BUTRINTI sipas Gonxhes/ Ministri thyen heshtjen: Kushtetuesja, e para!

Butrinti në të gjitha shkrimet e mia, reportazhet apo investigimet është trajtuar si thesari i kulturës, thesar i trashëgimisë sonë historike, thesar i trashëgimisë botërore dhe thesar ekonomik, se është parku, vendi, destinacioni më i vizituar në vendin tonë, pra fitimprurës. Debati për planin e menaxhimit të tij ka ngjallur shumë diskutime. Ministria e Kulturës ka heshtur për një kohë të gjatë duke respektuar deri në fund që drejtësia, gjykata të flasë e para. Së paku, kështu e justifikonte ish- ministrja Margariti në intervistën e fundvitit, ku diskutonim për bilancin e një viti që lamë pas dhe për projektet e reja. Mirëpo me shkrirjen e minsitrisë dhe bashkimin e saj me Ekonominë dhe Inovacionin, në krye të institucionit të ri mbërriti Blendi Gonxhe. Ashtu sikurse pika më e debatuar e ish-ministres ishte qasja për menaxhimin e Butrintit, edhe në pyetjet e para që do të doja t’i dretjoja ministrit të ri lundronte e qetë pikëpyetja mbi letrën e UNESCO-s që u mbajt për muaj e fshehtë dhe për mendimin e tij mbi Butrintin. Edhe në këtë intervistë me ministrin Blendi Gonxhe ishte e para pyetje që doja t’i drejtoja.