Po ku ka si TI o Shqipëria Ime!

Jemi në Gjermani. Jemi finalistë në kampionatin Europian. Për të dytën herë në historinë e futbollit tonë në garat ndërkombëtare. Jemi fitues me meritë të plotë të një bilete të shumëëndërruar dhe shumëdëshiruar, që na bën të ndihemi, si në pak raste në historinë tonë, dinjitozë dhe të barabartë me më të mirët e kontinentit. Ajo që në fillimin e këtyre eleminatoreve ishte një gjëndje e përzier dhe ëndrrës dhe dëshirës, për shkak të konkurencës me dy rivalë si Polonia dhe Çekia, që aq shumë i kanë dhënë futbollit europian dhe botëror, tanimë është një realitet, një mision i përmbushur me shumë sakrifica, cilësi dhe përkushtim absolut, nga ndeshja e parë dhe deri tek e fundit dhe për këtë meritojnë falenderimet të gjitha ata që kontribuan për këtë sukses të jashtëzakonshëm.

Të ardhur nga shume vende, të edukuar sportivisht, të realizuar të gjithë me karrierat e tyre nëpër klube, paraqitjet e secilit veçmas në çdo ndeshje, përballë çdo kundërshtari, në kohën e përcaktuar për ta, meriton një çmim më vete. Të impenjuar maksimalisht, duke sakrifikuar në secilin episod të ndeshjeve, të sinkronizuar në perfeksion ditën të përcjellin mbi të gjitha një mesazh shumë të qartë, se prezenca në Kombëtare, veshja me bluzën kuqezi e ka bërë të duket Shqipërinë më të bukur dhe mbi të gjitha fituese, siç të gjithë do ta dëshironim në çdo fushë tjetër të jetës. Për secilin prej tyre vlerësimi duhet të jetë maksimal, duke fillluar nga Hysaj dhe Ramadani,të vetmit me minutat e plota të aktivizimit, për të vijuar me zbulimet Asani dhe Mitaj, që i kanë dhënë kësaj skuadre klasin, qetësinë, sigurinë dhe emocionet më të forta dhe bashkëlidhur me kolona si Berisha, Gjimshiti, Ismajli, Bajrami, Cikalleshi, Asllani,Seferi kanë fiksuar një formacion fitues, të plotësuar në çdo moment me klas dhe impenjim maksimal nga Strakosha, Balliu,Ajeti, Mihaj, Gjasula, Laci,Bare, Uzuni, Muci, Muja apo Daku. Dhe nëse shton edhe emra si Broja apo Kumbulla, të pamundur për shkak dëmtimesh, kuqezinjtë japin mesazhin se do të dinë të lënë gjurmë edhe në finalet e Europianit.