35 vjet PD, më shumë thinja më pak ndjekës

Pas 35 viteve, ditët e dhjetorit në PD janë gri, të ftohta, pa shkëlqimin që ky muaj zakonisht sjell tek kjo forcë politike. Një ceremoni e vakët, tregon më pak pjesmarrës, më pak themelues, më pak të rinj, më pak entuziazëm. 35 vite më pas, partia që lindi nga studentët duket e thinjur, e lodhur e larg pushtetit. Në oborrin e selisë, demokratët u mblodhën me 11 dhjetor në darkë për të kremtuar siç bëjnë tash 35 vite, lindjen e forcës së tyre politike, dhe për të kënduar betimet e angazhimet e reja. Fjalimin kryesor e ka kryetari, Sali Berisha. Pas 35 viteve, sërish skena kryesore i takon atij. Me gjasë kështu do të ndodhë dhe pas një viti. Pasi pak më vonë në një intervistë tek Blendi Fevziu ai komfirmoi se do të rikandidojë më prill të 2026, kur dhe i mbaron mandati. Dhjetori në PD është një muaj energjik, i gjallë, me elektrone që lëvizin gjithë kohës. Ka entuziazëm, ka lëvizje. Kremtohet themelimi dhe me këtë rast evokohet fryma heroike e atyre ditëve të fundit të vitit ‘90. Dhe ajo atmosferë sjell vazhdimisht impulse dhe është ushqim i mirë për çdo mot. Të kujtosh lindjen në kushte spartane, në mes të idealeve, endrrave e aspiratave, në zemër të rinisë, në sheshin që do Shqipërinë si gjithë Europa, të nisësh rrugën pikërisht ne pikën e thyerjes së historisë, është një bekim për një parti. Po sot, ka më pak të rinj më atë oborr, ka më pak themelues, dhe rreshti i parë nuk është pasuruar me ndonjë prurje a portret të ri. Sali Berisha premton se PD do të rrëzojë dhe diktaturën e re që është në pushtet, ashtu si beri me komunistët. Kjo e sotmja, sipas tij, nuk është një diktaturë totalitariste, por narko-diktaturë. Fjalimi i tij nuk ka shumë vend për reflektim, për analizë, për të parë nga vetja. Eshtë luftarak dhe mobilizues. Thirrje për bashkim dhe ndarje të reja Në podiumin e shkallëve të PD bëhet thirrje për bashkim, po në të njëjtën orë të ditës së lindjes, në një sallë në Gjirokastër janë mbledhur dhjetëra demokratë, pjesë e strukturave dhe të larguar, të mërzitur a të lënë mënjanë, në një lëvizje të re që ka nisur. E cila, me shumë gjasë do të jetë një ndarje e re. Si shumë e shumë të tjera, shkëputje, degë që kanë ikur nga trupi i PD këto vite e dekada. Në krye të kësaj nisme është Ervin Salianji i cili edhe në Gjirokastër, njësoj si në Durrës e ka mbushur sallën. Ai është energjik dhe ambicioz. Mbi të gjitha ka një pasion për këtë punë dhe e ka organike raportin me njerëzit. Edhe pse nuk ka shpallur ende një projekt, ka krijuar jo pak trazira. Dhe duket që aty ka potencial më shumë se sa në krisjet e tjera. Dhe ai që e kupton dhe e di më mirë këtë gjë është Sali Berisha, i cili nuk priti që ky organizim të marrë udhë. E goditi që në krye, duke e kuptuar mirë forcën e kapacitetin, me idenë për të shuar në nisje. Metoda është e njëjta. Damkosje dhe shpallje si jashtë ligjit, dhe bijtë e saj si të blerë nga qeveria. Kjo patjetër që do sjellë tulatje tek disa, dhe tek nismëtarët, por nga ana tjetër, të pakënaqurit brenda PD apo të mënjanuarit, kjo sjellje e retorikë mund t'i çimentojë në krah të Salianjit. Foltore në vend të analizës Që në PD ka pakënaqësi, lodhje, pezmim e shkurajim, kjo dihet. Pas 7 humbjeve dhe 13 viteve opozitë, demokratët s'mund të merren më të mirëqenë. Kredencialet e udhëheqësve kanë rënë. Zemërimi dhe kontestimi shihet kudo. Nuk ka dyshim se matësi më i mirë i këtyre klimave është Sali Berisha. Dhe mori vendimin për të nisur turin që njëjtë me atë, me të cilin u rikthye në krye të PD, e quan foltore. Është një rreng i zgjuar, për të shmangur analizën dhe për të fituar kohë. Ai do të jetë në rrethe e nëper degë. Demokratët do të marrin mikrofonin, do shfryjnë, do shajnë, do blasfemojnë. Dhe në pjesën dërrmuese të rasteve do blatojnë besnikërinë për doktorin. Ky shkarkim do të zëvendësojë analizën. Dhe do të shpëtojë shumë koka që sot demokratët i duan në satër. Gjendja do të vijojë njësoj. Këtë situatë duket se po shfrytëzon Salianji. Ai ka dalë me disa teza që tentojnë të prishin statuskuonë, rehatinë e qendrës. Kryesorja, që nga denoncuese, ajo të bëhet fituese. Dhe parime si; vendosja e meritës, promovimi i fituesve dhe rigjenerimi i strukturave me të rinj. Me gjithë problemet e mëdha që ka, PD po e konfirmon edhe sot një vlerë të sajën. Aty ka karaktere, ka debat. Dhe për këtë shkak ja del të jetë temë e ditës në debatin publik, edhe pse sa vjen e rrudhet në numra. Vetëm se mungon ajo formula ose vullneti që këtë moment ta kthejë në xhevahir politik. Alkimia që e bën baltën diamant. Ndodh tek Coelho, po jo tek PD. Nje aksident që tregon shumë Në momentin kur bëheshin përbetime të reja në 35 vjetorin e lindjes së PD, në Kuvend, po zgjidhej Avokat i Popullit, dikush që kish marrë firmat e ligjvënësve demokratë por nuk përfaqësonte vullnetin e tyre. Me hile, në krye të këtij institucioni që gjithnjë i ka takuar opozitës, po shkonte ai që PD nuk donte, por që i kishte dhënë bekimin zyrtarisht. Një gol tjetër nga Edi Rama. Rasti i Endrit Shabanit nuk flet për fisnikëri e arritje në politike. Ama dëshmon në rastin më të mirë kaos në PD e në rastin më të keq, papjekuri e papërgjegjshmëri. Dhjetra firma deputetësh e zyrtarësh të lartë të PD ishin lëshuar për Shabanin ashtu sikurse për kandidatë të tjerë, mes të cilëve ishte ai ose ajo që në të vërtetë mbështeste selia blu. Mazhoranca kapi këtë rrethanë dhe bëri avokat të Popullit, atë për të cilin firmosi, por nuk e deshi PD. Si mund të ndodhte kjo?! Deputetët e lidershipi i PD, dhe ata që kishin nënshkruar madje pro tij, bërtitën e ulëriten se ishte e padrejtë. Por ishte pak vonë. Kjo tregoi një mungesë serioziteti. Raste si kjo, janë një test për një opozitë që dëshmon se si i trajton dhe i menaxhon situatat. Në vend të kësaj, pati kaos. Dhe tani, secili fajëson tjetrin. Një tjetër pakënaqësi në oborr. Kur mori drejtimin e PS, Edi Rama ishte para kësaj prove me Avokatin e Popullit. Rasti i tij i parë si lider i Opozitës. Të gjithë e mbajnë mend se si e shndërroi ai në një moment PR-i. Bëri konkurs dhe i dha përmasa publike. Nxori përfitime nga kjo shumë më tepër nga sa vlen në të vërtetë ai institucion. Krejt në të kundërt, PD merr kosto më të madhe, se sa vlen në të vërtetë ai institucion. Shkëndija nuk po vjen Qeveria në Shqipëri nuk është aspak më e ndershme se ajo në Bullgari, në Greqi, apo në Serbi. Përkundrazi. Zbulimet e agjencive të huaja, raportet e partnerëve, të Opozitës, të mediave dhe të drejtësisë, dëshmojnë për afera të rënda korruptive e për lidhje të pushtetarëve me krimin e organizuar e me narkotrafikun. Vetëm se në Shqipëri nuk ka asnjë protestë. Po të shohësh sheshet e rrugët e Greqisë, të Beogradit apo Sofjes, të vjen të mendosh; kaq i lumtur është populli këtu? Sado që jo drejtpërdrejt përgjegjësi e saj, dhe kjo gjendje rëndon mbi Opozitën. Nuk është puna se ajo thjesht thërret mekanikisht revoltën dhe e drejton atë. Dhe kjo nuk po ndodh. Opozita e frymëzon ngritjen e popullit me atë që bën, me atë që është, me mënyrën se si komunikon e përshtatet me shoqërinë, me përpjekjen për rinovim, me ripërtëritje të imazhit, fjalorit e retorikës. Janë këto drejtime që sjellin besim e kontratë të re. PD në këtë sens, nuk po bën asgjë. Me kokëfortësi e arrogancë ajo po thotë se është në rregull, se populli duhet të ndryshojë e të shkojë tek ajo, e jo e kundërta. Me këtë mendësi, dhe mungesën e kurajos për të bërë ndryshim real, të themeltë, PD po ndëshkon jo vetëm veten, por dhe shoqërinë duke mbajtur larg rotacionin aq të nevojshëm. Sa më parë të ketë ndërgjegjësim për këtë situatë, aq më shpejt korsia e re shkuarjes drejt pushtetit afron. Ndryshe, Konfuci që rri në breg të lumit e pret qe rrjedha t'i çojë poshtë armikun, nuk do të jetë as këshillë, as ndihmë e mirë.

35 vjet PD, më shumë thinja më pak ndjekës

Newsbomb.al

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Vajzat e humbura

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

PROTESTA E MEMEVE TË TALLESH NË ZGRIPIN E PAMUNDËSISË

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

35 vjet PD, më shumë thinja më pak ndjekës

Newsbomb.al

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?