Rënia e PD/ Votat zhdukin Yjet e doktorit!

Pushteti i gjatë të konsumon, ndërsa opozita e gjatë të degradon. Disfata e rëndë elektorale duket se do i kushtojë rëndë drejtuesve politike të PD, atyre që premtonin se do të ishin e ardhmja. Zgjedhjet patën padyshim probleme, po ato nuk e jufitikojnë humbjen e thellë të 11 Majit. Revista Newsbomb, bën një profil të atyre që ishin në krye të qarqeve, ku PD u dëmtua më rëndë… Pushteti i zgjatur konsumon, kjo është një tezë që dihet. Vetëm se në rastin e Shqipërisë po rezulton se më konsumues është qendrimi i gjatë në Opozitë. Teksa kishte mbyllur 3 mandate jo pak problematike, pas 12 vitesh qeverisje, Edi Rama e pa veten në rritje në zgjedhjet e fundit të 11 majit. Dhe ajo çka ishte më dramatike, qe rënia e Opozitës. Plot 9 mandate më pak - ka sot PD - në krahasim me 4 vite më parë. Ndërsa Edi Rama, 9 mandate më shumë. Mund të ketë pa fund arsye, dhe analiza duhet të jetë e gjatë për të shpjeguar se si pas 12 viteve në qeverisje, Taulant Balla duket më pak i konsumuar se sa fjala vjen Flamur Noka, (edhe pse ky i fundit ka qënë vetëm një herë ministër në 2 vite); se si Mazniku shfaqet më i freskët se Alizoti, Gjiknuri më vital se Leskaj; apo se si Belinda Balluku pas 3 mandateve ekzekutive vjen më energjike se Gaz Bardhi. Edhe pse nën shumë akuza e denoncime, ekipet e rilindjes dhe emrat, edhe në veçanti, kanë ditur të ruajnë një lloj “shkëlqimi”, e të jenë më të pranueshëm për shoqërinë se sa portretet drejtuese të PD. Në këtë llogjikë, paçka pse prej 26 vitesh në karrige pushteti, ku 12 të fundit me gjithë levat në dorën e tij, Edi Rama perceptohet në publik si më pak i konsumuar se sa Sali Berisha që ka pasur vetëm 13 vite pushtet. Ka diçka që nuk shkon me PD dhe me Opozitën. Të gjitha rrethanat duhet të sillnin rritjen e saj. Por ka ndodhur e kundërta. Pas betejës së fundit elektorale pak duket se në selinë blu po bëhet kjo pyetje, ky reflektim. Ata janë fokusuar në denoncimin e asaj që e quajnë farsë zgjedhore dhe masakër elektorale, më e madhja e 30 viteve. Heshtja e gjatë e Gazment Bardhit Në zgjedhje të gjithë e dinë se ka një periudhë heshtjeje parazgjedhore. Pra e shtuna dhe dita e votimit. Pas 11 majit, kemi parë se paska dhe heshtje shumë të gjatë paszgjedhore. Ku më i spikaturi nga drejtuesit e PD në këtë drejtim ngjan Gaz Bardhi. Kaluan shumë ditë, dhe asnjë reagim prej tij. Rezultati ishte i pabesueshëm. Kur shkoi 11 me 5 në favor të pushtetit, dukej një xanxë e rëndë. Ama nuk u ndal aty. 12 mandate për PS dhe vetëm 4 për PD, janë një rekord historik për të dy palët. Vetëm se Belinda Ballukun e çojnë në zenit, duke e konfirmuar si politikane me aftësi elektorale, ndërsa Bardhin në greminë politike, me rezultatin më të dobët ndonjëherë në këtë qark. Ringritja e tij brenda radhëve të demokratëve besohet se do të jetë e siziftë, pas këtyre zgjedhjeve. Profili i gatuar mirë me argumenta dhe denoncime të forta, me integritet të pacënuar, në fund duhet konfirmuar dhe rritur në votë, në elektorat. Pa këtë përmasë, nuk ecet në politikë. Eshtë më e rendësishmja nga të gjitha. Por çfarë ndodhi me Bardhin? Figura e tij politike nuk ngjiti te demokratët e qarkut të Fierit. Madje, në shumë raste, ishte thuajse e padukshme. Jo për shkak të zonës, por për shkak të neglizhimit me strukturat vendore demokrate. Të gjithë e dinë se Gaz Bardhi dhe Luan Baçi, një demokrat i vjetër i hershëm në qark nuk komunikonin fare me njëri tjetrin. Edhe nëpër takime veç sa dukeshin bashkë, por në fakt, me lobe-lobe, ku të hidhnin fjalë e romuze në pritje të dështimit të gjithsecilit. Dhe, dështuan bindshëm që të dy. Fenomeni “Zeqine” me romuze e ironi pati efektin e vet në këtë fushatë. Gaz Bardhi zgjodhi të mos përgjigjej për akuzat dhe ironinë e saj. U bë e qartë se strategjikisht socialistët zgjodhën të mos krijohej përballja Bardhi – Balluku, por Bardhi – Zeqine. Nga kjo përballje, doli më e fituar Zeqineja, që u bë aq popullore në zonë, aq sa fitoi edhe mandatin. Tomorr Alizoti, jo për terren Një nga personazhet simpatikë të PD, deri me 11 Maj, ishte Tomorr Alizoti. Ai ka spikatur në debate televizive, dhe me fjalime në parlament. Replikat me Edi Ramën, kanë qënë të forta e disa prej tyre vijojnë të qarkullojnë në rrjet. Shtoi kësaj dhe prejardhjen e tij nga një derë e njohur dhe e fisme, dhe e persekutuar e vendit, si ajo Alizoti. Gjithçka perfekt. Problemi është terreni. Aty bien një e nga një gjithë elementët dhe del në pah dobësia për të drejtuar fushatë, për të krijuar besim, për të ndërtuar raporte me faktorë, me njerëz. Rezultati i Elbasanit ishte dramatik po ashtu. Edhe këtu pati rritje të PS dhe pamundësi për të nxjerrë deputetë listën e mbyllur, atë që konsiderohej si e sigurtë. Ky erozion ka shumë faktorë. Po në fund, kur analiza të bëhet një ditë, do t’i vishet si faturë Alizotit, i cili pas kësaj disfate vështirë e ka të vështirë të ruajë statusin e yllit në ngjitje në qiellin e demokratëve. Parlamentit i duhet një zë i spikatur si ai i Alizotit. Por u pa qartë se katapultimi i tij në një zonë ku kishte hedhur themele të forta Luçiano Boçi, ishte zhgënjim total. Dhe në këtë qark, fundi përveç rezultatit, ishte dramatik edhe në strategjinë e komunikimit. Pamjet e sherrit në mitingun përmbyllës të fushatës, ku njerëzit e Alizotit ziheshin e rriheshin me njerëzit e Luçiano Boçit, i dha një dorë të mirë humbjes së zgjedhjeve. Shtoi kësaj faktorin “Dashnor Sula” e “Alesia Balliu”, që bënë gjithçka mundën të mos pushonin asnjë ditë të fushatës me akuza për drejtuesit e PD. Siç dukej se ishte parathënia e fushatës, ashtu u pa qartë që ishte edhe fundi i saj. Bujar Leskaj është zhdukur A e ka parë kush Bujar Leskajn pas zgjedhjeve të 11 Majit? Eshtë një pyetje që bëhet në ambjentet mediatike. Përgjigja është jo. Sepse drejtuesi demokrat për Vlorën, nuk shfaqet askund. Ai as ka thënë që votimet ishin farsë, maskaradë, dhe as se zgjedhjet u blenë. Me këtë sjellje, në një farë mënyre ai ka pranuar rezultatin. Ku PS pati edhe këtu ngritje, e PD rënie të fortë. Bujar Leskaj ndoshta u mjaftua me faktin se ishte në krye të listës së demokratëve dhe vendin e tij në parlament e kishte të garantuar. Nga ana tjetër, zgjedhjet e kryera në strukturat e PD, me primaret që nuk u morën parasysh, nxorrën zbuluar neglizhencën e njerëzve që u impenjuan seriozisht në proces. Ina Zhupa ruajti statusquo-në e vet në Sarandë, por në Vlorë, demokratët nuk u ndjenë. Më shumë u përplasën dhe kërkuan vota kandidatët socialist me njëri tjetrin, sesa u dukën Bujar Leskaj dhe të tijët në rrugët e Vlorës. Mziu bie në Radikë Xhelal Mziu konsiderohet si mjeshtër i terrenit dhe me eficensë të lartë elektorale. Në zgjedhjet e fundit politike, të 2021, ai si drejtues doli fitues në qarkun e Dibrës, dhe pati jehonë përpjekja e tij për ndalimin e blerjes së votës. Këtë radhë, ra edhe Mziu në Radikë, ku u mund keqazi nga Blend Klosi. Tritan Shehu forever Zor të gjesh sot një demokrat që ta pranojë se Tritan Shehu do të duhej të vijonte karrierën politike, të ishte drejtues qarku, dhe të shfaqet përsëri si deputet edhe 4 vite. Por ja që ndodhi. Dhe kuptohet se vetëm për arsye matematikore, PD arriti të mbajë një mandat në Gjirokastër, aq sa për të ruajtur të paprekur karrierën e Tritan Shehut. I cili nuk ka ndërmend të largohet, edhe pse çdokush e ka të qartë se ka një kohë kur njeriu ikën nga skena. Me Tritan Shehu, forever, Sali Berisha nuk është se thjesht humbi ca vota në Gjirokastër. Këto personazhe kanë aftësinë të rrezatojnë dhe më gjërë dhe të krijojnë bindjen se Opozita nuk ka ndërmend të rigjenerohet e të sjellë fytyra të reja, apo t’i krijojë shanse një gjenerate tjetër. Belind Këlliçi, ende në këmbë Një nga drejtuesit e rëndësishëm politikë të këtyre zgjedhjeve për Opozitën, ishte ai për Tiranën, Belind Këlliçi. Edhe pse në rang bashkie, PD ka marrë pak a shumë të njëjtat vota sa ai vetë si kandidat për kryebashkiak dy vite më parë, në nivel qarku dhe këtu kemi rënie drastike. Pavarësisht, për Këlliçin ka ende shanse të mbijetojë, pasi nuk ishte i vetmi drejtues për polin më të rëndësishëm në vend. Kishte dhe të tjerë, me të cilët do të ndajë përgjegjësi. Po mbi të gjitha, ai ka qënë prezent në denoncime, gjatë ditës së zgjedhjeve e në vijim. Pra nuk ka avulluar papritur. Aq më shumë Këlliçi mbetet i paplagosur nga rezultati, kur dihet se në listën e Tiranës, ai nuk pati asnjë ndikim. Asnjë emër aty nuk ka qënë zgjedhja e tij. Jozefina rikthehet, por jo vota Jozefina Topalli u rikthye në PD pas largimit të Lulzim Bashës, por duket se pak i kishte mbetur nga rrezatimi i dikurshëm. Asaj ju dha një vend i sigurtë në listën e Tiranës, dhe por dhe një post mjaft delikat, si drejtuese për votën e diasporës. Turet e saj jashtë vendit, ngjan se nuk patën efektin e pritur. Vota e emigrantëve në masë të madhe shkoi për PS-në e qeverinë. Do të jetë e mbrojtur nga përgjegjësia, po të marrim parasysh se shumë anomali kanë ndodhur me votën jashtë. Ama qartazi u pa se diaspora nuk ka nostaligji për vitet kur Jozefina kishte dhe ushtroi shumë pushtet. Salianjin e ruan burgu, pa konsumuar Nga ato portretet të spikatura të gjeneratës së re në PD që ndokush i vizaton si pjesë e lidershipit të ardhshëm, është padyshim edhe Ervin Salianji. Përpos retorikës e denoncimit, në bagazhet e tij janë edhe disa rekorde të mira elektorale, si rezultati i 2021 në Korçë, shumë më i mirë se aktuali, dhe fitorja e Bashkisë së Kavajës, ku ai qe drejtues politik. Kur nisi punën si i deleguar për Elbasanin, jo pak vetë pranojnë se pati energji, lëvizje e gjallëri. Ajo u ndërpre nga dënimi me burg me 1 vit, dhe ndalimi për të kandiduar edhe më tej, për shkak të një konference shtypi. Padyshim se Salianji po vuan kostot e Opozitës më shumë se askush tjetër në PD në këto momente. Po duhet thënë se pengimi i tij me forcë, për të qënë pjesë e garës së 11 Majit, mund ta ketë shpëtuar nga ajo dramë elektorale që kaploi demokratët dhe që zuri përfund të gjithë drejtuesit, të madh e të vogël. Tirana foli Një udhëheqës padyshim se ka gjithë panoramën kombëtare përpara tij kur merr vendime. Por dihet se zëri që duhet dëgjuar më shumë, dhe që nuk mund të injorohet, është ai që vjen nga kryeqyteti, nga Tirana. Së pari sepse janë më tepër se 1/3 e votave të Republikës, por edhe për cilësinë e rëndësinë e mesazhit. Tirana foli dhe i kumtoi Sali Berishës se kërkon tjetër gjë nga PD. Me votat që i dha Jorida Tabakut dhe Ilir Alimehmetit, apo edhe disa të rinjve të tjerë jashtë liste, kryeqyteti i ka bërë të ditur PD-së e shefit të saj, dekretin politik. Ilir Alimehmeti dhe Jorida Tabaku, nuk ishin pjesë e listës së sigurtë. Pra nuk ishin të preferuarit e doktorit. Tirana zgjodhi pikërisht këta, të papreferuarit. Janë gati 40 mijë vota që kanë folur me këtë zë. 40 mijë qytetarë, demokratë, që duan ndryshim. Ndryshim, së pari në PD, e brenda PD. Sa më shumë kjo të vonojë, aq më e rrudhur do dalë opozita në betejat e tjera elektorale që po vijnë. Ndoshta edhe shumë shpejt, siç pritet që të kemi zgjedhje në vjeshtë, për disa bashki, përfshirë Bashkinë e Tiranës. Koha ikën me revan e nuk pret aspak. Çdo minutë e humbur me ikjen nga përgjegjësia, çdo ditë e kaluar pa u marrë me rrënojen e 11 Majit, do ta bëjë edhe më të vështirë që nga aty të lindë diçka që të rritet e të krijojë shpresë e besim tek demokratët e qytetarët.

Rënia e PD/ Votat zhdukin Yjet e doktorit!

Nga Newsbomb.al

Artikuj të ngjashëm Artikuj

Demokratët vendosin, Berisha Forever!

3 italianët e protestës së PD: Qëlluam policinë me patate, për solidaritet!

PS, 11 rastet e “Ndarjeve të bujshme”

Tirana, Besnikëri, apo Rebelim?

Dimri i Madh i Edi Ramës

35 vjet PD, më shumë thinja më pak ndjekës

Artikujt më të lexuar

Një vit pa Tanin, por me veprën që la pas

Tre pengjet, tre amanete, tre mesazhe politike

DASHURITË E MIMOZËS APO MOZË DASHURIA?

Tirana, Besnikëri, apo Rebelim?

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

MOZA ËSHTË TUTORI I VETËM I VETES

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Rënia e PD/ Votat zhdukin Yjet e doktorit!

Nga Newsbomb.al

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?