Kush është Shpejtim Përqejli, pronari i restorantit Mama’s, një prishtinali i vë “viza” shtetasve të BE

Ai është një burrë i guximshëm, që edhe pse i është dashur shumë punë dhe mund për të arritur një nivel të mirë jetese, sot rrezikon të humbë para për një vendim që ka marrë së fundmi, t’i bëjë embargo shtetasve të BE për të hyrë në restorantin e tij në Prishtinë. Ky është Shpejtim Përqejli, 50 vjeç por kur bisedojmë me të, kuptojmë se i gjithë ky guxim, i vjen nga ndjesia e të ndjerit si një 18 vjeçar rebel. “No entry for EU citizens without viza”. Kjo është tabela e vendosur në hyrje të lokalit Mama’s, që ndodhet pranë zyrave të Eulex në Kosovë, dhe do të vazhdojë të qëndrojë aty në formë proteste deri sa Kosovës t’i liberalizohen vizat për në Bashkimin Europian. 

Kush është Shpejtimi?

Në vitet 1990 atëherë kur Jugosllavia nisi shpërbërjen, dhe shumë të rinj thirreshin ende për të kryer shërbimin ushtarak, nisën largimet masive drejt shteteve europiane në kërkim të një jetë më të mirë, në kërkim të lirisë. Shpejtimi atëherë 18 vjeç u nis në Gjermani, ku u martua me një vajzë kosovare, por jeta e tyre nuk ishte aq e thjeshtë për tu përballuar. Si një i ri që duhet të mbante dhe familjene e sapokrijuar, Shpejtimi punonte dy punë thuajse gjithë ditën. Nga mëngjesi herët deri në 16.30 shkonte si punëtor në një firmë që merrej me izolime, suvatime dhe lyerje godinash, ndërsa nga ora 17.30, punonte kamarier dhe pjatalarës në një lokal. “Më është dashur të punoj shumë me u kujdes për shpenzimet e familjes, banesën, ushqimin ndërsa rrogën tjetër për me kursy për Kosovën, pasi gjatë qëndrimit tim në Gjermani filloi dhe rezistenca e armatosur n’Kosovë, dhe ne atëherë si mërgatë, jemi organizuar, kemi punuar shumë dhe kemi mbledh shumë të holla për luftën” thotë Shpejtim Përqejli ndërsa shton se edhe pse jo fizikisht në luftë emigrantët kanë kontribuar shumë për vendin e tyre.