LEAD Albania, 10 vite e qindra të rinj që duan të rrinë në Shqipëri

Pak reklamë mediatike, por shumë debate e diskutime mes alumni-sh. Bëhet fjalë për programin Lead Albania, që përgatit liderët e rinj e zhvillohet nga Fondacioni shqiptaro-amerikan për Zhvillim. Të rinjtë që e kanë ndjekur e sugjerojnë me “domosdo” për këdo që kërkon të thellojë njohuritë për institucionet, ekonominë, integrimin, financat, diplomacinë etj. Ata që e kanë dëgjuar, janë të ethshëm për të aplikuar e për të përfituar. Por që të jesh LEAD duhet të kesh rezultate të larta, sepse, jo shumë vonë, do jesh mes të rinjve që do të vendosin për fatet e këtij vendi…

10 vite me Lead Albania, eksperienca unike për dhjetëra profesionistë të rinj të cilët kanë kërkuar të zhvillojnë aftësitë e tyre drejtuese dhe të arrijnë të bëhen në punën e tyre, më të mirët! Në vitin 2012 Fondacioni Shqiptaro-Amerikan për Zhvillim (AADF) vendosi që të sjellë në Shqipëri modelin e Programit të Fellows të Shtëpisë së Bardhë të SHBA. Pas 5 viteve të para shumë të suksesshme të zbatimit të këtij Programi, në vitin 2018 u nënshkrua sërish një momorandum i ri me Qeverinë e Shqipërisë për zgjatjen e këtij Programi. Tani numërohen plot 10 vite suksesi nga startimi i këtij projekti, i cili mund të themi që ka qenë një mundësi e artë, unike për profesionistët e rinj shqiptarë të cilëve u është dhënë një përvojë e drejtpërdrejtë pune në nivelet më të larta të qeverisjes së vendit.