Qeveria e futbollit 7.0

Armand Duka rizgjidhet unanimisht për mandatin e shtatë, ndërsa Komiteti Ekzekutiv konfirmon vazhdimësinë me disa profile të forta publike. Federata hyn në versionin 7.0 mes stabilitetit financiar dhe ambicies për Botërorin 2026. A do të mjaftojë përvoja për të arritur Amerikëm dhe a do të shndërrohen 11 milionë dollarët e mundshëm në historinë më të madhe të futbollit shqiptar?

Aty, diku në fund të sallës, në një qoshe që të lejon të shohësh gjithçka pa u bërë pjesë e asgjëje, kisha zënë vend për të ndjekur procedurën për zgjedhjen e presidentit të Federatës Shqiptare të Futbollit. Nuk ishte nga ato procese që mbajnë frymën pezull. Emri dihej. Votat jo. Dhe në zgjedhje, edhe kur rezultati duket i shkruar, momenti i konfirmimit ka gjithmonë peshën e vet. Armand Duka kandidonte i vetëm. Tridhjetë e tre propozime e kishin paraprirë emrin e tij për këtë post. Në fund, rezultati foli me një gjuhë që nuk lë hapësirë për interpretim: 48 vota pro. Aq sa kishte edhe votues në sallën ku u zhvillua “Asambleja e Përgjithshme e Zakonshme Zgjedhore 2026”. Unanimitet. Një mandat i shtatë.