themeli për raportet me mazhorancën, dhe do të tregojë se çfarë stine të nxehtë politike do të kemi në vijim. Ai i tha Edi Ramës, që nuk janë kundërshtarë, rivalë, por armiq. “Edi Rama, ne të dy jemi armiq, është e rëndë ta them këtë, por zemra ime fjalë tjetër nuk nxjerr. Ti do vetëm pushtetin, ndërsa une me këta burra e gra, djem e vajza, kemi parim lirinë dhe vetëm lirinë”, u shpreh lideri i demokratëve. Jemi armiq, shtoi Berisha, sepse ti e do pushtetin për t’u pasuruar e varfëruar Shqipërinë, ndërsa ne duam lirinë për të zhvilluar vendin. Kjo kthesë radikale nënkupton shumë gjëra, por mbi të gjitha se nuk do të jetë e lehtë ulja në tryezën e bisedimeve për çështje ku palët në këto vite kanë patur vullnetin të merren vesh. Dhe sidomos, tregon se kur kjo të ndodhë, Berisha nuk e ka ndërmend të dalë nga tavolina pa marrë rezultatin që dëshiron. .... Deputetët skeptikë Nëse një nga synimet e protestës ishte bashkimi mes vetë demokratëve dhe afrimi i deputetëve që janë skeptikë me Berishën, e anojnë ende nga Basha, mund të thuhet se në këtë sens u arrit jo pak. U vunë re në protestë, edhe përfaqësues si Jorida Tabaku, që nuk është dakort me kursin e politikat e doktorit, për të cilat, ajo u kujdes më tej, në dy ditët që pasuan të bëjë publike vendosmërinë e saj, me disa shënime në rrjetin social, ku mori shumë kontestime prej demokratëve. Deputetët që ngelen dyshues ndaj Berishës e s’janë pasues të tij mirëfilli, e që u paraqiten me 7 korrik, ishin: Flamur Hoxha Jorida Tabaku Alfred Rrushaj Helidon Bushati Saimir Korreshi Emilia Koliqi Merita Bakiu Tomorr Alizoti Xhelal Mziu Dashnor Sula Bledion Nallbati Fatjon Veizaj Kastriot Piroli Lefter Geshtenja Greta Bardeli Lindita Metaliaj Zef Hila Dhurata Çupi Çfarë arriti Berisha Berisha arriti jo pak me protestën e 7 korrikut. Ai është cilësuar dhe damkosur prej një viti edhe në shkelje të një etike njerëzore, si i vdekur, si pastë dritë, si katran me bojë, e plot epitete të ashpra prej Ramës e pasuesve të tij. Më anë tjetër, jo pak kanë menduar se i shpallur non-grata, lideri i demokratëve do ta kishte të pamundur të ngrinte sërish krye, e jo më të rikthehej në fuqi. Pjesmarrja masive mbrëmjen e 7 korrikut, ishte si përgënjeshtrim i athët për shumëkënd. Ishte po ashtu një mesazh i qartë për ata që e duan jashtë politikës, se nuk i kanë bërë llogaritë mirë. Gjithashtu, debati brenda kampit demokrat mori fund një herë e mirë. Askush tjetër tanimë nuk mund të pretendojë fronin e kryetarit, në atë parti, në atë strukturë, në atë formacion politik. Do të ishte qesharake, dhe diabolike, të kapësh tanimë në artifica, në elementë të tjerë, apo në vendime gjykatash, për të mbajtur nën kontroll Partinë Demokratike. Ata që janë kjo parti, e demonstruan se kë duan në krye, e si dëshirojnë t’i udhëheqë. Pra pas 7 korrikut, është botërisht e qartë, se nuk ka më dy PD, dhe marrin fund diskutimet me; po sikur. Një arritje tjetër mund të konsiderohet edhe kursi i ri i shpallur. Ajo çka dihet me siguri është se Sali Berisha nuk tërhiqet, dhe e çon deri në fund një projekt. Pas shpalljes armik, që i bëri në Bulevard, Rama me gjasë, do të duhet ta marrë në konsideratë PD-në dhe opozitën. Nuk është më në selinë blu ai djali i mirë, të cilit ja prish marrëveshjet, një ditë pasi i ke firmosur. Sinjalet e forcës që Berisha i dërgon Ramës, vijnë bash në momentin që ka nisur diskutimi i reformës zgjedhore dhe territoriale. Aty ku opozita do të duhet të korrë maksimumin, për të patur rezultate në betejën më të afërt, që janë zgjedhjet vendore të pranverës së vitit të ardhshëm. Për të cilat, Berisha s’do të humbë asnjë minutë kohë, duke qenë se kandidatët do të dalin herët, me primaret që do të zhvillohen në shtator. Me protestën e 7 korrikut, Sali Berisha gjithashtu konfirmoi aleatët e tij, ata të vegjlit pranë PD, dhe më e rëndësishmja, LSI-në, kryetarja e së cilës qendroi në krah të liderit demokrat gjithë kohës. Tani ata që kanë besuar se të vdekurit nuk i shkon njeri pas, do të duhet të bëjnë strategji të tjera politike.

Ringjallja e Doktorit, një protestë korriku që lajmëron vjeshtën e nxehtë politike

Nga Newsbomb.al

Artikuj të ngjashëm Artikuj

Tigri nxjerr dhëmbët, drejton gishtin drejt Veliajt

Gratë që vunë përpara burrat

Veliaj vs Belind, Kush mashtron më shumë?!

Fushatë “pa ethe”, Minxhozi, Çani, Abilekaj e Rakipi skanojnë zgjedhjet

Revolucioni i ftohtë i shkurtit

Gratë që tradhëtuan “Rilindjen”

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Tigri nxjerr dhëmbët, drejton gishtin drejt Veliajt

Gjiri i Kakomesë, “Bukuroshja” e braktisur bëhet gati për TURIZËM

MARK PALNIKAJ, INXHINIERI QË “ZHVARROS” ARKIVAT E VATIKANIT

Gratë që vunë përpara burrat

Inva Mula: Unë sopranoja e parë shqiptare në skenat evropiane

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Ringjallja e Doktorit, një protestë korriku që lajmëron vjeshtën e nxehtë politike

Nga Newsbomb.al

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?