MIZAT PO HANË PIKTURAT E GALERISE

Do të donim të imagjinonim një fond të pasur të autorëve shqiptarë, jo veç ato të realizimit socialist për të cilat kuriozohen turistët e huaj, që të qarkullonte nëpër rajon dhe nëpër botë, për të shfaqur talentin dhe shkëlqimin e Shqipërisë. Por nuk është kështu. Galeria Kombëtare e Arteve, vuan si institucion pa drejtor e pa godinë, pa ide dhe “pa të ardhme” për fat të keq, aq sa, sikurse shpreh shqetësimin ish-drejtori, pikturat nëpër bodrume po i “grijnë insektet”, dhe askush nuk ka ndërmend të bëjë diçka.

GALERIA KOMBËTARE E ARTEVE – Emri zyrtarisht nuk është kështu, por Muzeu i Arteve të Bukura. U tha se ndryshimi do të fillonte nga emri, këtë koncept e kishte ish-ministrja e Kulturës Mirela Kumbaro, por të gjithë vijojnë ta njohin institucionin si Galeria Kombëtare e Arteve. Edhe Galeria është në rikonstruksion, jo vetëm prej tërmetit, se vragat e mureve nuk ishin aq keq sa janë te Muzeu Historik Kombëtar, por sepse edhe kjo godinë kishte nevojë për restaurim. Ky institucion ka edhe një tjetër specifikë, praktikisht nuk ekziston. As ndërtesa, as drejtori, as eventet. Drejtues vetë s’ka dhe direktivat deri diku, i merrte nga Minstria e Kulturës.