Ilir Meta: Burgu, testi që më bëri të fitoj shprehi atomike!

Nuk do të ishte zhvilluar kjo intervistë kaq shpejt, nëse Ilir Meta nuk do të ishte kujtuar me një letër të shkruar me dorë nga qelia, në adresë timen, ku më tregonte se ishte “Bombë”, dhe se ishte një lexues i rregullt i Revistës në burg. Jo për mungesë vëmendjeje ndaj ish-presidentit, ish-kryeministrit e ish-kryetarit të Kuvendit. Por sepse shumë prej gjërave që trajton për çështjen në ngarkim të tij, i kishte shkruar në parashtrimin e mesit të shkurtit përpara gjykatës. Që në krye duhet të pranojmë se arrestimi i tij në makinën e vet kur ishte duke udhëtuar në autostradë në zonën e Astirit shokoi të madh e të vogël e padyshim mori vëmendje jashtë e brenda vendit. Analizat e asaj skene janë bërë prej javësh e muajsh, por 513 ditët në qeli deri në këtë moment që ju lexoni këtë numër reviste janë shumë. Ne na ikën mendja ndonjëherë kur jemi të sëmurë e të mbyllur në shtëpi, pa pasur mundësi të dalim e të kryejmë ritet tona të përditshme, takimin me miqtë, një gotë verë, aktivitet fizik, apo edhe ngjarje të ndryshme kulturore e sportive; jo më, të qëndrosh 513 ditë mbyllur në një qeli, me kushte bazike, me të vetmin argëtim një dalje për ajrim; leximin e librave; ndjekjen e televizorit e tek tuk shkëmbim bisedash me gardianët e burgut, apo të burgosur të tjerë. Sa herë vjen puna te diskutimi apo debati për gjendjen psikologjike të një ish-shtetari si Ilir Meta, gjithandej e dëgjon rëndom se “nuk është mirë”. Këtë më tha dhe një avokat, kur e pyeta për shfaqjet e Ilir Metës në sallën e GJKKO. Më tha se nga ana fizike ka rënë shumë: është mpakur, zvogëluar, tenton të ruajë gjendjen emocionale pavarësisht shpërthimeve që i ka pasur herë pas here. Ilir Meta, nëpërmjet kësaj interviste nga qelia, e shkruar me shkrim dore, i mohon të gjitha. Thotë se aktiviteti fizik është bashkëshoqëruesi i tij e më tregon se qelinë e ka mbushur plot foto e pamje të majave të maleve. E imagjinoj që i ka ngjitur foto të ndryshme të vendeve që do të donte ti shkelte, duke pasur parasysh se deri para se të arrestohej kishte filluar të merrej pafundësisht me aktivitet fizik apo hiking. E kam pyetur për këtë me ndjesinë e brendshme timen se i mungon. Më tregon në intervistë se është bërë trajner i vetes, stërvitet shumë fort dhe sa të dalë nga qelia do të ngjisë majën e Jezercës, që është më e larta në vendin tonë, 2694 metra e vendosur në zemër të Alpeve. Duhet të jesh alpinist disi profesionist për ta bërë e Ilir Meta nga qelia këtë ma thotë me siguri. Ditët i kalon mes trajningut të vetes e leximit të librave. Madje më thotë se veç leximit po mbaron disa libra: të parin thuajse e ka gati, ndërsa dy të tjerë u ka shkruar sinopset dhe do ti përfundojë në vazhdim, pa më treguar se do ti përfundojë aty brenda qelisë, apo kur të dalë jashtë dyerve të burgut. Një qenie si Ilir Meta nuk e sheh veten jashtë politikës. Ndaj kur e pyes për ditën e parë të lirisë e çdo bëj pasi të përfundojë gjithë këtë eksperiencë, më thotë se do vazhdojë të bëjë politikë. Dhe më citon Fatos Nanon: Çdo politikan duhet të bëjë burgun e tij! Që nga 21 tetori 2024 jeni në një qeli burgu. Do të më përshkruani zoti Meta se si kanë qenë këto ditë? Si është një ditë e juaja brenda qelisë? Çdo ditë e pres me kënaqësinë më të madhe, e sidomos kur del dielli në mëngjes dhe vetëm vonë fare e kuptoj se duhet të fle për të rimarrë energjitë e duhura për ditën tjetër. Meqënëse kurrë se kisha provuar konviktin, më duket se edhe këtë “mangësi” e kam tejkaluar me shumë sukses. Kam mësuar të bëj shumë punë të paprovuara më parë, duke fituar një pavarësi të plotë individuale. A lexoni? Kush është literatura e preferuar? Një njeri që gjithë jetën e tij publike është marrë me dokumente zyrtare, të Presidencës apo Kryeministrisë, tani është drejtuar drejt librave juridikë, apo drejt një literature më soft? Leximi i librave të rinj, të shumtë e të ndryshëm është kënaqësia më e madhe. Por edhe rileximi i disa librave që i kemi lexuar në moshë të re, këtu merr një kuptim të ri, si “Mbreti Liz” apo “Konti i Montekristos”. Shumë interesant ishte edhe libri “Ridënimi” i publicistit të njohur Fatos Lubonja, që se kisha lexuar më parë. Në fakt mirë do të ishte ta lexonte çdo shqiptar për të kuptuar jo vetëm të shkuarën totalitare, por edhe rishfaqjen e sjelljeve arbitrare e të dhunshme përmes instrumentave të “rinj” që qimen e ndërrojnë, por zakonin se harrojnë. Shumë frymëzues ishte libri i Mandelës “Long Ëalk to Freedom”, të cilin ma solli si dhuratë një miku im nigerian që ishte bashkëvuajtës këtu dhe që tani më pret të luajmë ping-pong në liri. Literaturë juridike kam lexuar pafund kur isha President dhe na duhej të ballafaqoheshim çdo vit në Komisionin e Venecias me Qeverinë dhe Parlamentin njëpartiak. Ndërsa kam qeshur shumë kur kam lexuar në librin e Ilir Ikonomit, sesi Fan Noli i ishte përgjigjur një figure të njohur politike që ky e kishte futur në burg kur ishte Kryeministër, se çdo shqiptar i ndershëm duhet ta provojë njëherë burgun. Por lexoj edhe revista të ndryshme vendase ose të huaja përfshirë “Monitor” dhe “Newsbomb”. Faktet e reja që ju kishit sjellë për Bilal Xhaferrin, ishin shumë interesante. Meqënëse ju jeni edhe më e votuara në “Qeverinë” e re të futbollit lexojmë edhe libra për sportin ku do veçoja “Blessed” të Xhorxh Bestit, një ndër 5 futbollistët më të mëdhenj të të gjitha kohërave. Aty do gjeni edhe kujtimet e tij për tre ditët që kaloi në Shqipëri dhe do të qeshni shumë me përshkrimet e tij, të cilat mund të jenë dhe të ekzagjeruara pasi ai “fajëson” Shqipërinë që me barazimin 1-1, me golin e Zhegës, e skualifikoi Irlandën e Veriut nga Botërori. Bekenbauer ka thënë se Besti është lojtari më i shquar në botë që nuk pati fatin të luajë në një kampionat botëror. Ndaj edhe Besti, në librin e tij, i quan tre ditët që kaloi në Shqipëri si më të mërzitshmet në jetën e tij. Ju si FSHF edhe mund të kujdeseni që ta përktheni e botoni këtë libër, pasi aty shumë fëmijë dhe të rinj të talentuar do mësojnë se si nuk duhet t’i shpërdorojnë talentet dhe dhuntitë e tyre. Kush janë miqtë tuaj brenda burgut? A keni mundësi kontakti me të tjerë? A keni njohur histori të tjera aty brenda, ku njerëzve të thjeshtë u privohet liria duke iu shkelur të drejtat? Këtu kam shumë miq, por izolimi im është ekstrem, siç e keni dëgjuar besoj. Këtu çdo ditë dëgjoj histori të reja, por edhe të vjetra. Këtu janë dy fusha të ndara për ajrosje. Çdo ditë që dal unë në fushën tjetër shoh plot të paraburgosur të rinj nga më të ndryshmit. I pyes gardianët kush janë këta dhe pasi më tregojnë se kush janë më thonë: Jemi shtëpi e madhe këtu, 2 dalin dhe 8 hyjnë. Së fundmi takova në ambjentet poshtë GJKKO një fëmijë 14 vjeç. U çudita shumë me historinë e tij. Ka shumë raste politikanësh që kanë qëndruar në burg me akuza për korrupsion, të drejta ose jo këto akuza sipas tyre. Kur kanë qenë në pushtet kanë pasur kontroll mbi sistemin por nuk e kanë bërë. Nga qelia, gjithmonë kanë akuzuar se janë viktimë e sistemit. Do të doja t’ju pyesja çfarë do të ndryshonit ju në burgjet shqiptare tani që e njihni situatën nga brenda? Dihet se të gjithë të burgosurit politikë që liroi Lukashenko, ishin me akuzë për korrupsion. Sot kjo akuzë më shumë ka zëvendësuar atë të agjitacionit në kohën e komunizmit dhe më shumë keqpërdoret politikisht. Fakti që korrupsioni është shtuar frikshëm, tregon se arkitekti dhe shtylla kurrizore e këtij sistemi nuk është prekur, por janë “sakrifikuar” disa bashkëpunëtorë me marrëveshje për të prodhuar statistika nga njëra anë, por edhe për të balancuar përndjekjen politike të drejtuesve të opozitës. Burgu ku unë ndodhem është burgu më i rëndësishëm në Shqipëri, ku çdo ditë jetojnë 500 të burgosur e të paraburgosur, por që në një vit numri i atyre që e frekuentojnë këtë burg, pra që hyjnë këtu e dalin apo transferohen në burgje të tjera, duhet të jetë rreth 5 mijë persona. Këtu nuk ka një bibliotekë, për fat të keq. Këtu nuk ka një palestër. Edhe një argëtim sportiv që kishim për të luajtur volejboll, u bë i pamundur. Përveç problemeve me kujdesin shëndetësor. Ndërkohë që mbahen njerëz me problem të rënda shëndetësore, pasi Gjykatat nuk i lexojnë kartelat e tyre shëndetësore. Ndaj ndodhin edhe fatkeqësi të papritura. E them me bindje se shumica e të paraburgosurve janë këtu për statistika më shumë. Më e çuditshmja është kur informohesh se të paraburgosur që kanë qenë këtu për vepra të lehta, por që jetojnë në fshat, marrin masë sigurimi “arrest shtëpie”. Pra mendoje se kujt i shërben kjo masë kur personi i ka tokat, ullinjtë apo vreshtat jashtë oborrit të shtëpisë dhe është kryefamiljar. Kush do ta ushqejë atë, ndërkohë që ka fëmijë për të rritur? Jo vetëm prokurorët, por fatkeqësisht edhe gjykatësit nuk mendohen shumë për pasojat sociale të vendimeve të tyre. Situata në burgjet duhet përmbysur në të gjitha aspektet, e për këtë mjafton të ndiqen rekomandimet e Këshillit të Europës. Trajtimi me dinjitet e humanizëm, sipas Konventës Europiane të të Drejtave të Njeriut, është parësore. Po si mund t’ja kërkosh këtë një Qeverie që edhe gardianët e burgjeve i trajton më keq se të burgosurit. Ju në parashtrimet tuaja të muajit shkurt, shkruani se eksperti i caktuar nga prokuroria është në konflikt të pastër interesi. Ju e njihni atë? Mund t’ia përshkruani edhe lexuesit tonë? Pse ky ekspert do të falsifikonte dokumentet? Është punonjëse në administratën e SPAK që këta e paraqesin si eksperte. As unë dhe as avokatët e mi nuk e njohin fare dhe paraqitja e një ekspertize të tillë në Gjykatë është e paligjshme, pasi punonjësja është në konflikt interesi pasi do i bënte “llogaritë” siç ia kërkonin punëdhënësit (prokurorët). Një sajesë skandaloze për t’u përmendur është mashtrimi që u është bërë në një letërporosi autoriteteve amerikane sikur këta (prokurorët) kanë provë se i pandehuri Ilir Metaj ka përdorur kartë amerikane. Në jetën time, jo kartë amerikane dhe europiane, por as shqiptare nuk kam përdorur. Janë një mal me gënjeshtra dhe falsifikime që i detyron të të duken shumë demokratike standardet e paraburgimit dhe gjykimit edhe në Rusi, ku Navalny, Khodorkovsky e të tjerë nuk iu mohuan intervistat edhe për mediat ndërkombëtare. Ju flisni se kërkoni një ekspertizë të re për shpenzimet dhe të ardhurat tuaja që nga marsi 1992. Pse e bëni një kërkesë të tillë, kur fare mirë mund të rrëzoni pretendimet e ekspertizës së ekspertit të prokurorisë? Ne e kemi një ekspertizë financiare të bërë nga ekspert kontabël i licencuar nga Ministria e Drejtësisë për vitet 1995-2023, që do e paraqesim në Gjykim të themelit. Por do ishte në dinjitetin e Gjykatës të refuzonte ekspertizën e falsifikuar të punonjëses të SPAK-ut. Një fakt i thjeshtë, për shembull ka “harruar” të llogarisë të ardhurat e mia nga 1992 deri në 2002. Lidhur me çështjen CEZ – DIA, ju pretendoni se zotit Kastriot Ismailaj i janë bërë oferta favorizuese për të bërë deklarime të rreme lidhur me personin tuaj, që t’i lehtësohej dënimi. Ju e keni të faktuar këtë akuzë? Çfarë ofertash pretendohet? Meqënëse ju jeni nga Qarku i Fierit, pyesni në burgun e Fierit, se cili prokuror shkonte ta takonte dhe do e merrni përgjigjen. Po kështu, ai është pyetur zyrtarisht për mua disa herë që nga viti 2018 kur unë isha President. Ofertat normale që kanë qenë që të thoshte gënjeshtra për mua që t’i ulnin dënimin. Duke ju referuar sërish kësaj çështjeje, ju pretendoni se disa të pyetur nga SPAK, kanë ndryshuar deklarimet e tyre, nga ato që kanë thënë pas viteve 2010, në ato të thëna pas viteve 2020. Pse duhej këta njerëz të dëshironin fundin politik të Ilir Metës? Ku janë prishur “interesat”? Duhet të kuptoni se e gjithë dosja është një falsifikim nga fillimi në fund. Nuk ekziston asnjë vendim, akt, veprim apo mosveprim nga Ilir Meta që të ketë shkelur ligjin apo dëmtuar interesin publik. Në dosje, dëshmitarët rrëzojnë njëri – tjetrin ose vetveten dhe vetë akuzën. Kur të nisi gjykimi në themel ne do bëjmë gjithçka publike. Nga gjithë akuzat që janë ngritur ndaj jush dhe kërkojnë dënimin tuaj për korrupsion, dhe për të cilat ju shpreheni në parashtrimet tuaja si “lajthitje kafkiane” kë do të veçonit si më “të sajuarën”? Njëra akuzë është më e sajuar se tjetra. Në çdo episod del Edi Rama si te UNIFI, te PLUS apo te ligji për minierat. Por ai nuk thirret as si dëshmitar. Edhe te CEZ, prapë është Edi Rama, sepse ai për të justifikuar faljen e 479 milionë eurove CEZ-it me marrëveshje në tavolinë, shpiku skandalin e DIA-s ku shteti ka dalë me fitim. Ndërsa DIA është e provuar nga vetë dëshmitarët e SPAK-ut si Elvis Mataj, Hejsek, Znj. Vojsava Ismailaj, etj., që është një krijesë amerikane dhe Z. Kastriot Ismailaj një bashkëpunëtor i tyre në atë biznes. Ju ishit President kur dolët në televizionin “Syri TV” dhe bëtë një deklaratë se amerikanët mund t’ju çonin edhe te Mali me Gropa. Marrëdhëniet tuaja atëkohë me amerikanët nuk ishin në fazën e tyre më të mire. Pas gjithë këtyre muajve, çfarë mendoni sot? Sa kanë ndikuar këto qëndrime në akuzat tuaja? Raportet e mia me SHBA shtrihen prej 3 dekadash. SHBA kanë njohur vetëm Një - Ilir Meta që të thotë ballë për ballë PO ose JO dhe jo tërci e vërci si të tjerët. Natyrisht që Ilir Meta ka njohur shumë amerikanë, që nga Gjenerali Uesli Klark e deri tek McGonigali. Në librin tim të parë pas pak muajsh, ju do keni mundësinë të “shuani” kuriozitetin tuaj për marrëdhëniet e mia me ta. Zoti Meta, a ka ndonjë vendim a veprim tuajin në karrierën tuaj të gjatë politike që ju do ta kishit bërë ndryshe? Për të cilin jeni penduar? Vendimet e mia politike kanë qenë të drejta dhe largpamëse, nëse shikohen me objektivitet, duke vlerësuar edhe rrethanat e kohës. Në 27 muaj që unë kam qenë Kryeministër, Shqipëria ka patur një rritje ekonomike mbi 8%. Në 4 vitet që kam qenë Kryetar i Kuvendit, hapësirat për opozitën kanë qenë maksimale dhe drejtimi ka qenë shumë transparent. Presidenca do të mbetet e papërsëritshme për shkak të rrethanave të çmendura. Një President, që ngjysmën e mandatit e kaloi në hetim parlamentar vetëm pse mbronte Kushtetutën. Me një super shumicë parlamentare prej 122 deputetësh. Shtoju këtyre edhe grupin e strukturuar diplomatik që bekonte betimet te Lana të anëtarëve të Gjykatës Kushtetuese. Të vetmen pendesë që mund të kem, është se në Janar të vitit 2000, kur isha si Kryeministër në Budapest dhe e pyeta Z. Orban se a po investonte Soros në Hungari, ai reagoi me shumë alergji për të dhe më tha mbajeni sa më larg atë bastard. Unë e konsiderova si të ekzagjeruar këtë reagim atëherë. Çdo gabim i imi më pas, ka qenë pasojë e nënvleftësimit të këtij paralajmërimi në atë kohë. Mos harroni se edhe Reforma në Drejtësi u parapri nga vizita e Sorosit në Shqipëri pas zgjedhjeve të 2013. Si e shikoni realitetin politik sot? Rama me 83 mandate, Berisha në rrugë duke hedhur molotovë ndaj institucioneve. Skena të para e të ripara shumë vite me radhë çka në perceptimin publik i shtojnë jetëgjatësinë Ramës në pushtet. A jeni ju për këtë strategji të ndjekur nga opozita? Në një vend ku institucionet kanë rënë, ngrihen qytetarët. Është detyra e opozitës t’i udhëheqë ata. Këtu vetëm një institucion “serioz” ka mbetur që s’duhet lënduar, pra “Diella” e AKSH-it. Shumë akuza për korrupsion të kësaj Qeverie, por pak tronditje themelesh. Sikurse më parë e keni deklaruar edhe vetë, frymëzimi duhet të vijë nga populli, pra duhet të binden qytetarët për të bërë ndryshimin. Por si arrihet kjo kur opozita akoma nuk frymëzon? Jemi në një regjim policor dhe kriminal dhe opozita duhet mbështetur e jo fajësuar. Kemi përgjysmim të popullsisë në 13 vite, por edhe trefishim të administratës. Konsistencës së opozitës besoj nuk do t’i mungojë edhe kreativiteti i saj. Bota është në ndryshim të pandalshëm dhe të vrullshëm. Shqipëria duhet të qëndrojë në atë drejtim ku e vendosi Gjergj Kastriot Skënderbeu. Ne s’mund të rikthehemi 35 vite më parë te slogani “As Lindje, as Perëndim” meqënëse Edi Rama nuk plotëson dot Kriteret e Kopenhagenit. Sidoqoftë, një faktor që kurrë nuk ndryshon është gjeografia. Ndaj Shqipëria duhet të forcojë gjithmonë marrëdhëniet me të gjithë fqinjët për t’u ndjerë më e sigurtë. E së pari të ndalë urgjent shpopullimin, i cili e dobëson si vend përballë sfidave të ardhme. Zoti Meta, keni thënë dhe “stërthënë” disa herë se keni pak kontakte. Por a i keni takuar fëmijët? Borën, Erën, Besartin? Janë takime periodike apo sporadike? Cila është lidhja dhe mbështetja e fëmijëve për burgun tuaj? Nuk jam ankuar për mungesën e kontakteve me fëmijët, por për moslejimin e deputetëve apo eurodeputetëve për t’u takuar me mua. Me fëmijët dhe motrën takohemi njëherë në javë si gjithë të tjerët. Si jetojnë sot fëmijët tuaj? A janë punësuar, integruar? A janë hapur dyert për punësimin e tyre pas shkollimit? Bora dhe Besari janë të vetëpunësuar, ndërsa Era vazhdon studimet. E rëndësishme për mua është që janë shumë të lidhur me vendin. Padyshim, një ndër kryelajmet e vitit të kaluar ishte divorci juaj me Monika Kryemadhin, ish bashkëshorten e shoqen tuaj të jetës për gjithë vitet e tranzicionit. Sot Monika shkon në dyert e SPAK një herë në javë, e siç e kemi evidentuar, ju ka hequr çdo përgjegjësi nga ato që akuza ngre për ju. A keni sot një mesazh për të? Sot që flasim, është ndoshta një prej grave më të komentuara në Shqipëri, me një aktivitet të zgjeruar publik: që nga filmi deri tek shoëtime…A keni reflektuar sot: është e vërtetë ajo që pretendon Monika se kanë qenë të tjerë që kanë ndikuar/influencuar në divorcin tuaj, por jo ndërgjegja juaj? Tek vendimet e mia nuk ndikojnë dot as superfuqitë e jo më individët. Ju mungon sot aktiviteti juaj fizik? Ju keni qenë një politikan që para burgut merreshit shumë me hiking… Aktiviteti fizik është prioriteti im kryesor gjatë ditës. Të paktën tre herë në ditë. Jam bërë instruktor i vetes. Çdo ditë stërvitem sikur ditën tjetër do të ngjis Majën e Jezercës. Muret e qelisë time janë plot me fotot në malet e Shqipërisë. E kam thënë se dembeli edhe sikur të flejë në palestrën më të mirë, do e gjejë justifikimin për të mos bërë gjë. Jam e sigurt që edhe nëse dënoheni nga gjykatat shqiptare, çështjen do ta çoni në Strasburg. Kur e sheh Ilir Meta veten jashtë qelisë? Unë çdo ditë i lirë jam, sepse siç ka thënë Musine Kokolari, liria së pari ekziston së brendshmi. Dhe pasi të dilni nga qelia, çfarë drejtimi do t’i jepnit vetes suaj? Cilat janë veprimet që nuk do t’i bënit, apo do t’i bënit ndryshe nga ato që keni bërë nga ’92. Pra ku mund të keni gabuar? Do vazhdoj rrugëtimin tim politik në mënyrë të pandalshme. Ku mund të kem gabuar unë pyesni ju! Nëse është gabim të mbrosh popullin tënd dhe vendin tënd edhe mund ta pranoja gabimin. Por ky s’është gabim, por Detyrë dhe detyrim. Kështu më kanë edukuar prindërit e sidomos dy gjyshërit e mi të paharruar. A do të shkruani kujtime zoti Meta? A keni filluar të shkruani kujtime? Të gjithë janë kuriozë të hyjnë brenda të fshehtave të “darkës së ngjalave” apo akordeve politike të fshehta të cilat duhet thënë, kanë bërë jo pak dëme në politikën shqiptare. Jo vetëm lexojmë këtu, por edhe shkruajmë. Para pak ditësh po ndiqja një intervistë të Z. Fevziu me Gjeneralin Uesli Klark. M’u zgjuan shumë kujtime nga takimet me të. M’u kujtua takimi i parë në Qershor ‘98, kur Nano si Kryeministër i tha se vetëm ndërhyrja e NATO-s mund ta zgjidhte krizën humanitare që sapo kishte nisur, Gjenerali Klark shtoi përqëndrimin dhe i tha Nanos, ju lutem bëni çdo përpjekje që të mos hyjmë ne (NATO) se do jetë shumë e dhimbshme për të gjithë. Por e përsëriti tre herë shumë e dhimbshme (very painful). Pas takimit po e diskutonim gjatë këtë paralajmërim. Na u duk sikur na kërcënoi edhe neve. Gjatë atyre tre muajve të krizës humanitare në Kukës, më kujtohej ky paralajmërim vazhdimisht. Kështu që pas intervistës së tij te Fevziu, u ula dhe shkruajta shumë nga kujtimet e mia me të, por edhe aktorë të tjerë të asaj kohe të pabesueshme. Në korrik do publikoj librin e parë me rastin e 10-vjetorit të Reformës në Drejtësi. Ndërkohë kam skicuar edhe 2-3 libra të tjerë. Ajo që ju e quani “darka e ngjalave”, jo vetëm s’ka qenë marrëveshje, por vetëm një autokritikë e gjatë e autokratit të sotëm. Asnjëherë nuk kam bërë as marrëveshje të fshehta dhe as të dëmshme për vendin. Përkundrazi, interesi i vendit dhe i integrimit europian të tij ka qenë në themel të gjithë marrëveshjeve të mia, por edhe të betejave të mia. Unë kam një program të qartë për popullimin e Shqipërisë dhe faktorizimin e saj dhe të gjithë shqiptarëve përmes 5 prioriteteve për 4 milionë shqiptarë plus. Asgjë nuk do të më ndalë në përmbushjen e qëllimeve të mia. Burgun nuk e shoh si pengesë, por si një test për të krijuar ato shprehi atomike që duhen për të arritur qëllime të mëdha në jetë. Nuk e besoj se De Goli do ishte bërë ai që e njeh Franca dhe bota po të mos kishte bërë burgun e tij. Pastaj po e mbyll me thënien e Nanos që t’i e ke dobësi, se çdo politikan duhet të bëjë burgun e tij . E gjithë karriera ime e deritanishme është veçse një trainim për të realizuar objektivat e mia për të ardhmen.

Ilir Meta: Burgu, testi që më bëri të fitoj shprehi atomike!

ANILA BASHA

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Vajzat e humbura

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

PROTESTA E MEMEVE TË TALLESH NË ZGRIPIN E PAMUNDËSISË

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Ilir Meta: Burgu, testi që më bëri të fitoj shprehi atomike!

ANILA BASHA

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?