Kombëtarja, “pandemia” kuqezi

Vendi i parë në grup, pas ndeshjes së pestë, bilanc pozitiv me Poloninë, barazim në Çeki, plotësim i saktë i “detyrave të shtëpisë” ndaj Moldavisë dhe Ishujve Faroe, e kanë kthyer ekipin tonë kombëtar në simbolin më përbashkues të të gjithë shqiptarëve. Hashtag, share, video dhe foto pa fund me protagonist kuqezi, kanë krijuar një efekt pandemie në të gjitha trojet tona, apo kudo ku janë zhvendosur shqiptarët në çdo skaj të globit. Ndeshjet e luajtura në “Air Albania” janë shndërruar në shfaqjet më të ndjekura, më madheshtore dhe më të kërkuara. Prova e rradhës, përballja me Çekinë më 12 Tetor, interesin për të cilën, nuk ka asnjë stadium në botë për ta mbuluar dhe për të plotësuar dëshirën e çdo shqiptari për të siguruar një biletë.

Një ecuri si kjo e këtij edicioni për kualifikueset e kampionatit europian “Gjermani 2024”, shqiptarët nuk e kanë patur asnjëherë në historinë e tyre. Madje, as në kuafikueset për “Francë 2016”, në të cilën fiksuam rezultatin më të mirë ndonjëherë, me pjesmarrjen për herë të parë në finalet e një turneu madhor. Rezultatet, vendi i parë në renditje dhe veçanërisht lojrat në një trajektore konstante (përfshirë edhe në humbjen në Poloni) kanë rritur në maksimum besimin brenda grupit, harmoninë mes lojtarëve dhe stafit, si dhe kanë injektuar shpresë tek i gjithë opinioni, – jo vetëm ai sportiv, – se kjo skuadër ka potencialin dhe cilësinë për të fiksuar një tjetër kulm në historinë e futbollit tonë. Mesatarja e dy pikëve për ndeshje dhe kalendari i favorshëm, krijon një perspektivë optimiste për tre sfidat e mbetura, për të mbrojtur këtë pozicion dhe siguruar sa më shpejt një biletë për verën e ardhshme në europianin e Gjermanisë.