Bunkeri i zi i Bankers/ Ku u fshehën miliardat që i përkisnin Shqipërisë

Kinezët e Fierit paguanin 50 mijë dollarë në muaj për avokatët, por vetëm 6 mijë për sponsorizime. Në dy dekada, më shumë se 6 miliardë dollarë nga pasuria e nëntokës shqiptare u zhdukën pa lënë gjurmë, e shteti nuk përfitoi asnjë qindarkë. Dokumentat nxjerrin festat luksoze me 500 mijë dollarë, pagesa të dyshimta, llogari të fshehura jashtë vendit dhe faturime fiktive – ndërkohë që institucionet mbyllnin sytë. Shqipëria numëronte humbjet, ndërsa drejtuesit e Bankers mbushnin valixhet me dollarë. Për herë të parë, prokuroria po heton me fakte dhe përgjime një nga aferat më të mëdha të tranzicionit shqiptar, që po trondit themelet e industrisë së naftës.

Ishte 30 dhjetori i vitit 2024. Ndërsa prokurorët e Fierit përgatiteshin të festonin ndërrimin e viteve pranë familjeve, një kërkesë urgjente mbërriti në zyrat e oficerëve të policisë gjyqësore. Një procedim penal duhej regjistruar pa humbur kohë. Pyetjet qenë të shumta: kush e kërkonte këtë në fundvit? Përse pikërisht ndaj “Bankers Petroleum”? Dhe, më e rëndësishmja, a kishte “bekim nga lart”?