8 Marsi dhe dhuna në shoqëri

Edhe këtë 8 Mars 2024 bilanci ishte i rëndë: Bedrie Loka, 41 vjeçe, i dha fund jetës në fillim të Janarit duke pirë fotoksinë. Vdekja e saj hapi kutinë e Pandorës të një sërë dhunimesh nënshtruese sistematike ndaj saj që nga rrjetet sociale e deri në familje nga bashkëshorti. Disa ditë më vonë gjendet e vrarë Georgia Murati në Selanik të Greqisë nga i shoqi i cili nuk e kishte kursyer megjithëse shtatzanë e nën festat e fundvitit. Më 3 shkurt 2024, pas akuzave të forta për dhunë verbale e fizike nga bashëshorti e tradhëtive nga ana e tij, vetëvritet Fatbardha Pali në Pyrgos të Greqisë. Ndërkohë që në vitin 2023 u raportuan 11 gra të vrara në Shqipëri, bilanci nuk është më i pakët edhe në Kosovë. Nga viti 2010 deri në Nëntorin e vitit 2023 raportohen 55 gra të vrara, ndërkohë që viti 2023 aty u mbyll me një ngjarje makabër: Ngritja pritë ndaj Liridona Murselit dhe marrja e jetës së saj në sy të fëmijëve me porosi të të shoqit.

Përse gjithë kjo urrejtje ndaj grave? Urrejta ndaj tjetrit është përditshmërisht e prekshme në shoqërinë tonë. Ajo nuk është e drejtuar vetëm ndaj grave, por edhe ndaj atij që është ndryshe, që është i lirë, që e thotë haptazi mendimin e tij, debatuesit ndaj të cilit nuk fitojmë dot me forcën e argumentit, ndaj fitimtarit por edhe ndaj humbësit apo të margjinalizuarit. Shkurt, ndaj gjithkujt që i pret rrugën e arritjes së qëllimeve mendjeve të sëmura e të mësuara me dhunë.