Revolucioni i ftohtë i shkurtit

Edhe pse Kryeministri përflitet për një aferë të rëndë, që do ta bënte të ziente secilën opozitë e çdo shoqëri, duket se sërish revolucioni i nisur nga PD nuk po bëhet dot pjesë e njerëzve dhe qytetarëve jashtë radhëve të saj. Çfarë duhet të ndodhë, dhe pse rruga e demokratëve për të bërë për vete shqiptarët, është së pari kapërcimi i vetes së tyre. Një raport i plotë i revistës Newsbomb.al, mbi zhvillimet e fundit në kampin e opozitës

Studiuesi dhe historiani më i lexuar sot në botë, Harari, thotë se revolucionet nuk parashikohen. Madje, që ato të ndodhin, saktësisht duhet të mos dihet se kur dhe si do të vijnë. Janë çarje tektonike që marrin energji brenda shoqërisë e burojnë papritur me zjarr të pandalshëm. Ndryshe, kur ato paralajmërohen, ose ka shenja që dalin në sipërfaqe, apo premisa të dukshme që e vënë në dijeni, këto lëvizje mbahen nën kontroll, dhe dështojnë, nuk lindin.

E prapë, Sali Berisha ka nisur me 11 shkurt atë që ai e cilëson, revolucion paqësor për rrëzimin e qeverisë së korruptuar e të lidhur me krimin, e sidomos, për të ndalur me këtë rrugë, planin për ekzekutimin e opozitës dhe çuarjen e vendit drejt regjimit monopartiak.