Bashkimi i pamundur i PD

Një vëzhgim i detajuar i revistës Newsbomb mbi zhvillimet e fundit në PD, ku pas largimit të Bashës, duket se ngërçi ka ngelur, dhe afrimi i palëve ngjan përditë e më i pamundur. Megjithëse të gjithë flasin për bashkim, të gjithë nga ana tjetër akuzojnë për nxitje të përçarjes Largimi i Lulzim Bashës nga posti i kryetarit, pas zgjedhjeve të 6 marsit ku forca politike me logon dhe siglën e PD mori rezultat dëshpërues, u mendua se do ta bënte të lehtë sheshimin e konfliktit mes demokratëve dhe do të sillte rënien e rezistencës ndaj Sali Berishës. Mirëpo, çdo ditë pas kësaj u provua se fronti anti-Berishë në PD nuk u shemb, madje po tregon shenja që është sfidues dhe i palodhur. E gjitha ka ngecur tek Grupi Parlamentar. Një strukturë, një forum të cilin lideri historik, i përjashtuar prej Bashës nga aty me 9 shtator të vitit të kaluar, pasi u shpall non-grata prej Departamentit të Shtetit, nuk po e fut dot nën kontroll. Dhe kemi të bëjmë me një trupë, më të rëndësishmen në PD sot, pasiqë është legjitime dhe e votuar nga populli. Nuk e morën seriozisht as Enkelejd Alibeajn kur pasoi Bashën, si i komanduar në krye të PD. Por, debatet e shpeshta dhe qëndrimi i palëkundur i tij në prani dhe faqe Berishës nëpër mbledhje, po e shfaqin këtë shtresë në parti, drejtuar prej tij, e cila nuk e dëshiron kthimin e doktorit, si një kockë të fortë dhe jo lehtësisht të kapërdishme. Nga ana tjetër, jo pak deputetë që dolën haptazi kundër Lulzim Bashës dhe kërkuan largimin e tij, sot janë të pakënaqur me mënyrën se si Komisioni i Rithemelimit, është duke organizuar zgjedhjet nëpër degët e Shqipërisë, për krerët, dhe për nivele më të ulëta si për grup seksionet. Ata janë shprehur në debatet e mbledhjeve të grupit, që zgjasin me orë, se ky proces duhet ndalur pasi nuk po sjell bashkim. Berisha kërkon t’i ngrejë sa më shpejt ato struktura, pasiqë në Kuvendin e parashikuar në fund të prillit, ka vendosur të mbyllë gjithë ciklin, duke zgjedhur Këshillin e ri Drejtues, Kryesinë e re të partisë, dhe drejtuesit e rinj të lartë. Do të ngelet më tej vetëm një vakancë. Ajo për Kryetarin e Partisë Demokratike, që me gjasë, do të jetë një garë që do të ndodhë pasi të jenë konstituar e gjithë forca politike, dhe nëse do të vendosë vetë Berisha të kandidojë, siç edhe deklaron publikisht, ngelet shumë pak për të pasur befasi. Mbledhjet nervoze të grupit Sali Berisha nuk është mësuar të ketë kundërshti, rezistencë, aq më shumë sfidë të hapur nëpër mbledhjet e Grupit Parlamentar. Edhe më herët, prania e tij në këto takime ishte imponuese. Dhe kur ato drejtoheshin nga Basha e raportet me liderin historik ishin normale, qe sërish Berisha që vinte pikat mbi i. Pakkush kishte kurajon të kontestonte, apo të kishte një mendim të ndryshëm. Ngjan surreale situata sot. Deputetë si Alibeaj, apo Bardhi, siç ka ndodhur në mbledhjen e fundit të grupit, shkojnë deri aty sa ta trajtojnë liderin historik me një lehtësi të papërballueshme, sikur të ishte një koleg i zakonshëm, siç e pati cilësuar mote më parë një ish drejtuese pranë Bashës, për të cilën, ajo u anatemua e u mallkua gjatë dhe në media, portale e rrjete sociale. “Je i marrë fund” – i hakërrehet nervoz Berisha, Alibeajt, i cili ulet në karrigen e kreut të grupit dhe drejtuesit të mbledhjes. “Ti doktor, mua nuk më komplekson dot, as nuk më urdhëron dot. Pikë”, i kthehet me qetësi Alibeaj. Madje ai heq dorashkën. U thotë, hajde më hidhni në votëbesim. Bardhi i kërkon llogari pse nuk flet për non-grata-t e reja të shpallura nga Departamenti i Shtetit, duke e akuzuar Berishën se po komplekson partinë duke mos mbajtur një qëndrim. Më tej ngrihet Helidon Bushati i cili kërkon ndalimin dhe shtyrjen e zgjedhjeve nëpër struktura. Dhe në këtë e sipër, kur përmendet dhe etiketohet Lulzim Basha, del Dhurata Çupi dhe ngre tonet duke thënë se nuk është e moralshme të lëshohen komente apo fyerje për ish kryetarin i cili as nuk është në sallë. Sigurisht se mbështetës të Berishës nuk rrinë në heshtje. Ata janë aty, kanë argumenta dhe janë energjikë. Por çka vihet re është se lideri historik po merr goditje në pikën e tij më të fortë, tek miti që ka krijuar se është i plotfuqishëm dhe i pakontestueshëm. Më parë, deputetët kishin droje t’i përmendnin emrin. Kurse sot, edhe më të rinjtë prej tyre, kanë guximin të debatojnë, të kundërshtojnë, të kritikojnë. Por lideri historik, di se si ta menaxhojë në publik këtë moment krize, pasiqë kur shfaqet pas mbledhjeve në kamerat që presin poshtë, deklaron se qe një takim i frytshëm, dhe se ky forum u pasurua me mendim dhe ide. Këto zhvillime po tregojnë se bashkimi i predikuar dhe i kërkuar shumë, është i pamundur në PD. Nuk ka asnjë dyshim se Berisha ka shumicën në atë parti. Problemi është, sfida ngelet, se si të integrojë, të mbajë aty të lidhur edhe ata që nuk e duan më liderin historik, dhe që jo domosdoshmërisht janë njerëz, apo pasues të Bashës. Cila do të jetë PD e drejtuar nga Berisha Pas Kuvendit të 30 prillit, do të mund të shohim se cila do të jetë Partia Demokratike, tashmë e drejtuar nga Sali Berisha, 9 vite pasi dha dorëheqjen prej saj. I rikthyer në skenë, pas fushatave të forta në degë e në rrethe, me foltoren dhe me zgjedhjet e pjesshme të 6 marsit, Sali Berisha premton se do ta sjellë PD-në edhe në pushtet, shumë shpejt. Ai thotë se është i vetmi që e mund Edi Ramën. Kuvendi i 30 prillit do të zgjedhë Këshillin e ri Drejtues, që do të përbëhet me shumë më pak anëtarë, mendohet se mund të ketë deri në 150 vetë. Ky Këshill më pas do të zgjedhë kryesinë e re të PD, që besohet se do të përbëhet nga 20 anëtarë. E po ashtu, funksionarët e tjerë të lartë, si dy nënkryetarë, jo 4 sa kishte caktuar Basha. Dhe sekretariatin klasik, siç PD e ka patur më parë, me atë të Përgjithshëm, me Organizimin, Burimet Njerëzore, dhe Ligjorin e Elektoralin. Eshtë e qartë se tek rithemeluesit, tek, aktorët kryesorë, ka një garë mes tyre se cilët do të jenë në postet më të larta drejtuese. Një konkurencë e fortë dhe e ethshme, që do të ishte ndoshta edhe më e ashpër, poqese nuk do ta mbante nën fre Doktori me autoritetin e tij. Të preferuarit për në krye Ende nuk dihet me saktësi se cila do të jetë kupola e re drejtuese e PD, pas Kuvendit të 30 prillit. Sigurisht, aktorët kyç do të vijnë nga Komisioni i Rithemelimit. E besueshme është megjithatë, se Berisha do të promovojë ndonjë figurë që nuk njihet si besnik i verbër i tij, dhe që gëzon simpati në publik. Kjo edhe për të dhënë mesazhin e hapjes dhe bashkimit. Një prej tyre përflitet se do të jetë Agron Shehaj, të cilit mund t’i besohet posti i njërit prej nënkryetarëve. Luciano Boçi më anë tjetër, shihet si favorit për të qenë edhe ai numri dy në PD. Boçi spikati në zgjedhjet e fundit parlamentare, ku arriti të thyejë herësin e të marrë mandatin e deputetit, pasiqë prej Bashës nuk ishte lënë në pozicion fitues. Ndërsa pothuajse bihet dakort se detyrën më të rëndësishme, atë të Sekretarit të Përgjithshëm, do ta marrë Belind Këlliçi, një i ri që është rritur shumë politikisht muajt e fundit, duke spikatur e krijuar një profil të tijin. Këlliçi njihet mirë se nuk ka qenë në preferencat e Bashës, e megjithatë, pranohet se nuk do të jetë një levë në duart e Berishës, pasi ka fituar kurajon për të mos rënë dakort, kur nuk është dakort. Konflikti në Gjykatë Vendimi i Gjykatës së Rrethit të Tiranës, që njohu dhe regjistroi Kuvendin e 11 dhjetorit të mbajtur nga Berisha, rrjedhimisht dhe vendimet që u morën aty, për shkarkimin e Bashës dhe gjithë drejtuesve të tjerë, ishte pika e madhe e kthesës në zhvillimet në PD. Po atë ditë, Komisioni i Rithemelimit sëbashku me Berishën, u futën në seli, aty ku patën dështuar të hyjnë me 8 janar, në atë përplasje të dhunshme e të palavdishme që ndodhi në mes të ditës, në mes të Tiranës. Megjithatë, çështja duket se vazhdon. Fronti anti-Berishë në PD, që tani përfaqësohet nga Alibeaj e Bardhi, kanë bërë apelim. Argumenti sipas tyre është se, gjatë procesit të mbajtur në Gjykatën e Rrethit, Gjykatësi nuk ka marrë parasysh parashtrimet e tyre, si palë e interesuar. Ata, i kanë paraqitur në seancë pretendimet kundër njohjes së Kuvendit të 11 Dhjetorit. Mirëpo, burime pranë grupimit kundër Berishës, bëjnë me dije për revistën Newsbomb, se gjykatësi nuk i ka administruar fare argumentat e tyre. Dhe kjo, sipas tyre, është një bazë e mjaftueshme për ta bërë Apelin që ta rrëzojë atë vendim. Shqyrtimi ka nisur. Nëse kjo ndodh, atëherë do të kishim një kthim pas, dhe një furnizim të bollshëm të kaosit të krijuar në PD. Basha, një histori e mbyllur Edhe mbështetësit kryesorë të Lulzim Bashës, e pranojnë se ai është një kapitull i mbyllur. Disa takime që ka bërë nëpër rrethe, apo edhe në Tiranë, nuk kanë sjellë asnjë produkt. Mohohen po ashtu zërat se ai mund të bëjë një parti të re. Ama, nuk ka asnjë shans që të rikthehet edhe një herë në krye të PD, edhe në skenarin më favorizues për të, që do të ishte që Berisha të mos futej vetë për të marrë drejtimin e partisë.

Artikuj të ngjashëm Artikuj

Revolucioni i ftohtë i shkurtit

Gratë që tradhëtuan “Rilindjen”

Quo Vadis PD

SONDAZHI/ Si ndahen votat për Tiranën e Shqipërinë

Beteja e Tiranës, kush do sfidojë Veliajn dhe pushtetin?

Dosje dhe intriga/ A po luhet për shefin e Opozitës

Artikujt më të lexuar

SONDAZHI/ Si ndahen votat për Tiranën e Shqipërinë

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

“Gardhet” politike të Artan Lames

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

TESS – Shkolla e bukurisë në një shkallë tjetër, profesori ndërkombëtar në auditorin shqiptar

David Kostelancik, ambasadori i ri amerikan që do “drejtojë” Shqipërinë

Pasuria e Ahmet Zogut

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?