Eduart Makri, Gjirokastriti që LINDI si Artist

Sot ruan me fanatizëm emocionet e të qenurit një artist që në lindjen e tij në Gjirokastër. Që në moshën 13 vjeçare u ngjit në skenë dhe nuk u nda prej saj. Ndoshta nuk përmendet sa shumë aktorë të tjerë të Kinematografisë, por është një ndër të vetmit që ruan karakterin, pasionin e dashurinë për punën që ka bërë, edhe pse në vitet 2000 emigroi në Kanada, ku refuzonte role kriminelësh që i jepeshin, vetëm e vetëm se ai ishte shqiptar. Por çfarë mendon për Kinematografinë sot? E zbulon në këtë rrëfim në Newsbomb.al

Ka një shprehje që thotë se artist lind nuk bëhesh! Ndërsa unë mendoj që Eduart Makri, aktori i njohur i viteve ’80 në Shqipëri është një artist, jeta e të cilit është e gjitha e lidhur me artin. Duke filluar që nga emri ‘Eduart” (E dua artin), emër të cilin ia ka dhënë nëna e tij, mami në profesion (studiuar në Itali), por shumë e lidhur me artin. E mesa duket këtë “mallkim” për artin, Eduart Makri do ta kishte që pa ardhur ende në jetë, sepse ajo vendosi ta quante kështu kur ai ishte ende në barkun e saj.