“Nafta e Shpiragut, të gjithë po hanë çfarë zbuluam ne!”

Profesor Gjergji Foto nuk përfshihet nga entuziazmi i shpallur i kryeministrit për zbulimin e naftës në Shpirag nga kompania Shell. Si një studiues që e njeh zonën me detaje, që në kohën e komunizmit për të kanë kryer me dhjetëra e qindra studime dhe shpime, profesor Foto në këtë intervistë me revistën Newsbomb.al, tregon në aspektin teknik por edhe procedurial, sesa e pagjetur është shprehja e të ngrënit me “lugë floriri” nga zbulimi i Shell, apo nga kapacitetet e mëdha të naftës në zonën e Shpiragut. Madje profesor Foto shkon edhe më tej, duke akuzuar çdo zyrtar të shtetit shqiptar të pas ’90, se e kanë shpërdoruar nëntokën shqiptare duke ia dhënë atë matrapazëve dhe kompanive offshore që vetëm kanë zhvatur, rrjepur, prishur, djersën e mundin e qindra inxhinierëve të naftës, dhe kanë varfëruar popullin shqiptar

Newsbomb: Prof. Foto, më 24 maj 2019, kompania Shell nxorri një njoftim për shtyp (https://www.shell.al/media/2019/shell-confirms-potential-of-significant-oil-discovery-in-albania.html), ku Marc Gerrits, Zëvendës Presidenti Ekzekutiv i Shell, për Eksplorimin e Naftes, u shpreh se “Zbulimi i Shpiragut për Shell, është i pari në tokë, në një brez tektonik të rrudhosur dhe të mbihypur në Shqipëri… Zbulimi i Shpiragut, në një rezervuar karbonatik të frakturuar, është në një strukturë gjeologjike të njëjtë me fushat e mëdha të Val d’Agrit dhe Tempa Rossas në Itali, ku Shell ka një pozicion të rëndësishëm jo-operues”. Fusha naftëmbajtëse e Val d’Agrit, sot nxjerr 85 mijë fuçi naftë në ditë. A ka mundësi që Shell të mos gabohet dhe Shpiragu të ketë rezerva të rëndësishme të naftës, si në vendburimin e Val d’Agrit në Itali?